Боловсрол, шинжлэх ухааны салбарын ажилтнуудын цалин хөлсийг нэмэгдүүлэхтэй холбоотой шаардлагыг өнөөдөр Засгийн газарт хүргүүлсэн талаараа мэдээлэл хийлээ.
Боловсрол Шинжлэх Ухааны ҮЭХ-ны дарга Ж.Батзориг “2017 оны сүүлээр багш нар тэмцэл хийснээр Засгийн газраас тодорхой шийдвэрүүд гаргасан боловч одоог хүртэл бодит үр дүн гараагүй байна.
Боловсролын салбарт ажиллаж буй хүмүүсийн амьдрал өдөр ирэх тусам доройтож байгаа тул бид дараах таван шаардлагыг Засгийн газарт хүргүүлж байна. Бидний шаардлагыг хэрэгжүүлээгүй тохиолдолд ҮЭ байгууллагын хуулиар олгогдсон эрхийн дагуу тэмцлийн үйл ажиллагаагаа тавдугаар сарын 1-ээс эрчимжүүлнэ” гэлээ.
Тэрбээр Засгийн газарт хүргүүлж буй шаардлагаа уншиж танилцууллаа.
2017 онд багш нар болон ШУ-ы салбарынхан цалин хөлсөө нэмэгдүүлэх, бодит орлогоо нэмэгдүүлэх асуудлаар УИХ, Засгийн газарт удаа дараа шаардлага тавьж, ажил хаялт хүртэл зарлаж байсан. “Тухайн үед манай улс эдийн засгийн хямралтай байсан тул бид энэ асуудлыг хойшлуулсан. Харин энэхүү шаардлагаас хойш 3-4 сар цалин хөлс нэмэхгүй бол багш нар ахин ажил хаялт зарлаж, улмаар 2018-2019 оны хичээлийн эхлэхгүй ч байх магадлалтай” гэдгийг Шинжлэх ухааны хүрээлэнгийн ҮЭХ-ы дарга Т.Баясгалан хэллээ.
Сургуулийн өмнөх боловсрол, ерөнхий боловсролын салбарт ажилладаг хот болон орон нутгийн ажилтнууд “Бид уртасгасан цагаар өдөр бүр ачаалалтай ажилладаг тул өөрсдийн хөдөлмөрлөх нөхцөл байдлыг сайжруулах талаар тэмцэх ямар ч цаг байдаггүй. Тиймээс ҮЭХ-оороо дамжуулан энэхүү шаардлагыг хүргүүлж байна” гэдгээ илэрхийлээд шаардлагын хариуг 2018 оны дөрөвдүгээр сарын 30-ны дотор ирүүлээгүй тохиолдолд хуулийн хүрээнд тэмцлээ эрчимжүүлэхээ мэдэгдлээ.