72 цагийн УСТГАЛЫН АРД

Нэгэн оюутан 72 цагийн дотор жирэмслэлтээс хамгаалах эмийг ойр ойрхон ууснаас болж сарын тэмдэг нь байнга алдагддаг болсон тухайгаа ярилаа. Түүнийг эмчид үзүүлэхэд жирэмслэлтээс хамгаалах эм уусан уу, эсвэл үр зулбуулсан уу гэж асуужээ.

Оюутан жирэмслэлтээс яаралтай хамгаалах 72 цагийн эмийг хэдэн cap дараалан уусан тухайгаа эмчид ярьсан байна. Уг эмийг дур мэдэн тун хэтрүүлэн хэрэглэвэл олон сөрөг нөлөө үзүүлдэгийг эмэгтэйчүүдийн эмч нар анхааруулдаг. 

Жирэмслэлтээс хамгаалах постинорыг уг нь эмчийн зааврын дагуу хэрэглэх ёстой байдаг.

Гэвч манай бүсгүйчүүд үл ойшоосоор. Жирэмслэлтээс хамгаалах постинорыг уг нь эмчийн зааврын дагуу хэрэглэх ёстой байдаг. Постинор нь өндгөн эсийн боловсрох явц болон үр тогтолтыг дарангуйлах үйлчилгээтэй эм юм.

Гэхдээ эмчийн зааврын дагуу уусан тохиолдолд бодисын солилцоо болон гормоны зохицуулалтад үзүүлэх нөлөөлөл нь харьцангуй бага. 
Гэтэл манай эмэгтэйчүүд уг эмийг жилд олон удаа хэрэглэснээс өндгөвчний үйл ажиллагаа алдагдах, сарын тэмдгийн мөчлөг өөрчлөгдөх, цус алдах зэрэг эрсдэлтэй тулгардаг байна.

Ийм эрсдэлд орсноор эмэгтэйн биеийн эсэргүүцэл сулрах, цус алдах, аливаа өвчин даамжрах зэрэг шинж тэмдэг илэрдэг. Мөн элэг цөсний өвчтэй, жирэмсэн, өсвөр насны, чихрийн шижинтэй эмэгтэйчүүдэд энэ эмийг уухыг олон улсад хориглодог аж.

ДЭМБ-ын зөвлөснөөр постинор эмийг зургаан сард ганцхан удаа л уух заавартай. Гэтэл эмийн сангуудад хэн дуртай нь худалддагаас болоод охид, эмэгтэйчүүдийн дунд замбараагүй хэрэглээ бий болжээ.

Хан-Уул дүүргийн 120 мянгатад байрлах эмийн сангаар орж, уг эмийг худалдан авч байгаа хүмүүсийн талаар бүртгэл хөтөлдөг, эсэхийг лавлахад эмийн санч Д “Тийм зүйл байхгүй. Хүмүүс өөрсдөө л сураглаж ирдэг. Постинор эмийн борлуулалт ер нь боломжийн сайн байдаг” гэсэн хариулт өглөө.

Антибиотикийг дэлхийн олон оронд жороор олгодог байтал манай улсад тийм зохицуулалт байхгүй. Үүний дараа орох хяналтгүй зарагддаг эм нь 72 цагийн дотор ууж жирэмслэлтээс яаралтай хамгаалах постинор, прегнон, мадонна орно. Эмийн зохистой хэрэглээг хэвшүүлнэ гэж эрүүл мэндийн салбарынхан байнга ярьдаг ч амьдрал дээр биеллээ олсон нь тун ховор. 

Иймд жирэмслэлтээс хамгаалах постинор эмийн худалдан авагчдын талаар эмийн сангууд бүртгэдэг болмоор байна. Жишээлбэл, иргэн Б төдөн оны тавдугаар сард постинор эмийг худалдаж авсан гэсэн цахим бүртгэлийг эмийн сан бүр хөтөлдөг болчихвол энэ замбараагүй хэрэглээг хязгаарлах боломж бүрдэнэ.

Тухайн иргэн гурван сарын дотор уг эмийг дахин худалдаж авахаар эмийн санд очвол өмнөх баримтыг нь харуулж, та зургаан сарын дараа л дахин хэрэглэх боломжтой гэсэн шаардлага тавьж, татгалздаг болгох хэрэгтэй байна.

