Энэ удаагийн “Чухал хүн” булангийнхаа ээлжит зочноор Монгол Улсын Хөдөлмөрийн баатар, Гавьяат агрономич Сэлэнгэ аймгийн Номгоны “Газрын ундраа” компанийн захирал Ш.Мардааныг урилаа. Түүний хувьд олон үе дамжсан тариаланч гэр бүлээс гаралтай нэгэн билээ. Ингээд түүнтэй хөөрөлдсөнөө хүргэж байна.
-Ярилцлагаа таны бага наснаас эхлэе гэж бодож байна. Ер нь уугуул гарал хаанхых уу. Аав, ээжийнхээ тухай сайхан дурсамж дэлгэвэл?
-Миний үндсэн захиргаа Ховд аймгийн Үенч сум. Манай удмын хүмүүс болох өвөө Магнай, аав Шарав нар маань тариаланч хүн байсан.
Манай аав мөн мужаан хүн л дээ. Жижигхэн биетэй. Үенч сумынхан аавыг хурдан хээр морьтой Шарав гэж дуудна.
Баруун Алтай Баянбүрдэд тариа тарьж, гэзэг усалгаа, цэнэг усалгаа, хар ус усалгааг хийж тариагаа тарьж хураана.
Ингэхдээ цан гэж шар шавраар шавж хийсэн талбайд морин тэрэг, чаргаар тариагаа аваачиж хураагаад адуугаар гишгүүлж цайруулаад салхи хүлээж байж, үр тариагаа цэвэрлэдэг байсан хүмүүс.
Би 6-7 настай хүүхэд тариа зөөж байснаа мэддэг юм. Үндсэндээ гэр бүлээрээ тариалан эрхэлж, илүү гарсан зүйлээ мал ахуйгаар борлуулж, амьдралаа залгуулж байсан гэхэд болно. Цагаан эрэг, Цагаан дүн гэдэг газарт тариалан эрхэлж, усыг шуудуу буюу бухаар урсгаж, үр тариагаа усална.
Миний хувьд 10 хүүхэдтэй айлын дээрээсээ хоёр дахь нь. Бага насаа эцэг, эхдээ тусалж өнгөрөөсөн дөө.
Намайг сургуульд орсноос хойш манай аав нэгдлийн барилга дээр ажиллаж байсан. Харин ээж маань барилгын туслах ажилчин хийнэ.
Долдугаар анги төгссөн жилээс эхлэн ээжийнхээ оронд ажил хийж, шавар шавхай ачина, зөөнө, зуурдаг ажил хийж эхэлсэн.
Миний хувьд долдугаар анги төгссөн жилээс эхлэн ээжийнхээ оронд ажил хийж, шавар шавхай ачина, зөөнө, зуурдаг ажил хийж эхэлсэн.
Энэ дашрамд нэг зүйлийг хэлэхэд, манай аав хурдан морьтой, сайн уяач хүн байсан гэж дээр хэлсэн дээ. Аавын минь хурдан хээр морь 33 насалж, үгүй болсон.
Тиймээс үүнийг билэгдэн Үенч сумын их насны морины уралдааныг морины байг байнга даадаг юм. Өөрөөр хэлбэл, эцгийнхээ нэр алдарыг олонд түгээж явах миний үүрэг шүү дээ.
Харин би анх Мардаан бус Баянхонгор гэдэг нэртэй байсан юм билээ. Аав маань Ховдын хорооны цэргийн зэвсгийн мастер хийдэг хүн байж байгаад аймгийн улстөрийн орлогчтой хил эргэж явах хойгуур нь би гарч, надад нэр өгч гэрчилгээ авсан байдаг юм билээ.
Харин аав ирээд Хилийн эргэлтээр явж байгаад дайралтад орж, түүнтэй хамт явсан улстөрийн орлогч Мардаан гэж казак буудуулаад нас барьсан учраас сайн нөхрийнхөө нэрийг өгсөн түүхтэй.
-Мэдээж хүүхэд байхад сургуульд сурах том зүйл байсан байх. Тэр дундаа таны үеийнхэнд. Хэдэн онд сургуульд орсон бэ?
