Цагаан сарын баярын өдрүүдэд нийтийн зорчигч тээврийн үйлчилгээ ямар байх талаар Нийтийн тээврийн газрын мэргэжилтэн Ц.Мягмарсүрэнгээс тодрууллаа.
-Өмнөх жилүүдэд “Нарантуул” зах руу иргэдэд үйлчлэх нийтийн тээвэр явж байсан. Энэ жил уг үйлчилгээг дахин явуулах уу?
-Нийслэлийн Засаг даргын А/74 захирамж гарсан. Уг захирамжтай холообоотойгоор авто машины улсын дугаарыг тэгш, сондгойгоор нь хязгаарлаж замын хөдөлгөөнд оролцуулж байгаа.
Нийтийн тээврүүд мэдээж цагийн хуваарийн дагуу явна.
Энэ ажлын хүрээнд ирэх сарын 1, 7, 8, 14, 15-ны өдрүүдэд нийтийн тээврийн хэрэгслүүд өмнө жилийх шиг “Нарантуул” олон улсын худалдааны төвийн чиглэлд үйлчилгээ үзүүлнэ.
-Иргэдэд үйлчлэх нийтийн тээврүүд хэдэн цэгээс явах вэ. Цагийн хуваарь нь гарсан уу?
-Сар шинийн баярыг угтаж “Нарантуул” олон улсын худалдааны төвийн чиглэлд автобусны буухиа үйлчилгээг 12 цэгээс явуулахаар болсон.
Уг үйлчилгээний нийтийн тээврүүд тус худалдааны төвийн урд хаалгаар хашаа руу нь ороод, хойд хаалгаар нь гарна. Харин “Нарантуул” худалдааны төвийн хойно байдаг ХӨСҮТ-ийн эцсийн буудал дээр очдог чиглэлүүд явдгаараа явна.
-“Нарантуул” олон улсын худалдааны төв рүү үйлчлэх 12 чиглэлийг тодруулаач?
-12 чиглэлийн хувьд Орбит, Нарангийн гол, Ханын материал, Баянхошуу, Нисэх, Яармаг, Дэнжийн мянга, Чингэлтэй, Бэлх, Шар хад, Улаан хуаран Тахилт /их багтаамжийн М:28, М:33, М:36, М:46 / гэсэн чиглэлээс шууд “Нарантуул” худалдааны төв рүү үйлчилгээ үзүүлэх 24 тээврийн хэрэгсэл байгаа.
Энэхүү үйлчилгээний талаар мэдээллийн хэрэгслүүдээр сурталчилгаа явагдаад эхэлнэ. Тиймээс иргэд мэдээллийг авч, ямар нэгэн хүндрэлгүйгээр үйлчлүүлэх боломжтой болно.
-Автобуснууд хэдэн цагийн зайтай явах төлөвлөгөөтэй байгаа вэ?
Өөрөөр хэлбэл, эдгээр цагуудад хотын зах руу тухайн тухайн эцсийн буудал руугаа явна. Эдгээр чиглэлүүдийг сонгох болсон шалтгаан нь тухайн чиглэлээс “Нарантуул” зах руу ямар нэгэн тээврийн үйлчилгээ байдаггүй гэдэг үүднээс сонгож авсан.
-Цаашид сар шинийн баяртай холбоотойгоор өөр ямар нэгэн өөрчлөлт хийж байгаа юу?
-Засаг даргын захирамжийн дагуу зарим нэг замын хөдөлгөөн зохион байгуулалтад өөрчлөлт орсон. Учир нь сар шинийн өмнө амралтын өдрүүдэд ихээхэн хэмжээний ачаалалтай болдог замд зохицуулалт хийгдсэн.
Тухайлбал, Чингэлтэй дүүргийн нутаг "Дэнжийн 1000"-ын авто замын хөдөлгөөнийг “Хүчит шонхор” худалдааны төвийн зүүн урд уулзвараас хойш үерийн далангийн уулзвар хүртэл урдаас хойш чиглэлд, үерийн далангаас зүүн тийш “Судалт төв”-ийн уулзвар хүртэлх авто замын хөдөлгөөнийг баруунаас зүүн чиглэлд өглөөний 08.00-17.00 цаг хүртэл нэг чигийн хөдөлгөөнд оруулж замын хөдөлгөөнийг зохион байгуулахаар болсон.