МИАТ 2019 онд "Boeing 737 МAX-8" загварын ГУРВАН онгоц түрээсэлнэ

Гэрэл зургийг mpa.mn

МИАТ компанийн ашиглаж буй зургаан онгоцноос хоёрынх нь түрээсийн хугацаа 2019 онд дуусаж байгаа юм байна. Тиймээс эдгээр онгоцыг орлох "Boeing 737 МAX-8" загварын гурван онгоцыг түрээсээр ашиглахаар болжээ. Эхний онгоцыг энэ сарын сүүлээр, хоёр дахийг нь тавдугаар сард, үлдсэнийг нь аравдугаар сард оруулж ирэхээр төлөвлөж байгаагаа тус компанийнхан өнөөдөр болсон Зам, тээврийн хөгжлийн сайдын шуурхай хуралдааны үеэр танилцуулсан байна. 

МИАТ компани 2019 онд хэд хэдэн шинэчлэл хийхээр төлөвлөж, эхнээс нь хэрэгжүүлж байгаа аж. Тухайлбал, self-check-in буюу өөрийгөө бүртгэх автомат системийг нэвтрүүлж, сургалтын төв нээсэн зэргийг дурдаж болно. Нислэгийн хувьд зуны хуваарь дээр Шанхай-Гуанжоу зэрэг нислэгүүдийг нэмж байгаа юм байна. Энэ хүрээнд зунаас өмнө зургаан нисгэгч авах шаардлагатай байгаа гэнэ. Одоогийн байдлаар тус компани 59 нисгэгчтэй үйл ажиллагаа явуулж байна.