-Миний үед хүүхдүүд есөн настай сургуульд ордог байлаа. Би найман настай буюу 1961 онд сургуульд орж билээ.
Учир нь манай эгч есөн нас хүрч сургуульд орох байсан ч ээж охиноо явуулахгүй гэж сумын орлогч даргатай маргалдаж, үүний улмаас Захиргааны арга хэмжээ авхуулахаар боллоо.
Тухайн үед Захиргааны арга хэмжээ гэдэг нь аймаар л юм байдаг байх гэж бодож, сумын орлогч даргад “Ах аа би эгчийнхээ оронд сургуульд орж болох уу” гэтэл тэр хүн зөвшөөрч сургуульд орж байлаа.
Аравдугаар ангиа төгсөхдөө ард түмэнд тус болох үүднээс Эмэгтэйчүүдийн эмч болох бодолтой байсан.
Тэгээд Үенч сумынхаа найман жилийн дунд сургуульд орж, дунд ангиа төгсөөд Ховдын Булган сумын 10 жилийг төгсч билээ. Миний сургуулийн багш нар их мундаг хүмүүс байлаа.
Найман жилийн сургуулийн багш Цэвлээ гэж хүн хичээл тараад намайг гэртээ аваачин хичээл давтуулна. Би тоондоо сайн ч Монгол хэлний хичээлд тааруу. Тэр хүний хувьд намайг юм сургах гэж чин сэтгэлээсээ хичээнэ.
Мөн 10 жилийн сургуулийн анги даасан багш маань Таванбогдын Баатарсайханы аав Цагаач хэмээх гавьяат багш байсан. Ингээд 10 дугаар анги төгсөхдөө их сайн сурлагатай хүүхэд төгсч байлаа.
Аравдугаар ангиа төгсөхдөө ард түмэнд тус болох үүднээс Эмэгтэйчүүдийн эмч болох бодолтой байсан. Гэтэл конкурс өгөх болтол одоогоор ЭМШУИС, ХААИС-ийн агрономичийн анги нэг дэвсгэр буюу хими суурилсан шалгалттай байсан юм билээ.
Конкурсдэж би дээрээсээ хоёрт жагсч, эмэгтэйчүүдийн эмчийн хуваарь авах гэтэл тийм анги байхгүй учраас тариа ногоонд ойрхон, үе уламжлан газар тариалан эрхэлж өссөн сэтгэлд ойр учраас агрономийн анги сонгосон.
Үүнээс гадна намайг 6-7 дугаар ангид байхад манай нэгдлийн агрономич Улаанбаатар гэдэг ах мотоцикиль унаад л энд тэнд очиж хүн загнаад явах нь аятайхан харагддаг байсан учраас ийм дарга болно гэж бодсноос үүдэн ХААИС-ийн агрономийн ангид суралцан 1979 онд төгсч байлаа.
-Одоо бол танай ангийхан бүгд газар тариалангийн салбар ажиллаж байгаа биз?
-Байлгүй яах вэ. Манай ангийн Г.Цагааншүхэрт, Д.Алимаа нар хөдөө аж ахуйн шинжлэх ухааны доктор, пропесср болсон. Мөн манай гэр бүлийн хүн надтай нэг ангид байсан. Ягаанцэцэг маань агрономич, газар тариалангийн салбарт шинэ сорт турших ажлыг олон жил хийсэн. Хөдөө аж ахуйн тэргүүний ажилтан, Атарчдын алтан медальтай, Алтан гадас одонтой, Хөдөө аж ахуйн ухааны магистер хамгаалсан эмэгтэй.
Мөн Ж.Бадрах гэж газар тариалангийн салбарт олон жил ажиллсан гээд манай ангийн 16 хүүхдээс Хөдөлмөрийн баатар нэг, гавьяат агрономич нэг, Хөдөө аж ахуйн ухааны доктор хоёр, Алтан гадас, Хөдөлмөрийн гавьяаны улаан тугийн одонтой дөрөв, 16-уулаа Хөдөө аж ахуйн тэргүүний ажилтан, 13 нь энэ чиглэлээрээ магистер хамгаалсан байдаг. Үүнийг би ангийн багштай холбоотой гэж бас боддог.
