ГССҮТ энэ оны эхний 11 сарын байдлаар гэр бүлийн хүчирхийллийн 960 хохирогчид тусламж үзүүлжээ
"Охид эмэгтэйчүүдийн эсрэг хүчирхийлэл 16 хоногийн аян”-ны хүрээнд ГССҮТ-ийн Гэр бүлийн хүчирхийлэлд өртөгсдөд тусламж үзүүлэх "Нэг Цэгийн Үйлчилгээ”-ний төвийн үйл ажиллагааг ард иргэд, олон нийтэд таниулан сурталчлах өдөрлөг өнөөдөр боллоо.
ГССҮТ-ийн Нийгмийн эрүүл мэндийн албаны дэргэдэх Нэг цэгийн үйлчилгээ нь 2010 онд байгуулагджээ. Тухайн жилдээ гэр бүлийн хүчирхийлэлд өртсөн 302 үйлчлүүлэгчдэд тусламж үйлчилгээ үзүүлсэн бол энэ оны арваннэгдүгээр сарын байдлаар гэр бүлийн хүчирхийллийн 960 хохирогчид үйлчилгээ үзүүлээд байгаа аж.
Гэр бүлийн хүчирхийллийн хохирогч нь ихэвчлэн хүүхэд эмэгтэйчүүд байдаг бөгөөд энэ оны арваннэгдүгээр сарын байдлаар:
- Биеийн хүчирхийлэлд өртсөн 694,
- Сэтгэл санааны хүчирхийлэлд өртсөн 960,
- Үл хайхрах хүчирхийлэлд өртсөн 299 хүүхэд үйлчлүүлж,
- тэдгээрийн 615 үйлчлүүлэгчийг 24-72 цагийн турш хамгаалах байранд байрлуулж амь нас, аюулгүй байдлыг нь ханган ажиллажээ.
Гэр бүлийн хүчирхийлэлд өртөж буй охид эмэгтэйчүүд, хүүхдүүдийн TOO жил ирэх тусам өсөх хандлагатай байгаа учир иргэн бүр дуугүй байлгүй, хүчирхийллийн тохиолдол бүрийг мэдээлж, иргэний үүргээ биелүүлэхийг ГССҮТ-ийн эмч, ажилчид уриалж буй юм.
ФОТО
Гэрэл зургийг mpa.mn
