“LAND-500”-тай Шадар сайдыг мөрдсөн гэх шуугианы хариу
Тэгвэл өчигдөр Ерөнхий сайд Ж.Эрдэнэбат иргэний хувиар Цагдаагийн ерөнхий газарт хандан гомдол гаргалаа. Энэхүү гомдлыг сошиал ертөнц, мөн хэвлэлээр тархсан “Ерөнхий сайд Ж.Эрдэнэбат Шадар сайд У.Хүрэлсүхийн араас сүүл тавьжээ” гэсэн мэдээлэл, мөн бичлэгтэй холбогдуулж тавьсан байна.
Үнэндээ хамгаалалтын албанд ажиллаад, бас ч үгүй хэн нэгнийг мөрдөж байгаа хүн ядаж л машины маркийг ийн буруу хэлээд сууж байна ч гэж юу байх вэ гэдгийг олон нийт гадарлахтайгаа болсон гэдгийг энэхүү “зохиол”-ыг туурвигчид мартсан бололтой. Харин Ерөнхий сайд Ж.Эрдэнэбат Цагдаагийн ерөнхий газарт хандсан гомдолдоо “2017 оны наймдугаар сарын 2-ны өдрөөс олон нийтийн мэдээллийн хэрэгсэл, сайтуудыг ашиглан миний биеийг зохион байгуулалттайгаар Монгол Улсын Шадар сайд У.Хүрэлсүхийг танхайн гэмт хэрэг үйлдсэн мэтээр харагдуулах зорилготой ажиллагааг бусдад захиалга өгч, гүйцэтгүүлсэн мэт дүрс дуу бүхий бичлэгийг тараасан байна.
Миний ажил хэргийн болоод хувь хүний нэр төр алдар хүндийг олон нийтэд гутаан доромжлох зорилготой энэхүү үйл ажиллагаа нь тухайн бичлэгийн зохиомол байдлаар хязгаарлагдсан, эсхүл үнэхээр дүрс бичлэгт нэр дурдагдсан нэр бүхий хүмүүс болох н.Золбаяр, н.Энхмэнд гэх хүмүүсийн оролцоотойгоор хийгдсэн бодитой зохион байгуулалттай ажиллагаа юу гэдэг асуудал, түүний үнэн мөнийг олж тогтоох нь чухал байна.
Иймд дараах асуудлыг шалгуулах хүсэлтэй байна.
- Уг бичлэгийг зохион байгуулалттай урьдаас төлөвлөж, найруулж монтаж дуу оруулалт тайлбар бүхий зохиомжилсон нь нэгэнт тодорхой байна. Иймд дүрс бичлэгийг хэний захиалгаар хийсэн болох.
- Дүрс бичлэгт дурдагдсан үйл явдал үнэхээр болсон эсэх, үнэхээр дээрх зохион байгуулалт бүхий ажиллагаа явагдсан бол үүнийг хэний захиалга, хүсэлтээр гүйцэтгэсэн болох. Ямар учраас миний биеийг хамаатуулсан болох зэргийг богино хугацаанд нэг мөр шалгаж тогтоолгож өгнө үү" гэжээ.