ХААИС-ийн анхны доктор, ангийн багш С.Ичинхорлоо гэж их мундаг хүн байсан. Энэ багш ХААИС-д 50 гаруй жил багшлахдаа ганцхан анги дааж төгсгөсөн нь манай анги. Тийм ч учраас бид маш сайн мэргэжилтэн болж төгсч байж.
Оюутан байхад хөгжилтэй зүйл их тохиолдоно. Намрын дайчилгааны ажлаар Зүүнхараагийн сангийн аж ахуйд ажиллана. Тэгтэл буух болчихсон байхад 60 орчим тонн төмс гараар түүж ялгах даалгавар өгдөг юм байна.
Тухайн үед гараар ялгавал дуусахгүй шүү дээ. Тэгээд нуруулдсан төмсийг хүрзээр юм уу хувингаар хутгаж дээшээ шидхэд сайн төмс нь өнхрөөд ирэнгүүт хувингаа тосч дүүргээд үд хүрэхэд ангилж дуусгаж байлаа. Үүнийг харсан багш гайхаад ямар хурдан ялгасныг асуутал манай нэг оюутан “Мардаанчилсан” юм аа гэж билээ. Энэ мэт хөгжтэй, хөгжилтэй олон зүйл тохиолдоно.
-Их сургуулиа төгсөөд ажил амьдарлын гарааг хаанаас эхэлж байв?
-Миний хувьд Ховд аймгийнх. Харин эхнэр маань Архангайн гаралтай ч Төв аймгийн Борнуурт сууршсан айл. Тиймээс бид хоёр ярилцаад аль алиныхаа нутагт суухгүй гээд Монгол Улсын тариалангийн 60-70 хувийг эзэлдэг Сэлэнгэ аймагт суухаар болсон. Өөрөөр хэлбэл, ХААИС-ийг агрономичоор төгссөн хоёр хүнд ажил олдоно, энэ чиглэлээр хүчээ үзэхээр Сэлэнгийн Номгоны сангийн аж ахуй дөнгөж байгуулагдаж байхад ирж байлаа.
Анх үрийн агрономийн сангийн аж ахуйд томлигдож ирээд хоёр жил ажиллаж 1981 онд ерөнхий агрономич болсон. Түүнээс хойш тасралтгүй 20 гаруй жил энэ сангийн аж ахуйн агрономич хийсэн дээ. Тэгээд 1990 оны эхээр Монгол Улс зах зээлийн нийгэмд шилжин бужигнаж, газар тариалангийн сор болсон хүмүүс үүргэвч үүрээд ганзгын найманд явж, энэ салбар эзэнгүйрсэн гэж хэлж болно.
Тухайн үед манай улс 600 мянган га-д үр тариа тарьж байсан бол 1990 оны эхээр 200-300 мянган га болж буурсан. 1992 оны үед Сэлэнгийн Цагаантолгойн сангийн аж ахуйд хаврын тариалалтын зөвлөгөөн болсон.
Тухайн үед Ерөнхий сайд Д.Бямбасүрэн, Шадар сайд Да.Ганболд байсан юм. Энэ зөвлөгөөнд Да.Ганболд ирж, газар тариалангийн салбарыг хэрхэн сэргээх талаар ярьж, тухайн үедээ тэрбээр Канадын нэг фермерыг дагуулж ирсэн юм. Тэр хүн олон зуун жил эцэг өвгөдөөс уламжлан ирсэн газар тариаланг хөгжүүлж ирсэн хүн байсан.
Тиймээс уулзалтын үеэр тэр канадтай уулзаж, олон зуун жил үе уламжлан тариалангийн аж ахуйг авч явж байгаа арга зөв юм байна гэж бодон үүнийг Монголын газар тариаланд нэвтрүүлэх шийдэлд хүрсэн. 20 гаруй жил газар тариалантай холбогдож явсан учраас үүнийг хийж чадна гэж бодсон ч Сангийн аж ахуйгаас намайг тийм амар тавьж явуулахгүйг мэдэж байсан юм.
