Сүхбаатар дүүргийн өндөржүүлсэн бэлэн байдлыг цуцалжээ
Цаг агаарын дулаарлаас болж дүүргийн гэр хорооллын айл өрх, гудамж талбай шар усны үерт автан онцгой нөхцөл байдал үүссэн учраас Сүхбаатар дүүргийн Засаг дарга захирамж гарган зарим хороодын Засаг даргын ажлын албыг өндөржүүлсэн бэлэн байдлын зэрэгт шилжүүлэн Онцгой комисс шаардлагатай арга хэмжээг авч ажилласан.
Өндөржүүлсэн бэлэн байдлын хугацаанд дүүргийн Онцгой комисс ажлын дэд хэсгүүдэд хуваагдан үүссэн нөхцөл байдалд үнэлгээ хийн үерт автаж сүйдсэн гудамж талбай, далан суваг, шуудууг сэргээн засварлаж, шинээр бүтээн байгуулалт хийж, айл өрхөд шаардлагатай тусламж үйлчилгээг үзүүллээ.
Ийнхүү хойшлуулшгүй арга хэмжээ авсны үр дүнд нөхцөл байдал тогтворжсон тул дүүргийн Засаг дарга 2018.03.26-ны өдрийн А/75 дугаар захирамжаар өндөржүүлсэн бэлэн байдлын зэргийг цуцаллаа.
Мөн цаашид цаг агаар илүү дулаарч, дахин шар усны үер болж болзошгүй учир, иргэдэд сэрэмжлүүлэг хүргэх, эхлүүлсэн бүтээн байгуулалтын ажлуудаа чанартай дуусгах, урьдчилан хяналт тавих, үерийн голомтод бохирдсон газар, хөрсөнд ариутгал халдваргүйжүүлэх ажлыг нэн даруй хийхийг ажил хариуцсан хэлтэс, албадад даалгав.
