ИНФОГРАФИК: Иргэдийн өмнө АЖИЛГҮЙДЭЛ, АМЬЖИРГАА хамгийн их тулгамдсан асуудал

Сант Марал сан жил бүрийн гуравдугаар сард Улс төрийн барометр судалгааг зохион байгуулж үр дүнг нь танилцуулдаг уламжлалтай. Бид энэ жилийн судалгааны үр дүнгээс хэсэгчлэн танилцуулж байна.

Судалгаанд Улаанбаатар хот болон Увс, Сэлэнгэ, Сүхбаатар, Дундговь, Хөвсгөл, Баянхонгор аймгийн 1,200 иргэнийг хамруулж, дүнг нийслэл хот, хөдөө харьцуулсан байдлаар харуулжээ. Энэхүү судалгааг ХБНГУ-ын Конрад-Аденауэр-Сангаас санхүүжүүлжээ. 

Судалгааны онцлох үр дүнгээс дурдвал:

• Иргэдийн дийлэнх нь буюу 60 орчим хувь нь стратегийн ордууд дахь Монголын талын эзэмшил 51 хувиас дээш байх ёстой гэж үзэж байна.
   
• Иргэдийн өмнө хамгийн их тулгамдаж байгаа асуудал ажилгүйдэл хэвээрээ байна. Үүнээс үүдэн дараагийн нь асуудал амьжиргаа гэж нэрлэжээ. 
   
• Иргэдийн өмнө хамгийн их тулгамдаж байгаа асуудлууд буюу ажилгүйдэл, амьжиргаа зэрэг асуудлыг шийдэх чадвараар АН-ыг илүү гэж иргэд үзэж байгаа бол ерөнхийдөө бүх асуудлыг шийдэх чадвараар МАН-ыг үл ялиг буюу 1.5%-иар илүү гэж үзжээ.
   
• Мөн иргэд одоогийн эрх барьж байгаа улстөрийн намууд өөрсдийнх нь дуу хоолой болж чаддаггүй гэж 86 хувь нь үзсэн бол нийгэм шударга бус тал руугаа хэлбийж байна гэж 84 хувь нь үзжээ. 
   
• Олон нийтийн хувьд маргааш улстөрийн сонгууль болвол 40 хувь нь ямар сонголт хийхээ мэдэхгүй байна гэжээ.