Тийм учраас фермэр канадаар Шадар сайд Да.Ганболдод хэлүүлж, Мардаан гэх энэ залууг фермерийн аж ахуй эрхлэх боломж олгож, 500 га-г өгөх талаар саналаа ярьсан юм. Хурал дээр Мардааныг тусад нь гаргаж, фермерийн аж ахуй эрхлүүлэх санал гарсан ч сангийн аж ахуйн дарга эсэргүүцсэн. Харин хурал удирдагчид чухал ажил хийх гэж байхад хорьж болохгүй гэж шүүмжилж, намайг сангийн аж ахуйдаа хавар хүртэл тариа тариад ажлаасаа гарах чиглэл өгсөн.
-Тэгээд л хувийн ажил руугаа орчихсон уу?
-Ингээд 500 га газар авч хоёр троктарын жолооч, нэг туслах ажилтан авч тэднийг тусад нь гаргаад, сангийн аж ахуйд ажиллах хугацаандаа өөрийн зав чөлөөгөөр эргэж тойрдог байсан.
Ингэж явсаар хавар болж, тариаланч дуусч уранш бэлтгэх ажил эхэлж, штаб хуралдсан юм. Гэтэл намайг явуулдаггүй дээ. Тиймээс штаб хуралдах үеэр тухайн үеэд бригадын дарга хийж байсан Бадарч, Бямбасүрэн гэдэг маш мундаг хүмүүсээр үг дайлаа.
Ямар ч сангийн аж ахуйн дарга энэ хоёрын үгийг авна. Тиймээс тэр хоёртой хор найруулж, өөрийгөө ажил хийхгүй байна гэж муулуулсан, ажлаасаа гарч байсан түүхтэй.
Тэгээд одоогийн энэ компаниа байгуулж, тэр үед 57 мянган төгрөгийн үндсэн хөрөнгө болох гурван ширхэг Силк, нэг 150 троктар, өөрийн унаж байсан пургон машиныг авч байлаа. Тэр үед энэ их мөнгө өө. Энэ мөнгийг л олж өгч байж сангийн аж ахуйгаас гарна.
Монголын тариалангийн салбарын гарцаагүй хэрэгтэй зүйл уринш гээд байгаа юм.
Гэхдээ тухайн үед дээрх эд хөрөнгийг ягаан тасалбараар авах ёстой байсан. Ингээд л өөрийн ах дүүгийн тасалбарыг цуглуулсан ч хүрээгүй.
Эхнэр бид хоёр сар бүр 800-1000 төгрөгийн цалин авна. Үүнийгээ цуглуулаад 10 гаруй мянган төгрөгтэй болчихсон байсан.
Тэгээд л үүнийгээ аваад Улаанбаатарт ирж зах дээрээс ягаан тасалбар цуглуулж, сангийн аж ахуйд өгч компаниа байгуулж байсан. 1992 оны намар 500 га газрыг авч үүний 300 га-д тариа тарьж, 200 га-д уранш хийсэн. Гэтэл энэ үед газрыг маш муу арчилж байсныг мэдэж, үүнийг сайжруулах ажлыг хийж билээ.
Энэ мэт олон саад бэрхшээлийг даваж, манай компани өнөөдөр 2500 га эргэлтийн талбайтай, жилдээ 1300 орчим га газарт тариалалт хийж, нэг тэрбум төгрөгийн борлуулалт хийдэг аж ахуй нэгж болж дээ.
1994 онд, 2001, 2004 онд Монгол Улсын ургацын аварга хамт олон болсон. Манай компанийн нэг га-гийн дундаж ургац 15.4 центр. Тариалангийн үйлдвэрлэлийн гол зүйл нь уринш боловсруулалт. Ингэж байж л бид ургацтай байх үгүйгээ ярих юм. Тэр утгаараа Монголын тариалангийн салбарын гарцаагүй хэрэгтэй зүйл уринш гээд байгаа юм.
-Таны гэр бүлийн хүн та хоёр агрономич. Тиймээс уринш хийх тал дээр их анхаарна биз?
