Монгол, Хятадын Бизнес эрхлэгчид $4.6 тэрбум бүхий 36 гэрээнд гарын үсэг зурлаа

Гэрэл зургийг Mpa.mn Бээжин хотоос

- БНХАУ-аас iKon.mn сайтын сэтгүүлч, редактор Ч.Болортуяа мэдээлж байна. Гэрэл зургийг mpa.mn -

2017 оны эцсээр  Монгол, Хятадын гадаад худалдааны хэмжээ 6.7 тэрбум долларт хүрээд байна. Энэ нь 2016 оноос 36 хувиар өссөн үзүүлэлт бөгөөд Монгол Улсын нийт гадаад худалдааны  63 хувийг эзэлж байгаа юм.

Хоёр улсын төр засгийн тэргүүнүүд 2020 онд гэхэд гадаад худалдааны хэмжээгээ 10 тэрбум ам.долларт хүргэх зорилт тавиад байна.

Бээжин хотноо дөнгөж сая эхэлсэн хоёр улсын Бизнес Форумыг Ерөнхий сайд У.Хүрэлсүх нээж хэлэхдээ “БНХАУ-ын дэвшүүлсэн “Бүс ба зам” санаачлагыг Монгол Улс дэмжиж ирсэн бөгөөд энэ санаачлагад Монгол Улс хамтран ажиллах төлөвлөгөө гаргаад зарим ажил биеллээ олох гэж байна.

 

Гэрэл зургийг mpa.mn Бээжин хотоос

Монгол Улс эдийн засгийн хүндрэлийг харьцангуй бага хугацаанд давж гарсан нь Олон Улсын Валютын Сан болон олон улстай хамтран ажилласаны үр дүн юм.

Эдийн засгийн өсөлтийг бид тасралтгүй өсгөхийн тулд Монгол Улсын Засгийн газар бизнес эрхлэх, хөрөнгө оруулалтын орчинг сайжруулахаар Татварын багц хуульд өөрчлөлт оруулах зэрэг холбогдох хууль эрх зүйн орчныг сайжруулахаар чармайн ажиллаж байна.

Бид Хятад улстай хөдөө аж ахуй, байгаль орчинд ээлтэй эрчим хүчний эх үүсвэрүүдийг байгуулах зэрэг салбарт нягт хамтран ажиллах хүсэлтэй байна. Мөн дэд бүтцийн буюу төмөр зам байгуулах, Улаанбаатар хотын дагуул хот байгуулах зэрэг төсөлд алсын хараатай хамтран ажиллахыг уриалж байна. Хоёр улсын харилцан хамтын ажиллагааг Монгол Улсын Засгийн газар бүх талаар дэмжин ажиллахаа илэрхийлж байна” гэлээ.

Монгол, Хятадын Бизнес Форумд Монголын талаас гэхэд 163 компанийн 299 төлөөлөгч оролцож байна.

Энэ үеэр Монгол, Хятадын компаниуд нийт 36 гэрээ бүхий 4.6 тэрбум доллартай тэнцэхүйц түүхэн хамтын ажиллагаа эхлүүлж байгаа юм.

 

Гэрэл зургийг mpa.mn Бээжин хотоос

Хятадын Олон улсын худалдааг дэмжих хорооны дарга Жян Зөнвэй форумыг нээж хэлсэн үгэндээ “Монгол, Хятадын хоёр улс хамтдаа хөгжиж урагшлах ёстой. 2014 онд БНХАУ-ын Төрийн тэргүүн Ши Жиньпин Монгол Улсад айлчилж хоёр орны харилцаа хурдацтай хөгжижөд чухал нөлөө үзүүлсэн. БНХАУ-ын Монгол дахь хөрөнгө оруулалтын гуравны нэгийг эзэлж байна. Үүний хүрээнд 100 мянган ажлын байраар хангаж байна.

Хоёр орны ард иргэдийн хэлхээ холбоо улам нягт бат бөх болж байна. Хоёр орны худалдаа эдийн засгийг тасралтгүй нэмэгдүүлэхээр анхаарч ажиллаж байна. Өнөөдрийн форумд хоёр орны 600 гаруй төлөөлөгч оролцож байгаа нь хоёр улсын бизнес эрхлэгчид хамтран ажиллах өндөр их сонирхолтой байгааг илэрхийлж байна. Хятад, Монголын худалдааны асуудлыг улам дөхөм болгож хил гаалийн нэвтрэлтийг саадгүй болгох ёстой.

