LG компани хуйлдаг OLED TV үзүүлжээ

Лас Вегаст болж байгаа CES (Consumer Electronics Show) технологийн үзэсгэлэн дээр Өмнөд Солонгосын LG компани хуйлдаг телевиз үзүүлсэн байна.

65 инчийн 4K OLED телевиз нь ашиглаагүй үед дөрвөлжин хайрцганд хуйлагдсан байдалтай хадгалагддаг. Харин хэрэглэх бол хайрцагнаасаа дэлгэгдэн гарч ирэх юм.

Уян OLED дэлгэцний технологи ашигласан уг бүтээгдэхүүн харьцангуй овор багатай хайрцганд хуйлагддаг чадваараараа анхных болж байна.

Ийм телевиз хоёр төрлийн ач холбогдолтой. Нэгдүгээрт, өрөөнийх нь дотоод загвар, хэв маягт том телевиз зохицохгүй байгаа хүмүүс үүнийг хэрэглэж болох юм.

Хоёрдугаарт, зарим 16:9 стандарт харьцаанд нийцдэггүй дүрслэлтэй киног үзэхдээ дэлгэцний хэмжээнд тааруулж үзэж болох ажээ. Өөрөөр хэлбэл дүрсний дээд, доод хэсгийн хар орон зайг алга болгож болно гэсэн үг.

Уян OLED дэлгэцийг цаашдаа гар утсанд ашиглах тухай ид яригдаж байгаа билээ. Гэхдээ практик ач холбогдол нь ямар байхыг одоогоор тодорхой болгоогүй байна.

Эх сурвалж: Tech Insider