Үндсэн Хуулийг өөрчлөх санал асуулгад оролцогчдыг сонгосон аргачлалаа тайлбарлалаа
Төрийн Байгуулалтын Байнгын Хороо, Үндэсний Статистикийн Хорооноос Зөвлөлдөх санал асуулгын түүвэр судалгааны аргачлалтай холбогдох асуудлаар өнөөдөр мэдээлэл хийлээ.
Санал асуулгын I үе шатад 1,570 иргэнийг санамсаргүй түүврийн аргаар сонгон авч, сонгогдсон иргэдээс санал асуулгыг авч эхэлжээ.
"Өчигдөрөөс судлаачид 1,570 иргэнд хандан, судалгааны мэдээлэл цуглуулалтыг хийж эхэлсэн"
Үндэсний Статистикийн Хорооны Ахлах статистикч Ш.Ариунболд “Зөвлөлдөх санал асуулгад ҮСХ хуулиар хүлээсэн үүргийнхээ дагуу аргачлал, арга зүй, мэргэжлийн удирдлагаар ханган, мэдээлэл цуглуулалтын үндсэн ажлыг хариуцаж байна.
Судалгаанд 2016 оны байдлаарх 18 насанд хүрсэн хоёр сая гаруй Монгол Улсын иргэнийг оролцуулж, гурван үе шаттайгаар судалгаа хийсэн. Түүврийн мэдээлэл цуглуулалтын үндсэн нэгж өрх юм.
Түүврийн хэмжээг 1,570 гэж тогтоосны дараа үүнийгээ бүх аймаг, дүүргийн хэмжээнд хуваарилсан.
Энэ нь хүн ам ихтэй аймаг, дүүрэгт олон, хүн ам багатай аймаг, дүүрэгт бага ногдох гэсэн пропорцтой. Мэдээж бүх аймаг, дүүрэгт түүвэрлэлт хийхэд компьютер програмчлал, санамсаргүй түүврийн аргачлалаар ашигласан байгаа.
Өчигдөр оройноос судлаачид 1,570 иргэнд хандан судалгааныхаа мэдээлэл цуглуулалтыг хийгээд эхэлсэн байна” хэмээн тайлбарлалаа.
Түүврийн II үе шат: Сонгогдсон баг, дүүргээс санамсаргүй түүврийн аргыг ашиглан 10 өрхийг сонгосон.
"Зөвлөлдөх санал асуулгаар маш зөв шийдвэрүүд гардаг"
МБШТ Гандантэгчэнлин хийдийн тэргүүн хамба лам Д.Чойжамц “Бид дээд шатны албан тушаалтнуудыг Үндсэн хуулийн зохистой асуудал оруулж чадаж байгаа эсэх болон 1,570 хүн цаашлаад 750 хүнийг чиглүүлэх гэсэн хоёр хэсэгт ажиглалт хийнэ.
Зөвлөлдөх санал асуулгаар маш зөв шийдвэрүүд гардаг. Ард иргэд өнөөдөр Монгол Улсад хамгийн түрүүнд ямар ажил хийх шаардлагатай, юу хэрэгтэй байгаа зэрэг ард түмний амьдралд хамгийн ойр шийдвэр гардаг.
Маш олон оронд энэхүү Зөвлөлдөх санал асуулгыг зохион байгуулсан байдаг. Удирдагч шатныхан болон ард иргэдийг хооронд нь ойртуулсан үйл ажиллагаа юм” гэв.
Зөвлөлдөх санал асуулгын II үе шат дөрөвдүгээр сарын 29, 30-ны өдрүүдэд болох бөгөөд Үндэсний Статистикийн Хорооноос I шатны оролцогчдын 50 хувийг санамсаргүй түүврийн аргаар сонгон, Төрийн ордонд болох уулзалтад урьж, оролцуулах юм.
