И-спортын төрлөөр Монголын анхны Дэлхийн аварга болсон "IHC esports" багийн БАЯРТ МӨЧ...

И-спортын PUBGM тоглоомын Дэлхийн Аварга Шалгаруулах Тэмцээн (ДАШТ) Турк улсад өчигдөр зохион байгуулагдаж өндөрлөлөө. Тус тэмцээний "Grand final"-д манай улсаас оролцсон "4Merical vibes", "Stalwart esports", "IHC esports" баг богц дүүрэн амжилттай ирэхээр болсон билээ.

Тодруулбал "IHC esports" и-спортын ДАШТ-д түрүүлсэн Монголын анхны баг болж, 453,500 ам.долларын шагнал хүртэв. Мөн дэлхийн аваргын шилдэг тоглогчоор тус багийн Zyol буюу Б.Золбоот тодорлоо.

Харин "Stalwart esports" баг дэд байрт шалгарч, 263,000 ам.долларын шагналыг хүртэв. Тэгвэл анх удаа дэлхийн аваргад оролцож буй "4Merical vibes" баг дөрөвдүгээр байр эзэлснээр 144,000 ам.долларын шагнал хүртсэн амжилттайгаар тэмцээнээ өндөрлүүлсэн. 

"IHC esports" баг PUBGM тоглоомын 2020 оны ДАШТ-д "Zeus esports" нэрээр оролцож, и-спортын төрлөөр дэлхийн аваргын анхны хүрэл цомыг авч байлаа. 2021 онд дэлхийн аваргад орж чадахгүй хасагдсан. Тухайн улиралд багийн эзэмшил болон нэрээ "IHC esports" болгон өөрчилсөн байдаг. 2022 оны дэлхийн аваргын эрхээ Last chance шатнаас авч, тавдугаар байр эзэлж байв. 

Улмаар өнгөрсөн сард зохион байгуулагдсан дэлхийн аваргын лигийн Last chance шатны эцсийн мөчид "winner winner chicken dinner" хийснээр "Grand final"-д тоглох эрхтэй болсон. Тус тоглолтын сүүлийн тойрог шахах үед Японы багийн эсрэг "IHC esports" багийн тоглогч Godless буюу Б.Билгүүний үсрэлттэй буудалт тэднийг одоогийн амжилт руу хөтөлж, дэмжигчдийнхээ магнайг тэнийлгэсэн юм. 

Энэ удаагийн дэлхийн аварга гурван өдрийн турш нийт 18 удаагийн тоглолтын үр дүнгээр дууссан. "IHC esports" багийн хувьд эхний өдөр зургаадугаар байрт бичигдэж, тэргүүлэгчээс 22 оноо дутуу байв. Хоёр дахь өдрөө хүснэгтийн гуравдугаар байр руу дэвшсэн. Улмаар сүүлийн өдрийн зургаан тоглолтдоо нийт 46 оноо авав.

Ингэснээр и-спортын төрлөөр ДАШТ-д түрүүлсэн Монголын анхны баг болсон юм. Гагцхүү улсаас цалин, тэтгэмж авдаггүй, өөрсдийн чадлаараа олон улсад өрсөлдөж, Монголын нэрийг гаргасан нь хамгийн тодоор онцлох үйл явдал боллоо. 

Аваргын цом өргөснийхөө дараа Zyol буюу Б.Золбоот сэтгэгдлээ хуваалцахдаа "Багаараа маш их бахархаж байна. Энэ хүртэлх зам дардан байгаагүй. Бид олон хүнд өдрүүдийг туулсан. Энэ тоглоомын утга учир нь байлдах. Тиймээс бусад багийн тоглогчдоос илүү байлдаж чадсанаар аварга боллоо. Унасан, боссон ч үргэлж хамт байсан дэмжигчдэдээ баярлалаа" хэмээн ярилаа. 

2023 оны PUBGM тоглоомын дэлхийн аварга IHC esports багийн гэрэл зургуудаас...