"Гэр бүлийн хүчирхийлэл амжиргааны түвшин, хүйс, насаар нь ЯЛГАДАГГҮЙ"
Улаанбаатар хотын цагдаагийн газраас Нийслэлийн Засаг даргын Тамгын газартай хамтран гэр бүл, хүүхэд хамгаалал, сэтгэл зүй, сургалт, судалгааны чиглэлээр үйл ажиллагаа явуулдаг иргэний нийгмийн байгууллага болон ТББ-уудын төлөөллийг оролцуулсан уулзалтыг өнөөдөр МХО-нд зохион байгуулж байна.
П.Эрдэнэцэцэг: Иргэн бүрийн оролцоо чухал байна
"Өнөөдөр бид "Бүтэн хайрыг гэр бүлдээ" зорилтот аяныхаа хүрээнд гэр бүлийн болон хүүхдийг хүчирхийллээс хамгаалдаг ТББ-уудтай уулзалт зохион байгуулж байна.
Түүнчлэн 2016 онд тус аянаа улсын хэмжээнд өрнүүлж чадсанаар хөдөө орон нутагт болж байгаа гэмт хэргийг илрүүлэх, таслан зогсоох, урьдчилан сэргийлэх боломжтой болно.
Мөн өнгөрсөн жилээс эхлэн 107 гэсэн дугаарт /ямар ч утаснаас үнэ төлбөргүй/ хүчирхийллийн талаарх мэдээллийг авдаг болсон. Ийм дугаартай болсноор 2015 оны хүчирхийллийн гэмт хэргийн дуудлагын тоо 2014 онтой харьцуулахад 40 хувиар өссөн.
Статистик мэдээ:
Үүнээс үзэхэд хүмүүсийн гэр бүлийн хүчирхийллийн талаар мэдээлэл өгөх хандлага нь өөрчлөгдөж эхэлсэн гэсэн үг.
"Хөрш айлын эмэгтэй хүн орилж байна, хүүхэд уйлж байна" гэх зэрэг мэдээллүүдийг хүний хэрэг гэхгүйгээр 107 дугаарт мэдээлдэг болсон нь сайн хэрэг.
Эцэст нь хэлэхэд гэр бүлийн хүчирхийлэл амжиргааны түвшин, хүйс, насаар нь ЯЛГАДАГГҮЙ.
Яагаад гэвэл бүх түвшинд болдог асуудал учир. Тиймээс иргэн бүрийн ОРОЛЦОО чухал тул санаа зоволтгүй яаралтай МЭДЭЭЛЭЛ өгч байхыг хүсье" гэлээ.
Тус уулзалтад: Нийгмийн хөгжлийн асуудал хариуцсан орлогч Ц.Энхцэнгэл, ЦЕГ-ын Хүүхэд гэр бүлийн хүчирхийлэл, хүүхдийн эсрэг гэмт хэргээс урьдчилан сэргийлэх хэлтсийн дарга, дэд хурандаа П.Эрдэнэцэцэг болон холбогдох хүмүүсээс гадна "Монгол өрх" сэтгэл заслын холбоо, Монголын Эмэгтэйчүүдийн холбоо, Монголын хорих байгууллагын нөхөрлөл зэрэг нийт 30 гаруй ТББ-ын төлөөлөл оролцлоо.
