ФОТО: Нуранги болсон газрын нөхцөл байдал болон эрэн хайх ажиллагаа
Төв аймгийн Заамар сумын нутаг дэвсгэрт үйл ажиллагаа явуулдаг “Эко Алтан Заамар” ХХК-ийн ил уурхайд нурангид даруулсан дөрвөн иргэнээс хоёр иргэний цогцсыг гаргаж аваад байгаа. Онцгой байдлын аврагчид үлдсэн хоёр иргэн болон КАТ-374 загварын экскаватор КАТ-D-8-Т загварын бульдозерыг нуранги дороос гаргах ажиллагаа яг одоо үргэлжилж байна.
Газар дээрх нөхцөл байдлын талаарх мэдээллийг гэрэл зургаар болон албаны хүний тайлбарын хамт хүргэж байна.
Эрлийн ажиллагааг усан орчин дотор явуулж байна
Онцгой байдлын газрын дэд дарга Б.Ууганбаяр “Осол болсноос хойш дөрвөн өдөр өнгөрч байна. Ингэхдээ хоёр хүний цогцсыг гаргасан. Одоогийн байдлаар үлдсэн хоёр хүнийг хайх ажиллагаа явагдаж байна. Хананаас их хэмжээний ус гоожиж байгаа. Уснаас болж их хүндрэл гарч байна. Дээрээс нь давчуу орон зайтай. Бид 50-60 орчим метр урттай далан байгуулж усыг тусгаарлалаа. Тусгаарлаад дотор нь байгаа усыг соруулах ажиллагаа явуулсан. 1,200 метр орчим урттай зургаан хоолойг ажиллуулж усыг гадагшлуулж байна. Эрлийн ажиллагааг усан орчин дотор явуулж байна.
Ус татарснаар бульдозерын булан гарч ирсэн. Троссоор татсан боловч тасраад байна.
Усны доор 2 метр орчим лаг шавар байна. Дээр нь нэг метр ус байна. Тасралтгүй соруулж байна.
Тиймээс одоо усан доор болон лаг шавран доор нэг экскаватор, осолдсон хүмүүс маань байгаа. Өнөөдөртөө багтаад яаралтай хоёр хүнээ гаргаж авах зорилттой ажиллаж байна.
Мөн одоо хүртэл аюултай нөхцөл байдал байна. Учир нь хажуугийн хананд хөлдсөн мөс байна. Хэрвээ энэ бас нурвал аврах ажиллагаа явуулж буй хүмүүсийн дээрээс унах аюултай нөхцөл байдалтай байна.
Нийт талбайгаа дөрвөн хэсэгт хуваагаад аль болох боломжит тооцооллоо хараад, олон хувилбар бодоод ажиллаж байна.
Аврах ажиллагаанд онцгой байдлаас 36, цагдаа, прокурор, шүүх, мэргэжлийн хяналт, “Эко Алтан Заамар” компани зэрэг газруудаас ойролцоогоор 200 гаруй хүмүүс ажиллаж байна" гэлээ.
Осол гарах болсон үндсэн шалтгаануудыг нэгтгээд маргааш лабораторийн шинжилгээний хариу гарсны дараа дүгнэлтийг бүрэн гаргаж дуусгана
Мэргэжлийн ханалтын газрын дэд дарга МХЕГ-ын дэд дарга Д.Энхсайхан “Карьерын хойд хананаас нуралт үүссэн байна. Хөрсний нуралт 75 метр өндөр, 125 метр өргөн газарт хөрс нурсан байгаа. Уг ил уурхайн ойролцоо зургаан нуур тогтсон байгаагаас гурав нь устай байна. Энэ ус нь хөрсний нуралт үүсэх нэг шалтгаан болсон. Осол гарах болсон үндсэн шалтгаануудыг нэгтгээд маргааш лабораторийн шинжилгээний хариу гарсны дараа дүгнэлтийг бүрэн гаргаж дуусгана.
Тухайн аж ахуйн нэгж нь өөрөө тусгай зөвшөөрөлтэй ба байх ёстой зохих бичиг баримтын дийлэнх нь байна. Зарим нэг бичиг баримт дутуу зүйл бол байгаа.
Осолдсон ажилчдын хувьд хөдөлмөрийн хуулийн 97 дугаар зүйл заалтын дагуу тэжээгчээ алдсаны тэтгэмж болгож дөрвөн айлд нийт 193 сая төгрөгийг компаниар гаргуулахаар ажиллаж байна.
Уурхайн ойролцоо айх нуурын ус нэвчсэнээс осол гарсан байж болзошгүй байна. Мөн энд байгаа зургаан том нуурнаас гурав нь устай байна. Эдгээр нь 7, 8, 11 метрийн гүнтэй нуур юм. Нуур гэдэг нь урдны олборлож байсан уурхайн үүссэн ус байгаа.
Уг нь компани усыг цааш нь зайлуулж байж үйл ажиллагаа явуулах ёстой байсан гэвч гүйцэд зайлуулаагүйгээс болж нуралт үүссэн байж болзошгүй" хэмээн ярилаа.
Манай компанийн үндсэн дөрвөн ажилтан осолдсон. Бид маш их харамсаж байна
"Эко алтан заамар" компанийн ажилтан “Манай уурхайн хойд хана нурж дөрвөн хүн дарагдсан харамсалтай хэрэг гарсан. Компанийн зүгээс осол болсон даруйд холбогдох байгууллагуудад хандаж, нисдэг тэрэг захиалан онцгой байдлын аврагчдыг авчирсан. Мөн манай 30 гаруй ажилтан яаралтай ажиллаж хоёр хүнийг гаргаж авсан. Аврах ажиллагаанд манай компанийн 180 гаруй, онцгой байдлын 40 гаруй аврагч байгаа. Компанийн зүгээс ослын шалтгааныг нар ээдэг талын мөс хайлж шороогоо идээд нурсан байх магадлалтай гэж үзэж байгаа.
Мөн Одон орон геофизикин хүрээлэнгээс манай уурхайн энэ байршилд хоёрдугаар сарын 27-ны өдрийн 10:45 цагт 4 баллын хүчтэй газар хөдлөлт болсон талаар мэдээллийг өнөөдөр албан бичгээр ирүүлээд байна. Нуралт үүссэн шалтгааныг мэргэжлийн байгууллагууд эцсийн байдлаар тогтоох байх. Манай компанийн үндсэн дөрвөн ажилтан осолдсон. Бид маш их харамсаж байна. Хуулийн дагуу олгох бүх тэтгэмжийг олгож, ажилчдынхаа үр хүүхдүүдийг боломжит бүх хувилбараар тэтгэнэ. Уурхайн аюулгүй байдлыг шалгах мэргэжилтнүүд өдөр шөнөгүй ээлжээр ажиллаж байдаг. Уг ослыг зайлшгүй байгалийн давагдашгүй хүчин зүйлээс үүдэлтэй гэж харж байгаа” гэлээ.
Фото сурвалжилгыг mpa.mn-ийн зурагчин Төв аймгийн Заамар сумаас хийв /нуранги болсон газраас/
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
53 СЭТГЭГДЭЛТЭЙ
|