-Манай Номгоны газар нутагт уринш 40-өөс доош хувь руу орж болохгүй. Энэ хувьд хүрвэл ургац алдана л гэсэн үг. Бид шинжлэх ухаан технологийн дэвшил руу явж, тэг эрдэнэшүүлэлтийг хийхээр зорьж байна. Тэг эрдэнэшүүлэлтийн эцсийн зорилго талбайг сүрлэн хучилттай болгох.
Тариалангийн талбайг 5-6 см зузаан сүрлэн хучилттай болговол цаг уурийн өөрчлөлт хүчтэй мэдрэгдэж байгаа энэ үед ганц аврах гарц ч гэж хэлж болно. Өөрөөр хэлбэл, ган гачиг болсон үед талбайг чийгшилгүй болохоос хамгаалах гол зүйл.
Манайд тариалангийн талбайг хучих сүрэл, техник технологи нь байсан ч үүнийг мал идээд байлгахгүй байна. Миний хувьд 250 га газрыг бүтэн торон хашаатай болгож сүрлэн хучилттай болгох гэсэн ч торыг нь таслаад л малаа оруулчих юм.
-Газар тариалангийн бүс нутагт малчин тариаланч хоёрын дунд ангал үүсч эхлээд байна. Үүнийг хэрхэн зохицуулах ёстой юм бол?
-Энд төрийн бодлого дутаж байна л гэж бодож байгаа. Тиймээс ядаж газар тариалангийн бүс нутагт мал аж ахуйн салбарын асуудлыг шийдмээр байгаа юм. Энэ талаар Сэлэнгийн тариаланчид төр засагт хандсан.
Тодруулбал, Сэлэнгэ, Төв аймгийн Угтаал, Жаргалант, Залуучууд гэх мэт тариалан эрхлэдэг гол нутагт суурин малалгаатай мал аж ахуй эрхлэх буюу бэлчээрийн малаас салгах саналыг хүргүүлээд байгаа. Үнэхээр энэ бүс нутагт малчин өрх амьдармаар байгаа бол зөвхөн суурин мал аж ахуй эрхлэх. Ингэж байж л Монголын тариаланг аврах гарц болно гэсэн асуудлыг тавьдаг ч шийд гарахгүй байна. Үүнийг шийдэхгүй бол бид цаашид тариагүй болно.
-Газар тариалангийн салбарт 30 гаруй жил ажиллаж байгаа хүний хувьд тэр дундаа таны эхнэр энэ салбарт шинэ сорт турших ажлыг олон жил хийсэн хүн. Тиймээс дээрх хугацаанд Монголын нутагт хэчнээн нэр төрлийн сортыг нутагшуулав?
-Монголын газар тариалан 1980 оны сүүлээр оргил үедээ тулсан. Тэр үед бид илүү гарсан тариагаа анх удаа гадагшаа гаргаж байлаа шүү дээ. Харин зах зээлийн эхэн үед буюу 1990 оны эхээр уналтад орж энэ үе 2000 он хүртэл үргэлжилсэн.
2005-2006 онд улсын хэмжээнд 120-130 га-д тариалалт хийж, цөөхөн хэдэн компани үйл ажиллагаа явуулж ямар ч зовлонгүй улаанбуудайг борлуулдаг байсан.
Харин 2008 онд Засгийн газраас Атарын гуравдугаар аяныг хэрэгжүүлж эхэлснээр газар тариалангийн салбар хөгжсөн. Төр засгаас дэмжиж, тариаланчдыг энэ чиглэлийн зээлд хамруулснаар энэ салбар сэргэж ирсэн. Улаанбуудайд урамшуулал өгдөг асуудлыг 2010 оны үед шийдсэн нь их нөлөөлөл болсон.
Өөрөөр хэлбэл, хөрөнгөтэй, мөнгөтэй бизнесмэнүүд энэ салбарт орж ирснээр улсын хэмжээнд 450 орчим мянган га-д үр тариа тариалж байгаа нь хүн амыг талх тариа, хүнсээр хангахад хангалттай гэж боддог юм. Харин сорт сорилтын санг Монгол Улсад бүсчилсэн байдлаар байгуулсан байдаг.
