PLAYTIME FESTIVAL өөрсдийн түүхэн дэх оргил жилээ бүтээхээр зорьж байна

Азийн ТОП 5 хөгжмийн наадмуудын эгнээнд багтах зорилго бүхий уг фестивалийн түвшин бага багаар өсөж байгаа учир энэ жилийн "Lineup" буюу хөгжмийн хөтөлбөр Playtime фестивалийн түүхэн дэх хамгийн өндөр төсөвтэй нь болж байгаа аж. Тодруулбал өмнө жил нийт төсвийн зардлын 20-25 хувь нь уран бүтээлчдэд зарцуулагдаж байсан бол энэ жил 50 хувь болж өссөн байна.

Түүнчлэн 21 улсын 123 хамтлаг, уран бүтээлч уран бүтээлээ толилуулах бөгөөд энэ нь фестивалийн 24 жилийн түүхэн дэх хамгийн өргөн цар хүрээтэй Lineup болж байгаа аж.

Наадмын үндсэн тайзууд болох Playtime, The Bunkr, 989 Tent, Нааглихац, Grove, Fire тайзууд, мөн “La Vie En Rose”, “Waldo” асруудад олон улсын 31, дотоодын 92 хамтлаг, уран бүтээлч уран бүтээлээ толилуулах юм байна.

Амьд post-punk урсгалаар танигдсан Беларусын Molchat Doma
indie folk урсгалын алдарт Норвегийн “Kings of Convenience”
АНУ-ын dream pop урсгалыг төлөөлөх DIIV
Өмнөд Солонгосын indie rock хамтлаг Hyukoh
indie pop урсгалыг үндэслэгч Их Британи, Францын Stereolab зэрэг амьд хөгжмийн домог болсон уран бүтээлчид, мөн Хятадын Horse Radio , Fazi , Тайландын JPBS , Японы реппер Shing 02 , Италийн CSI зэрэг олон улсын томоохон уран бүтээлчид хүрэлцэн ирэх юм байна.

Францын Stereolab хамтлагийг Playtime-д авчрахын тул долоон жил хөөцөлдсөн бөгөөд хөгжмийн түүхэнд оруулсан хувь нэмэр болон дэлхийд хүлээн зөвшөөрөгдсөн талаасаа №1 онцлох хамтлаг юм гэв.

Орчин үеийн техно урсгалын нөлөө бүхий уран бүтээлч Rhom Omit, Испанийн электрон хөгжимчин Jasss, Германы техно DJ Helena Hauff, Детройт техно урсгалыг төлөөлөх DJ Stingray 313, мөн Jesse You нар оролцох юм байна.

Тодруулбал,

Тайз, орон зайн ерөнхий концепц дээр Японы архитектор, гэрэлтүүлгийн дизайнер, фестивалийн орон зайн найруулагч Jiro Endo болон түүний үүсгэн байгуулсан SOIHOUSE studio ажиллаж байгаа аж.

Тайзны дүрслэлийн шийдлүүд дээр Амстердам хотод төвтэй, уран бүтээлч Rene van Dijk-ийн үүсгэн байгуулсан rene.studio баг хамтран ажиллаж байгаа юм байна.

Техникийн гүйцэтгэл, системийн найдвартай ажиллагааг олон улсын туршлагатай системийн инженерүүд болон Томас болон Роберт де Вриес нар ханган ажиллах аж.

Ийнхүү Playtime Festival 2026 нь уран бүтээлчдийн бүрэлдэхүүнээс гадна продакшн, тайзны шийдэл, визуал орчны хувьд ч бүрэн утгаараа олон улсын түвшний фестиваль болох зорилгодоо хүрч байна гэдгийг зохион байгуулагчид онцлов.

"Хөгжмийн фестивалийн гол утга учрыг бид 24 жилийн турш бага багаар суралцсаар олон тайзтай байх шаардлагагүй, үзэгчдийнхээ тоонд таарсан, дуугаралт, визуал нь дэлхийн түвшний цөөн тайз байх ёстойг ойлгож, зохион байгуулалтаа тэр зүг рүү чиглүүлж байна.

Тэр тусмаа ивээн тэтгэгчдийн тайзыг цөөрүүлж талбайд аль болох зөвхөн фестивалийн уран бүтээлчдийн хөгжим явах ёстой гэх хэд хэдэн бодлогын өөрчлөлтийг хийлээ. Фестиваль алиалагч шиг байх албагүй. Үзэгчид хөгжмийн фестиваль болон уран бүтээлчдээ хүндлэн зорьж очиж үздэг.

Иймд хэт их тайз, хэт их уран бүтээлчдийг цөөлсөн. 2026 он бол Playtime фестивалийн балансаа олсон жил байна" гэв.

"Playtime наадмын нийт зардлын 50 хувийг ивээн тэтгэгчид санхүүжүүлдэг ба фестивалийн нийт өгч байгаа агуулгыг зөвхөн тасалбарын үнээр нөхнө гэвэл тасалбар илүү үнэтэй болох тооцоотой байдаг.

Тиймдээ ч Playtime наадмыг хамтдаа бүтээлцэж буй байгууллагуудынхаа дэмжлэгтэйгээр Азийн шилдэг фестиваль болох, гадаад уран бүтээлчдээ авчрах боломж бүрддэг" гэдгийг тэрбээр онцолсон юм. 

  Энэ жил үзэгчдэд зориулан 2 болон 3 өдрийн тасалбарын сонголтыг санал болгож байгаа нь хувь хүний цаг зав, сонирхолд нийцсэн илүү уян хатан оролцоог бүрдүүлж байгаа аж. Түүнчлэн, өмнө жилээс хэрэгжүүлээд буй олон улсын жишигт нийцсэн тасалбар баталгаажуулалтын системийг үргэлжлүүлэн ашигласнаар хуурамч тасалбарын эрсдэлийг бүрэн арилгаж, үзэгчдийн мэдээллийн аюулгүй байдлыг хамгаална гэдгийг онцоллоо.

 ​​​​​​​  Наадмын тасалбар Shoppy.mn-ээр борлуулагдаж буй бөгөөд одоогоор 20%-ийн хөнгөлөлттэй үнэтэйгээр борлуулагдаж байгаа юм байна. 

Тогтвортой хөгжлийн үнэт зүйлсийг түгээн ажилладаг фестивалийн хувьд наадмын үеэр гарч буй хог хаягдал, машины утаа зэрэг байгаль орчинд үзүүлж буй нөлөөгөө багасгахаар талбайдаа 60,000 орчим мод тариад байгаа аж.

Цаашдаа нийт 200,000 мод тарьснаар фестивалийн үеэр ялгарах CO2-г бууруулна гэсэн алсын хараатай байгаа юм байна.

Тиймдээ ч энэ жил үзэгчдэдээ машиндаа ганц, хоёулхнаа ирэхээс илүү найзуудаараа, олуулаа нэг машинд эсвэл фестивалийн автобус, UB Cab-ийн Alphard зэргээр зорчин ирж байгаль орчинд үзүүлэх сөрөг нөлөөг багасгахад хувь нэмрээ оруулахыг уриалж байгаа юм байна. Түүнчлэн аль болох гурван хоног байрлаж үзэхийг зөвлөв.

Мөн наадмын хүрээнд үүсэх хог хаягдлыг ангилан ялгаж, дахин боловсруулах тогтолцоог хэрэгжүүлэхийн зэрэгцээ олон дахин ашиглах боломжтой Reusable Cup хэрэглээг хэвшүүлснээр байгальд ээлтэй фестивалийн соёлыг бүрдүүлээд байгаа аж.