БАРИМТ: ЦЕГ-ын дэргэдэх Мөрдөн байцаах албаны ахлах мэргэжилтэн ЖДҮХС-гаас 1.2 тэрбум төгрөгийн зээл авжээ /2018.11.12-НД ЗАЛРУУЛСАН/
Мэдээг 2018.11.12-ны 17:42 минутанд шинэчлэв.
"БАРИМТ: ЦЕГ-ын дэргэдэх Мөрдөн байцаах албаны ахлах мэргэжилтэн ЖДҮХС-гаас 1.2 тэрбум төгрөгийн зээл авжээ" гарчигтай мэдээллийг бид 2018 оны 11 дүгээр сарын 07-ны олон нийтэд хүргэсэн билээ.
Дээрх мэдээнд дурдагдсан “Жаргалант харвест” компанийг 2018 оны дөрөвдүгээр сард өөр хүнд зарсан тухай баримт, тайлбараа Цагдаагийн Ерөнхий газрын дэргэдэх Мөрдөн байцаах албаны Ахлах мэргэжилтэн (2017-3-24 нд эл албанд томилогдсон) Б.Гэрэлмаа бидэнд ирүүллээ.
ТАЙЛБАРТ:
Тус мэдээнд дурдагдсан “Жаргалант харвест” компанийг 2009 онд Б.Гэрэлмаагийн гэр бүлийн хүн газар, тариалангийн чиглэлээр үйл ажиллагаа явуулахаар байгуулжээ. Улмаар 2014 онд эзэмшигч нас барж, компанийн хувьцаа эзэмших эрх түүний гурван хүүхдэд /насанд хүрээгүй/ шилжсэн байна.
Тэрбээр нөхрийнхөө эхлүүлсэн ажлыг үргэлжлүүлэхээр өөр хүнийг компанийн гүйцэтгэх захирлаар томилон ажиллуулж байгаад 2018 оны дөрөвдүгээр сард “Жаргалант Харвест” компанийг Л.Батсүрэн гэдэг хүнд заржээ. Тус компанийг зарж, эзэмшлийг 100 хувь Л.Батсүрэнд шилжүүлсэн тухайгаа Б.Гэрэлмаа нь АТГ-т Хувийн ашиг сонирхол, хөрөнгө орлогын мэдүүлэгтээ хуулийн хугацаанд мэдүүлж байж.
Л.Батсүрэн захиралтай “Жаргалант Харвест” компани 2018 оны зургаадугаар сард ЖДҮХС-гаас зээл авсан байна. Өөрөөр хэлбэл, 2018 оны зургаадугаар сард буюу Б.Гэрэлмаа тус компанитай хамааралгүй болсны дараа “Жаргалант Харвест” ЖДҮХС-гаас зээл авжээ.
2018.11.07-ны 12:20 цагт нийтлэсэн мэдээлэл
Жижиг, дунд үйлдвэрийг хөгжүүлэх сан (ЖДҮХС)-гаас зээл авсан төрийн хариуцлагатай албан тушаалтнуудын нэр тодорсоор...
Энэ удаад Цагдаагийн Ерөнхий газрын дэргэдэх Мөрдөн байцаах албаны Ахлах мэргэжилтэн (2017-3-24 нд эл албанд томилогдсон) Б.Гэрэлмаа гэж хүний хувь эзэмшдэг Жаргалант Харвест компани ЖДҮХС-гаас зээл авсан мэдээллийг дэлгэж байна.
Баримт 1, ЖДҮХС-гаас Жаргалант Харвест ХХК 2018 онд 1,200,000,000 төгрөгийн зээл авсан баримт, Эх сурвалж: Шилэн данс
Баримт 2, Мөрдөн байцаах албаны Ахлах мэргэжилтэн Б.Гэрэлмаагийн хамгийн сүүлд гаргаж өгсөн хөрөнгө орлогын мэдүүлэг, Эх сурвалж: АТГ
Тэрээр ХОМ-тээ Жаргалант Харвест ХХК -д эзэмшдэг хувьцааны тоо 0ш гэсэн боловч ногдол хувь 100% гэж мэдүүлжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
51 СЭТГЭГДЭЛТЭЙ
|
