"Шатахуун түгээх станцууд дутуу шахаж байна" гэх яриа иргэдийн дунд хөвөрч, яригдсаар байдаг.
Тэгвэл Стандарт, хэмжил зүйн газраас улсын хэмжээнд үйл ажиллагаа явуулж буй нефть болон шингэрүүлсэн шатдаг хий түгээх бүх станцад жилд хоёр удаа баталгаажуулалт хийж, гэрчилгээ олгодог юм байна.
Хавар, намрын улиралд хийгддэг баталгаажуулалтын ажил "Петровис" компанийн Энхтайваны гүүрний баруун урд байрлах шатахуун түгээгүүрт хийгдэж байхтай таарлаа.
Стандарт, хэмжил зүйн газрын автомашинд суурилуулсан тусгай төхөөрөмжөөр түгээгүүрийн хошуу шатахууныг зохих хэмжээнд шахаж байгаа эсэхийг шалгаж байв.
Энэхүү баталгаажуулалт орон даяар зохион байгуулагддаг бөгөөд шатахуун түгээх станцын хошуу тус бүрийг нэг бүрчлэн шалгаад хэвийн гэж үзвэл гэрчилгээ олгодог юм байна.
Стандарт, хэмжил зүйн газрын Эзлэхүүн, зарцуулалтыг хэмжих хэрэгслийн улсын шалгагч М.Гомборагчаа "Зургаан сарын хугацаатай баталгаажуулалтын ажлын 2019 оны эхний ээлж эхэлж байна. Өнөөдрийн хувьд "Петровис" компанийн 16 дугаар шатахуун түгээгүүр дээрээс ажил эхэллээ.
Хэрэглэгчийн худалдан авч буй шатахуун зохих хэмжээндээ байгаа эсэхийг тогтоох, хэрэглэгчийг хохироохгүй байх нь баталгаажуулалтын ажлын гол ач холбогдол.
Бүх хошууг шалгаж, стандартын шаардлага хангаж байвал лацадна. Лац нь он оноороо солигддог, тус бүрдээ хувийн дугаартай байдаг. Мөн дараагийн баталгаажуулалт хийгдэх хүртэл энэ лацыг хөндөж болохгүй.
Хэрэглэгчдээс ирсэн гомдлын дагуу мэргэжлийн хяналт, Газрын тосны хэрэг эрхлэх газар, манайх гээд шатахуун худалдаалах үйлчилгээтэй холбогддог бүх байгууллагын төлөөлөл хамтран 2018 оны арваннэг, арванхоёрдугаар сард гэнэтийн шалгалт хийсэн. Ингэхдээ иргэдийн төлөөллийг оролцуулж, шалгах түгээгүүрүүдээ тэднээр сонгуулан хэмжилт хийж үзсэн. Шалгалтын явцад шатахуун дутуу шахаж байгаа нэг ч тохиолдол илрээгүй. Ашиглалтын шаардлагаас үүдэлтэйгээр эвдрээгүй л бол түгээгүүрийн хошуунд асуудал гардаггүй, найдвартай" хэмээн ярилаа.
Стандарт, хэмжил зүйн газраар баталгаажуулалт хийлгэсэн түгээгүүр нь улсын шалгагчийн тавьсан лацыг хөндөхгүй байх, мөн олгосон гэрчилгээг нийтэд нээлттэй байрлуулах үүрэгтэй.
Иргэд та бүхэн үйлчлүүлж буй шатахуун түгээгүүрийнхээ баталгаажуулалт хийлгэсэн эсэх, хийлгэсэн бол гэрчилгээг нь шалгах эрхтэй гэсэн үг.