Галын шугамаас зугтсан хурандаа

mpa.mn

Хариуцлага алдсан хоёр сайдаа явуулахын оронд танхимаараа огцрох шийдвэрийг Монгол Улсын Ерөнхий сайд асан У.Хүрэлсүх гаргав.

Цар тахлын халдварыг дотооддоо алдахад, коронавирусийн халдвараар бус төрийн харалган шийдвэрийн улмаас эрдэнэт хүний амь нас хохироход, эх орондоо ирэх гэж тэмцсэн олон мянган иргэн гадаадад гацахад хариуцлагын асуудал хөндөөгүй хэр нь яг энэ цаг үед огцрох шийдвэр гаргасан нь яалт ч үгүй түүний улс төрийн нүүдэл байв. Гагцхүү тэр нүүдлээ аль хэдийн төлөвлөчихөөд оновчтой цагийг хүлээж байсан нь дамжиггүй.

Жагсаал цуглааныг Х.Баттулга бус У.Хүрэлсүх ашиглав

Эмнэлгийн ажилтнууд нялх биетэй эхийг дөнгөж мэндэлсэн үртэй нь хүйтэн машинд суулган авч яваа бичлэг нийгмийг бухимдуулсан. Энэхүү бичлэг коронавирусийн өмнө барьц алдан самгардаж буй төрийнхний үйл ажиллгаанд шүүмжлэлтэй ханддаг залуусыг жагсаалд уриалан дуудсан юм. Харин энэ явдлыг овжноор ашигласан хүн нь Ерөнхийлөгч бус Ерөнхий сайд асан У.Хүрэлсүх.

Тэр огцрох болсон тухайгаа мэдэгдэхдээ л Ерөнхийлөгч рүү дайрч эхэлсэн. Иргэдийн хүсэл зоригоор нэгдсэн жагсаалыг Ерөнхийлөгч санхүүжүүлэн зорилгыг нь өөрчилж улстөржүүлсэн гэх үгийг мэдэгдэлдээ дайв. Товчхондоо эв нэгдлийн илэрхийлэл байх ёстой Ерөнхийлөгч улс төр хийгээд байгаа учраас үймээн самуун гарахаас сэргийлж Ерөнхий сайдын албан тушаалаас огцорч байна гэв. Шат шатны дарга нар нь хариуцлага алдсан учраас бус Ерөнхийлөгч улс төр хийгээд байсан болохоор Засгийн газар огцорч байгаа нь сонин.

Ард түмний өмнө хүлээсэн хариуцлагаас зугтав

2020 оны УИХ-ын сонгуульд МАН үнэмлэхүй ялалт байгуулан 62 суудал авав. Энэ гавьяа яалт ч үгүй У.Хүрэлсүхийнх. Парламентын шинэ гишүүдийн олонх нь түүний нэрээр сонгогдсон гэхэд хилсдэхгүй. Гэвч нэр дэвшигчдийнхээ тойрог болгон дээр очиж бидэнд итгэл үзүүлээрэй, сонгоорой хэмээн уриалж явсан лидер нь ёс зүйн хариуцлага хүлээж Засгийн газраа огцрууллаа. Тэгвэл У.Хүрэлсүхийн нэрээр сонгогдсон гишүүдтэй парламент ч мөн адил ёс зүйн хариуцлага хүлээх ёстой бус уу?   

Засгийн газрын эхлүүлсэн ажлыг нь дуусгаж, үр дүнг нь үзэхийг ард түмэн хүссэн. Гэвч тэр яалт ч үгүй нөхцөл байдалд орсон мэт харагдах шийдвэр гаргаж, жинхнээсээ хариуцлагаас мултарч чадлаа. Дөнгөж төрсөн эх, нялх үртэйгээ У.Хүрэлсүхийн улс төрийн нүүдэлд ашиглагдаж, хариуцлага алдсан сайд нар нь Ерөнхий сайдынхаа алдааг хаацайлах халхавч болов.  

Ерөнхий сайд байж чадаагүй хүн Ерөнхийлөгч болж чадах уу?

У.Хүрэлсүх огцрох тухайгаа зарлахын зэрэгцээ Ерөнхийлөгчийн сонгуульд нэр дэвшихээ ч ил далд байдлаар мэдэгдсэн.

Тэгвэл танхимаа удирдан зохион байгуулж чадалгүй ёс зүйн хариуцлага хүлээн огцорсон хүн Ерөнхийлөгч болж чадах болов уу.

Шударга ёсны төлөө, шударга бусын хонгилыг нураахын төлөө амиа ч хайрлахгүй хэмээн цээжээ дэлдэж байсан цэргийн хурандаа энгийн номхон иргэдээ галын шугаманд орхиод зугтаасан нь харин шударга бус үйлдэл боллоо.