Миний хувьд Дархан 34 сортыг олон жил тариалсан. Үүнээс гадна олон төрлийн сортыг тарьж турших, тарьсан даа. Яг одоогоор Сэлэнгэ сортыг тарьж байна. Цаашид гандалт хуурайшилтын үе давтамж ихэсч байгаа үед монгол эрдэмтдийн гаргасан сортуудыг тарих нь зүйтэй байгаа юм. Ер нь сорт сорилтын эрдэм шинжилгээний нэгж байгууллага байх ёстой. Энэ байхгүйгээр хүн бүр гаднаас дураараа сорт оруулж ирээд байвал их эрсдэл л дагуулна.
-Намрын намарт нэг зовлон гарч ирэх юм. Гурил үйлдвэрлэгчид нь тарьсан будааны үнийг унагах гэсэн оролдох. Өөрөөр хэлбэл, талх хийхэд цавуулаг нь хүрэхгүй гэх мэтээр Монголын хөрсөнд ургуулсан тариа будааг их голох болж. Үүний эсрэг тариаланчид тэмцэнэ?
-Ерөөсөө Монголд ч бай дэлхийд тарианы гол үзүүлэлт нь цавуулаг байдаг. Цавуулгаас хамаарч ямар гурил гарах, ямар талх, нарийн боов гарах нь шалтгаалж байдаг.
Тарианы нойтон цавуулаг дэлхийн бүс бүслүүрээр өөр өөр байдаг. Ингээд үзэхээр нойтон цавуулга хамгийн ихтэй тогтдог бүс бүслүүрт Монголын тариалан ордог.
Гэтэл сүүлийн жилүүдэд тарианы цавуулаг бага байна гэх шүүмжлэл их гарах болсон. Яах вэ, зарим газар үнэхээр бага гарч болно.
Монголд ч бай дэлхийд тарианы гол үзүүлэлт нь цавуулаг байдаг.
Өөрийн компанийн энэ жил тарьсан тарианы цавуулгаар жишээ авахад, доод тал нь 28 хувьтай дээд тал нь 33 хувьтай байгаа юм. Харин би яг энэ будааг Улаанбаатар гурилд өгөхөөр 24 хувийн цавуулагтай болж гарах.
Дээр ярьсандаа, манай эхнэр сорт сорилтын эрхлэгч агрономич гэж. Энэ хүн туршсан сортынхоо цавуулгаас эхлээд бүх зүйлийг шинжилж тодорхойлж байдаг. Өөрөөр хэлбэл, мэргэжлийн хүн шүү дээ.
Тийм учраас би өөрийн будаанд итгэлтэй байдаг. Яах вэ цавуулаг гэдэг хүний нүдэнд харагдаж гарт баригддаггүй учраас гурил үйлдвэрлэгчид үнэ буулгах тал дээр их анхаарч байна. Өөрөөр хэлбэл, тэд цавуулгаар нь үнэ тогтоож байгаа юм. Нэг талаар тэдний хувийн эрх ашиг учраас үүнд тааруулж, цавуулгийг өөрийнхөөр тогтоож болж байгаа юм.
Ер нь цавуулаг угаана гэдэг нь маш нарийн технологи. Нэг дээжийн цавуулгийг 40-50 минут угааж байж гаргадаг. Нэг дээжийг 50 минут угаана гэвэл хоногт 20 гаруй машины дээж угаана гэсэн үг.
Гэтэл манайхан хоног 60-70 машины дээж угааж байгаагаас үүдэн цавуулаг худлаа гарч байгаа юм. Яах вэ тариаланчдаас хамаарч цавуулаг буурдаг зүйл бий ч үүнийг тэд анхаарч ажиллаж байгаа.
-Сайн цавуулагтай буудай тарихын тулд хөрс сайн байх ёстой болов уу. Тиймээс хөрсийг үржил шимтэй болгох талаар ямар ажил хийж байна вэ?
-Бид өнөөдрийг харж болохгүй. Дараа дараагийн үедээ энэ газрыг эзэмшүүлнэ. Тиймээс газрыг зөв эдэлж байвал хөрсний үржил шим үгүй болохгүй. Хөрсний үржил шимийг сайжруулах талаар олон арга бий.
