Мэдээллийн дайнд төөрсөн Монгол
-Алдагдсан Монголыг нүв нүцгэн “тамирчин” шиг харагдуулж байгаа нь эмгэнэлтэй-
Оросын шинжээч Олег Глазуновын “Хятадын тагнуулын алба” ном 2010 оноос олны анхаарлыг татсан юм. Тус номын цөөн мөрийг дор өгүүлье. “Сүүлийн үед гадаадын болон дотоодын олон нийтийн хэвлэл мэдээллийн хэрэгсэлд “Мэдээллийн дайн” гэсэн нэр томьёо байнга гарах болжээ.
Энэ нь мөн чанартаа дэлхийн улс төрийн болон цэрэг дайны зөрчилдөөний салбарт жинхэнэ хувьсгал гарч байгааг илэрхийлж байгаа юм. Дайснуудынхаа эсрэг мэдээллийн дайныг АНУ болон Оросын тусгай албад тун идэвхтэй явуулж байгаа. Энэ тухай Югослав, Ирак, Афганистанд болсон үйл явдал гэрчилнэ.
Энэ асуудлаар Пентагоны анхны албан ёсны бичиг баримтын тоонд 1992 оны арванхоёрдугаар сарын 21-нд АНУ-ын Батлан хамгаалах яамнаас гаргасан “Мэдээллийн дайн” нэртэй удирдамж багтаж байгаа юм.
Хятад Улс 1980 оны сүүлээр мэдээллийн дайны өөрийн гэсэн үзэл баримтлалыг боловсруулж эхэлсэн.
1993 онд Штабын дарга нарын хорооноос гаргасан удирдамжид мэдээллийн дайныг явуулах үндсэн зарчмуудыг нийтэлсэн байв.
Сүүлд 1997 онд “мэдээллийн дайн”-ыг тодорхойлохдоо “Дотоодын мэдээ, мэдээллийн системийг хамгаалж, өрсөлдөгчийнхөө мэдээлэл, мэдээллийн тогтолцоонд нөлөөлөх замаар хэрэгжүүлдэг, мөн үндэсний стратегийн ашиг сонирхлын төлөө мэдээллийн тогтолцоог дээд шатанд хүргэхийн төлөө авч хэрэгжүүлж буй арга хэмжээ” гэсэн байдаг. Хятад Улс 1980 оны сүүлээр мэдээллийн дайны өөрийн гэсэн үзэл баримтлалыг боловсруулж эхэлсэн.
Мэдээллийн дайн гэсэн ойлголтод дор Хятад улсын баримталж байгаа стратеги бол мэдээллийн орон зайг эзэлж авах бүхий л арга хэмжээ /улс төр, эдийн засаг, соёл, технологийн гэх мэт/ гэж ойлгож болно. Тэгээд ч сүүлийн жилүүдэд Хятад АНУ-тай мэдээллийн талаар өрсөлдөх чадвараараа гайхамшигтай үр дүнд хүрсэн билээ”. Юун талаар яриад байгаа нь тов тодорхой эл номын хуудсын нэг буланд бид амьдарч байна.
ХХI зууны эрчтэй өрнөж байгаа мэдээллийн дайнаас монголчууд алхам ч хоцорсонгүй. Гэхдээ арай л бүдүүлэгдүү, бяд муутай оролцох аж. Тодруулбал, бодит мэдээллийг ашиглах биш хагас үнэн, хуурмаг мэдээллийг хэн сайн зохиож, олон нийтэд чадварлаг итгүүлснээрээ ялагч болно хэмээн уралдацгааж байгаа юм.
Шийдвэр гаргах эрхтэй, шийдвэр гаргах түвшинд ажилладаг дурын хүн хувийнхаа ашиг сонирхолд нийцсэн мэдээллээ ярилцлага хэлбэрээр өгөх ч юм уу, санаагаа твиттер, фэйсбүүк зэрэг олон нийтийн сүлжээгээр цацаж, хүмүүсийн дунд талцал үүсгэж байгаад асуудлаа өөрсдөдөө ашигтай шийдэхээр улайрдаг боллоо.