Энэ мэт хяналтгүй байдлаас болоод олон иргэн эрүүл мэндээрээ хохирдгийг эмч нар хэлдэг.

Жирэмслэлтээс хамгаалах 72 цагийн эм, үр зулбуулдаг эмийг хэрэглэснээс болоод олон эмэгтэй эрүүл мэндийн асуудалтай болсон талаар эмч нар хэлж байлаа.

 Жирэмслэлтээс хамгаалах постинор эмийн худалдан авагчдын талаар эмийн сангууд бүртгэдэг болмоор байна.​ 

Эрүүл мэндийн чиглэлээр үйл ажиллагаа явуулдаг төрийн бус байгууллагынхан нас насны төлөөлөл болох 500 эмэгтэйн дунд жирэмслэлтээс хамгаалах ямар арга хэрэглэдэг талаар судалгаа явуулжээ. Уг судалгаанд оролцсон 16-26 насныхны эмэгтэйчүүдийн 49 хувь нь жирэмслэлтээс хамгаалах 72 цагийн эм хэрэглэдэг гэж хариулжээ.

Харин 32 хувь нь cap бүр уудаг эм, есөн хувь нь гурван cap тутам тариа тариулдаг, 10 хувь нь лаа хэрэглэдэг гэж хариулсан байна. 72 цагийн эм буюу постинор уудаг хүмүүсийн дийлэнх нь оюутнууд байгаа нь судалгаанаас анзаарагджээ. Харин 27-36 насныхны 30 хувь нь cap тутам уудаг эм, 28 хувь нь 72 цагийн дотор уудаг эм, 21 хувь нь лаа, 21 хувь нь гурван сарын дотор тариа тариулдаг гэж хариулав.

Жирэмслэлтээс хамгаалах 72 цагийн эмийг худалдан авсан хүмүүсийг бүртгэдэг болъё

Жирэмслэлтээс хамгаалах эм ямар нэг сөрөг нөлөө үзүүлсэн үү гэсэн асуултад судалгаанд оролцсон 500 эмэгтэйн 259 нь тийм гэж хариулсан байна. Энэ хүмүүсийн 33 хувьд нь дотор муухайрах, 20-д нь цус алдах, 18-д нь толгой өвдөх, 12-д бие сульдах шинж тэмдэг илэрсэн байна.

Мөн ярилцлагаар судалгаа явуулсан хүмүүсийн зарим нь таргалсан, ходоод өвддөг болсон хэмээн хариулжээ. Иймд 72 цагийн дотор уудаг эм жирэмслэлтээс хамгаалах “шалгарсан” арга биш төдийгүй ямар их сөрөг үр дагавартай байдгийг эмэгтэйчүүд ойлгон, ухамсарлах нь чухал байна.

НЭГ АСУУЛТ

-Бид 72 цагийн дотор ууж жирэмслэлтээс хамгаалах постинор эмийн талаар эмэгтэйчүүдийн эмч нараас асуулаа.

ХҮҮХНҮҮД ПОСТИНОРЫГ БАЙНГЫН ТҮРГЭН ТУСЛАМЖ МЭТЭЭР ОЙЛГОХ НЬ БУРУУ

Нийслэлийн “Хүрээ” амаржих газрын зөвлөх эмч Ж.Оюунцэцэг:

-Постинор бол нөхөн үржихүйн түргэн тусламж юм даа. Гэхдээ энэ эм бол жирэмслэлтээс хамгаалах арга биш. Би энэ эмийг хэрэглэж, жирэмслэлтээс хамгаал гэж зөвлөдөггүй. Жирэмслэлт явагдах гэж байсан үйл явцыг таслан зогсоодог гээд үзэхээр нэлээд хүчтэй эм л дээ.

Гормоны их өндөр тунтай эм болохоор өндгөвчний үйл ажиллагааг зохиомлоор хямраадаг. Зарим хүнд байнга цус алдах шинж тэмдэг илэрдэг.

Эмэгтэйчүүд сарын тэмдгийн хуанлиг зөв бөгөөд тогтмол хөтөлдөг байх ёстой. Хүүхнүүд энэ эмийг байнгын түргэн тусламж мэтээр ойлгож хэрэглээд байна.

