Монголын иргэд НҮБ-д Улаанбаатар хотын агаарын бохирдолд анхаарлаа хандуулахыг хүсэж эхэллээ
Дэлхий нийтийн өөрчлөлтийн төлөөх платформ гэх Change.org-т манай улсын иргэд Улаанбаатар хотын агаарын бохирдол болон утааны асуудалд Нэгдсэн Үндэстний Байгууллагыг анхаарлаа хандуулахыг хүссэн гарын үсгийг өчигдрөөс цуглуулж эхэлжээ.
Энэхүү платформ нь аливаа улсын нийгэмд тулгамдаж буй асуудлыг шийдвэрлэж, эрх баригчдын анхаарал, сонорт хүргэж, шийдлийг бий болгохын тулд иргэдийн гарын үсгийг цахимаар цуглуулдаг юм.
Тэгвэл Улаанбаатар хотын агаарын бохирдлыг бууруулахад туслалцаа үзүүлэхийг НҮБ-д хүссэн энэхүү аяныг иргэн Б.Бат-Энх эхлүүлсэн байна.
Түүний бичсэн захидлыг та бүхэнд хүргэе:
Жил бүрийн өвлийн улиралд Монгол Улсын нийслэл Улаанбаатар хот түүхий нүүрснээс гарч буй утаа, униаранд бүрхэгдэж байна.
Утаа, агаарын бохирдлын асуудал нь тээврийн хэрэгслийн тооноос болж буй асуудал биш юм.
Учир нь, ОХУ-ын Москва хот маш олон тооны тээврийн хэрэгсэлтэй ч манай хот шиг ийм их хорт утаа, агаарын бохирдолгүй байсаар байна.
Манай хотын гол асуудал нь өвлийн -30 хэмийн хүйтэнд өөрийгөө болон гэр бүлээ дулаан байлгаж, хөлдөж үхэхгүйн тулд хамгийн хямд үнэтэй түүхий нүүрсийг түлснээр өөрийгөө болон бусдыг аажмаар хордуулж байгаад оршино.
Монгол Улсын нийт хүн амын тал гаруй хувь нь оршин суудаг Улаанбаатар хотын иргэд өнөөдөр цэвэр агаараар амьсгалах эрхээ алдаад байна.
Үүнийг бид жилээс жилд асуудлыг шийдвэрлэхгүй байгаа Монгол Улсын Засгийн газар болон УИХ-ын гишүүдийн хийж буй хүний эрхийн эсрэг хүчирхийлэл бөгөөд ноцтой зөрчил хэмээн харж байна.
Монгол Улсын иргэн, Улаанбаатар хотын оршин суугчийн хувьд Монгол Улсын Засгийн газрыг дорвитой алхам хийхийг нь шаардаж, урагшлуулж, Монголын иргэдийг энэхүү хүнд, аймшигт нөхцөл байдлаас ангижруулж, тусалж өгөхийг хүсэж байна" хэмээжээ.
Одоогоор тус аянд нэг өдрийн дотор манай улсын 18,000 гаруй иргэн гарын үсгээ зураад байна. Хэрэв та бүхэн тус аянд нэгдэхийг хүсвэл энэхүү холбоосоор орж нэгдэх боломжтой юм.
