Тээврийн хэрэгсэл худалдаж авах болон эзэмшигчийн нэр шилжүүлэхдээ лавлагаа авсны үндсэн дээр худалдах, худалдан авах гэрээгээ байгуулж байхыг Шүүхийн Шийдвэр Гүйцэтгэх Ерөнхий Газар /ШШГЕГ/-аас зөвлөлөө.
Лавлагаа авснаар уг тээврийн хэрэгсэл нь битүүмжлэгдсэн эсэх, эзэмшигч иргэн, хуулийн этгээд нь шүүхийн шийдвэрээр бусдад төлбөртэй эсэхийг нь мэдэх боломжтой.
ШШГЕГ-аас 2015 оны байдлаар 6,956 тээврийн хэрэгслийн захиран зарцуулах эрхийг түдгэлзүүлжээ.
Худалдан авах гэж буй тээврийн хэрэгслийн захиран зарцуулах эрх түдгэлзсэн эсэхийг шалгаагүй, тухай бүр нэр дээрээ шилжүүлэлгүй хугацаа алдсаны улмаас шийдвэр гүйцэтгэх ажиллагааны явцад захиран зарцуулах эрхийг нь түдгэлзүүлсэн тээврийн хэрэгсэл худалдан авах тохиолдол багагүй гарч, иргэний маргаан үүсч байгууллага, иргэд хохирсон байна. Иймээс лавлагаа авч байхыг анхаарууллаа.
Эх сурвалж: ШШГЕГ