Энэ бол маш буруу. Өндгөвч өндгөн эс боловсруулах гээд л байнгын үйл ажиллагаатай явж байхад гэнэт дундаас нь зохиомол үйл хэрэглэчихээр яаж эрүүл байх вэ.

Гормон бол цусанд ороод бүх эрхтэн системд нөлөөлдөг учраас маш болгоомжтой хандах ёстой. Гормоны найрлагатай эм уусан эмэгтэйн цус зургаан cap болж байж цэвэршинэ. Өөрөөр хэлбэл, зургаан сарын дотор цусанд гормоны агууламж байж л байдаг.

ЗАМБАРААГҮЙ ХЭРЭГЛЭВЭЛ САРЫН ТЭМДЭГ ХЯМАРЧ, ДААВРЫН ТЭНЦВЭР АЛДАГДДАГ

ЭХЭМҮТ-ийн Эх барих эмэгтэйчүүдийн эмнэлгийн эмчилгээ эрхэлсэн дэд захирал Г.Баттулга:

-Жирэмслэлтээс хамгаалах 72 цагийн эм гэж эмэгтэйчүүд яриад байдаг юм. Хэд хэдэн төрлийн нэршлээр оруулж ирдэг л дээ. Дааврын бэлдмэл өндөр тунгаар агуулсан эм учраас жилд дээд тал нь 1-2 удаа л ууж хэрэглэх ёстой.

Гэтэл манай эмэгтэйчүүд хяналтгүй хэрэглээд байна. Замбараагүй хэрэглэвэл сарын тэмдгийн хямрал үүсгэж, дааврын тэнцвэрт байдлыг алдагдуулдаг. Постинор эмийг худалдах бүрт эмэгтэйчүүдийн эмч нар сөрөг нөлөөний талаар ярьдаг.

Өрхийн эмч нар хүртэл өвчтөндөө байнга зөвлөдөг байх.

Дааврын бэлдмэл өндөр тунгаар агуулсан эм учраас жилд дээд тал нь 1-2 удаа л ууж хэрэглэх ёстой. 

Олон улсын байгууллагын тусламжаар өрхийн эмнэлгүүдэд жирэмслэлтээс хамгаалах бэлдмэл, бэлгэвч өгдөг шүү дээ.

Тэндээс жирэмслэлтээс хамгаалах бэлдмэл, бэлгэвч авах боломжтой. Гэвч манай эмэгтэйчүүд тэгдэггүй. Заавал эрсдэлтэй зүйлийг л сонгоод байдаг. Нөгөө талаар үйлчлэгч, сувилагч, эх баригч, эмийн санч нар дур мэдэн эм хэрэглэх зөвлөгөө өгдөг. Ийм зүйл байж болохгүй.

ПОСТИНОР, ПРЕГНОН ЗЭРЭГ ЭМИЙГ ОЙРХОН ДАВТАМЖТАЙГААР ХЭРЭГЛЭЖ БОЛОХГҮЙ

Эмэгтэйчүүдийн хавдрын эмч Б.Оюунбилэг:

-Жирэмслэлтээс хамгаалах 72 цагийн эм буюу постинор, прегнон зэрэг эмийг эмчийн хяналтгүй ууж болохгүй. Сүүлийн жилүүдэд энэ эмийг буруу, ойрхон давтамжтайгаар хэрэглэснээс болоод эмэгтэйчүүд өндгөвчний өвчтэй болж байна.

Ямар ч эмэнд гаж нөлөө бий. Гол нь эмчийн хяналттай, заавар, зөвлөмжийнх нь дагуу хэрэглэх хэрэгтэй. Ялангуяа оюутнууд жирэмслэлтээ зохицуулж чадахгүй байна. Үүнээсээ болоод эрүүл мэндээрээ хохирдог.

Постинор, прегнон зэрэг эм нь дааврын өндөр агууламжтай байдаг учраас ойрхон давтамжтайгаар удаан хэрэглэвэл хоргүй хавдар үүсгэдэг. Эмчийн заавар, жороор хэрэглэх ёстой эмийг зүгээр л ашгаа бодоод хяналтгүйгээр борлуулдаг. Эмийн хэрэглээнд цаг алдалгүй хяналт тавихгүй бол хүмүүс эрүүл мэндээрээ хохирсоор байна.