-Та хэдэн хүүхэдтэй вэ. Таны энэ ажлыг мэдээж өвлөн авахаар суралцаж байгаа байлгүй?
-Манайх таван хүүхэдтэй. Том хүү ХААИС-ийн агрономийн ангийг төгссөн. Дажгүй агрономич шүү. Харин бага нь ХААИС-ийн инжнерийн ангийг төгссөн. Техникийн наана цааныг гадарлах болсон ч инженер болох арай л болоогүй. Гэхдээ бидэнд их тус дэм болж, хамтраад ажиллаад л байна.
-Мардаан гэдэг хүн газар тариалангийн салбарт олон жил үр бүтээлтэй ажиллаж. Төрийн хайр хишгийг ч хүртэж яваа шүү дээ. Энэ талаар яриагаа үргэлжлүүлье?
-2006 онд Улс тунхагласны баяраар Монгол Улсын гавьяат агрономич болсон. Миний хувьд өмнө нь гавьяат агрономичид хоёр удаа тодорхойлогдсон ч нэг л болоогүй. Тэгсэн 2006 оны тэр жил манай аймаг сум, тэр дундаа энэ чиглэлээр үйл ажиллагаа явуулдаг компанийн дарга нарын гарын үсэгтэй тодорхойлт явуулсан юм билээ.
Түүнийг нь би мэдээгүй. Тэгээд тэр жил Улс тунхагласны баярын өмнөхөн Дархан орох гээд явж байтал утас дуугаарч манай аймгийн ИТХ-ын дарга ярьж, хувцас хунараа бэлдээд хотод яаман дээр хүрээд ир гэсэн.
Тэгээд л очиж гавьяатын тэмдгээ гардсан даа. Тэр үед зорилгоо биелүүлчихлээ л гэж бодож байлаа. Яагаад ингэж бодсон гэхээр би ангийнхаа төгсөлтийн баярын дараа хотод байх ангийнхаа хүүхдүүдтэй уулзсан юм.
Тэр үед эхнэр бид хоёр Монголын газар тариалангийн гол бүс нутаг Сэлэнгэд очино. Тэнд очоод Монгол Улсын гавьяат агрономич гэдэг цолыг авна гэж ангийхандаа амалж байсан. Тэр зорилгодоо хүрэх гэж их зүтгэсэн. Тэгээд л нөхдүүдтэйгээ уулзахдаа нүүр бардам болсон.
Дэлхийн дулаарал хавраас хаварт мэдрэгдэж байна.
-Гавьяат болоод удаагүй 2009 онд та Хөдөлмөрийн баатар болсон шүү дээ. Баатар болно гэдгээ яаж мэдэж байв?
-Тэр их санаанд оромгүй хөгтэй зүйл болж билээ /инээв/. Мөн л Улс тунхагласны баярын өдөр Баатарын цолоо зүүж байсан. Манай гэр бүлийнхэн тухайн үед Улс тунхагласны баярыг миний төрсөн өдөр гэж тэмдэглэдэг байсан. Тэгээд баяр тэмдэглэнэ гэж бэлдэж байсан үе. Тухайн үед утсаар ярих хэрэг гартал утасны эрх нь хаагдчихсан байдаг юм байна. Тэр үед Дархан орж, эрхийг нь сэргээлгэнэ.
Ингээд явж байтал Дархан, Эрдэнэтийн гурвалжингийн уулзвар дээр цагдаа байж, намайг зогсоогоод хаашаа явж байгааг асууж, “Сэлэнгэ аймгийн дарга Ж.Эрдэнэбат ярьсан. Таныг утасны эрхээ сэргээлгээд шууд над руу ярь гэж хэлүүсэн” гэдэг юм байна. Ингээд утсаа цэнэглүүлээд ярих гэтэл эрх нь хоёр цагийн дараа нээгдэнэ гэдэг юм байна. Тэгээд л Мобикомын хүний утсыг гуйж аймгийн Засаг даргатай ярьтал “Та хаа хүрэх гэж байна.
