УИХ-ын чуулганаар Төрийн албаны тухай хуулийг хэлэлцэж байна
УИХ-ын чуулганы өнөөдрийн хуралдаан эхэллээ. Хуралдаанаар Төрийн албаны тухай хуулийн төслийн зарчмын зөрүүтэй асуудлаар санал хураалт явуулж байна.
Ерөнхийлөгчийн Сангийн сайд Ч.Хүрэлбаатарт тавьсан хоригийг өнөөдрийн хуралдаанаар хэлэлцэх боломжгүй аж. Учир нь уг хоригийг Төсвийн болон Хууль зүйн байнгын хороогоор хэлэлцэж байж УИХ-ын чуулганаар хэлэлцэх ёстой юм байна.
Төсвийн байнгын хорооны хуралдаан өнөөдөр болох байсан ч ирц хүрээгүй шалтгаанаар хойшилжээ.
“Монгол Улсын 2017 оны төсвийн тухай хуульд өөрчлөлт оруулах тухай хууль баталсантай холбогдуулан авах арга хэмжээний тухай” Улсын Их Хурлын тогтоолын төслийг УИХ-ын чуулганы өнөөдрийн үдээс хойших хуралдаанаар хэлэлцэж магадгүй.
Улсын Их Хурлын тогтоолын төсөлд “2017 оны төсвийн давсан орлогоос төрийн өндөр албан тушаалтан, шүүх, прокуророос бусад төрийн албан хаагчид 300 мянган төгрөгийн ажлын үр дүнгийн урамшуулал олгох"-ыг Төсвийн байнгын хорооны гишүүд дэмжээд байгаа юм.