Хөрөнгө оруулалтыг нэмэгдүүлэх  ёстой. Монгол Улсын хувьд үйлдвэржилтийн маш их эрэлт хэрэгцээ байгаа. Хятад улсын хувьд энэ чиглэлд туршлагатай бөгөөд энэ талаар олон ажил хэрэгч хамтын хөгжлийг цогцлоох боломжтой” гэв.

 Айлчлалд зөвхөн бизнесийн төлөөлөл гэхэд 300 орчим хүн Монголоос ирж ажиллаж байгааг хэлэх хэрэгтэй

 

Гэрэл зургийг mpa.mn Бээжин хотоос

Гадаад Харилцааны сайд Д.Цогтбаатар “Монголын бизнес эрхлэгчид маань Хятадын компаниудтай олон чухал гэрээ хийнэ. Үүнийг би энэ удаагийн айлчлалын гол амжилт гэж онцолж хэлмээр байна. Яагаад гэхээр төрийн гол ажил нь бизнес эрхлэгчдийн үйл ажиллагааг дэмжих. Хувийн хэвшлийн үйл ажиллагаа өргөжсөнөөр ажлын байр нэмэгдэх, татварын бааз суурь өргөжих эерэг нөлөөтэй. Энэ айлчлалд зөвхөн бизнесийн төлөөлөл гэхэд 300 орчим хүн Монголоос ирж ажиллаж байгааг хэлэх хэрэгтэй. Миний хувьд олон айлчлалд ажиллаж байсан. Ийм өргөн бүрэлдэхүүнтэй хувийн хэвшлийн төлөөлөл өмнө нь айлчлал дагаж байсангүй” гэж энэхүү айлчлалын үеэр хэвлэлийнхэнд ярилцлага өгөхдөө дурдсан билээ.

Өнөөдөр гарын үсэг зурах 36 гэрээний тухайд Бөөрөлжүүтийн Дулааны цахилгааны станцийн төсөлд Бодь Интернешнл ХХК, China State Consruction Engineering компанитай хамтран ажиллах гэрээнд гарын үсэг зурлаа.

Энэ талаар Бодь Интернешнл ХХК-ийн Гүйцэтгэх захирал А.Амундра "Дөрвөн жилийн хэлэлцээний дүнд өнөөдөр бид 450 орчим сая долларын хөрөнгө оруулалт бүхий гэрээнд гарын үсэг зурлаа. Төсөл хэрэгжүүлэгч нь дан Монголын компаниуд байх ба нийт 300 мвт хүчин чадал бүхий цахилгаан станц байгуулах юм" гэж байв.

Мөн Завхан аймгийн Тэлмэн сумын 100 мвт хүчин чадал бүхий дулааны цахилгаан станцийн төсөл гэх мэт олон сонирхолтой томоохон гэрээнүүдэд гарын үсэг зурах нь.

 Нийслэл хотын ахуйн хог хаягдлыг сэргээн ашиглаж эрчим хүчний үйлдвэр байгуулах хамтын ажиллагааны тухай Санамж бичигт гарын үсэг зурна 

 

Түүнчлэн соёл урлагийн салбарт 50 ангит Чингис хааны тухай түүхэн киног хамтран бүтээх, хүнсний салбарт мах махан бүтээгдэхүүн нийлүүлэх гэрээ зэрэг олон чухал гэрээг хувийн хэвшлийн төлөөлөл болон төрийн засгийнхан өнөөдөр байгуулах гэж байна.

Мөн өнөөдрийн чуулганы үеэр нийслэл хотын ахуйн хог хаягдлыг сэргээн ашиглаж эрчим хүчний үйлдвэр байгуулах хамтын ажиллагааны тухай Санамж бичигт Хотын дарга С.Батболд гарын үсэг зурна.

С.Батболд даргын мэдээлж буйгаар Хятадаас авах хоёр тэрбум юанийн буцалтгүй тусламжийн хүрээнд нийслэлийн дахин төлөвлөлтийн төслүүдэд дэд бүтцийн санхүүжилт хийх талаар мэдээллээ.

ТАНИЛЦ: Монгол, Хятад бизнес эрхлэгчдийн байгуулсан 36 ГЭРЭЭНИЙ ЖАГСААЛТ