Ажлаа амжуулаад, хоол ундаа сайн идээд Капитрон банкинд байж бай” гээд л утсаа тасалчихлаа. Би ч хоол ундаа сайн идээрэй гэхээр их гайхлаа. Яг тухайн үед Тариалан эрхлэлтийг дэмжих сангийн гүйцэтгэх захирал Ч.Пэрэнлэй гэх мэт хүмүүс асуудалд орчихсон байсан. Тэгээд л Пэрэнлэй намайг чирчихлээ ухааны юм бодоод хоол хоолой дээгүүр давахгүй банкны үүдэнд хүлээлээ дээ.
Бас тэр зуур намайг гавьяат болохоор л цагдаа биш аймгийн дарга баривчлах гэж байгаа юм байна гэж бодогдоод л суулаа. Тэгж байх зуур утас ашиглалтад орж, Капитрон банкны захирал хүү надруу залгаад “Танд баяр хүргэе” гээд утсаа салгачихлаа. Ингээд нэг уужирч ямар ч байсан баригдахгүй юм байна гэж бодож байтал манай гэр бүлийхэн нэг их гоё болоод л миний хойноос бөөнөөрөө ороод ирлээ.
Тэгтэл том хүү “Аав та Хөдөлмөрийн баатар болох гэж байгаа юм байна. Одоо хот явна” гэж хэлэхэд би дотроо “Хөдөлмөрийн баатар ч биш байх, Сүхбаатарын одон гардуулах нь” гэж бодож билээ. Тэр үед ХХААХҮ-ийн сайд Т.Бадамжунай мөн баатар болсныг минь дуулгаж, Ерөнхийлөгч Ц.Элбэгдоржоос энгэртээ тэмдгээ зүүгээд л итгэж билээ.
Тэр үед аав, ээжийгээ бодохоос гадна газар шороондоо баярладаг юм билээ. Төрийн энэ том шагнал нэг хүний энгэрт багтана гэдэг их хувь заяа. Нөгөө талаар алдаа гаргах эрхгүй болж, том хариуцлага хүлээсэн. Энэ ч үүднээс өнгөрсөн жил Сэлэнгийн бүх сумдаар явж, газар тариалангийн талаар хэсэг хүмүүстэй хамт сургалт явууллаа.
-Бүх сумдаар тойрч байх үед Сэлэнгэ аймаг цаашлаад Монгол Улсын газар тариалангийн салбарын хөгжлийг харж л байсан байх?
-Ер нь Сэлэнгэ аймаг бол Монголын газар тариалангийн зүрх нь. Сэлэнгэ аймаг тариалангүй бол Монголын ард түмэн өлсөх тухай яригдана.
Тиймээс энэ аймгийн газар тариалангийн нутгийг элгэдэл хорогдлоос хамгаалах, мал аж ахуйгаас тусгаарлах, сүрлэн хучилгатай тариаланд шилжүүлж байж ирээдүй хойч үеийг талхтай тариатай байлгана.
Сэлэнгэ аймаг бол Монголын газар тариалангийн зүрх нь.
Тэгээгүй тохиолдолд ер нь тариалангийн салбарт асуудал үүснэ. Дэлхийн дулаарал хавраас хаварт мэдрэгдэж байна. Бэлчээрийн зэрлэг ургамлын тоо эрс багасч. Тийм учраас Сэлэнгэ гэхгүй Монголын тариаланчдын гарах гарц нь сүрлэн хучилттай тариалан.
-Ярилцлагын төгсгөлд Ягаанцэцэг гэх эмэгтэй миний хажууд байгаагүй бол энэ амжилтад хүрэх байсан болов уу гэж бодох юм уу?
-Бодолгүй яах вэ. Манай хүн чинь манай ангийн онц сурлагатан. Улсын сорт судлалын салбарын эрхлэгч байхдаа ч маш сайн ажиллаж байсан. Ер нь бол үр хүүхдүүдийг хүний дайтай өсгөж хүмүүжилсэн нь бүгд Ягаанцэцэгийн гавьяа. Мөн намайг энэ дайтай явахад эхнэрийн минь гавьяа шүү дээ. Тийм ч учраас ханьдаа баярлаж явдаг.