Хүн гэдэг амьтан мартамхай. Үүнийг нь улстөрчид, эрх барьж байгаа улс төрийн нам сайн мэдэх учраас өрөөндөө сууж байгаад гараагүй зарим шийдвэр, болоогүй үйл явдлыг бас хувийн чанартай хов живээ ч цацаж, эрх мэдлийн индрээ бат бөх байлгах аргыг эрэлхийлэх болсон нь үнэн. Мэдээллийн дайныг дэгдээж буй тэдэнд энэ дайныг хөгжөөх бүхэл бүтэн баг бий. Тэр баг олон нийтийн сүлжээнд ажиллаж хүмүүсийн сэтгэл зүйг тогтворгүй болгох, өөртөө итгүүлэх аргыг хэрэглэцгээдэг.
Сонгууль хаяанд ирсэн энэ өдрүүдэд ийм монголчилсон, жалга довын шинжтэй мэдээллийн дайны эрч улам идэвхжих болов. Дотооддоо ийм эмх замбараагүй, зөвхөн тус тусын ашиг сонирхолд нийцүүлж, дур зоргоороо мэдээллийн дайн өрнүүлдэг манайхан гадаад ертөнцөд ийм дайн өрнүүлэх тал дээр ёстой “сохор”.
Том гүрнүүд, том үндэстнүүд үндэсний эрх ашиг, ашиг сонирхлоо хамгаалахын тулд юуны өмнө дотоод мэдээлэлдээ хамгийн их анхаардаг бол Монголын эрх баригчид дотоод мэдээллээр хэдийг хүртэл өөр хоорондоо цусгүй дайн өрнүүлэх юм бүү мэд.
Харин алдагдсан мэдээллүүд ард түмнийг төөрөгдөлд оруулж байгаа бол цаашлаад олон улсын хэмжээнд Монгол Улсыг нүв нүцгэн “тамирчин” шиг харагдуулж байгаа нь эмгэнэлтэй.
Өнөөдөр манайд хэвлэл мэдээллийн 450 орчим хэрэгсэл үйл ажиллагаа явуулдаг гэсэн тоо бий.
Өнөөдөр манайд хэвлэл мэдээллийн 450 орчим хэрэгсэл үйл ажиллагаа явуулдаг гэсэн тоо бий.
Сонин, сэтгүүл, ТВ, радио, цахим хуудсаас бүрдсэн 450 орчим мэдээллийн хэрэгсэл өөр өөрийн үзэмжээр мэдээлэл дамжуулж байгаа. Дээр нь нийгмийн сүлжээ нэмэгдээд монголчууд хэдийнэ мэдээллийн дайнд төөрч жаахан хошин хэлбэл “сармагчин” төрх рүүгээ дөхөж яваа юм.
Өнөөдөр монголчуудын үзэл бодол, байр суурь, итгэл үнэмшил гадаад ертөнцийн өмнө нээлттэй, шатрын хөлөг дээрх шалдан ноён шиг хамгаалалтгүй зогсож байгаа.
Ард түмнээ ийм эмзэг болгоход мэдээж эрх мэдэл, албан тушаалын төлөө дайтаж, өөр хоорондоо жалга довын шинжтэй тус тусын ашиг сонирхолд нийцүүлсэн мэдээллийн дайн өрнүүлдэг улс төрийн хүрээнийхэн буруутай.
Ийм цагт тэдэнд эрх мэдлийн цулбуураас атгаж аваад удалгүй хагаралдаж, эцэст нь бараг бүгдээрээ цаг бусын үхлээр тэнгэрт хальсан өвөг дээдсийн гунигтай түүхийг сануулахад илүүдэхгүй биз ээ.
