НҮБ-ын олон байгууллагууд дотроос хамгийн нэр хүндтэй нь UNESCO (United Nations Educational, Scientific and Cultural Organization) юм. 1946 онд байгуулагдсан UNESCO-гийн гол зорилго нь хүн төрөлхтний соёлын өвүүдийг хамгаалахад оршдог.
Гэтэл АНУ-ын төрийн департмент энэхүү чухал байгууллагын гишүүнчлэлээс татгалзаж байгаагаа өчигдөр зарлалаа. Цаашдаа зөвхөн ажиглагч статустай байж, ямар нэг төлбөр төлөхгүй, үүрэг хүлээхгүй болж байна. UNESCO-гийн дэлхийн түүхэн дурсгалт газруудын жагсаалтад АНУ-аас 23 газар багтдаг хэдий ч биет бус соёлын өв ганц ч бүртгэгдээгүй байдаг.
АНУ-ын гарах болсон шалтгаан нь уг байгууллагын “анти-Израйль” үзлээс болсон гэнэ. НҮБ-ын гишүүн болж чадаагүй Палестиныг UNESCO гишүүнээр элсүүлж, нутагт нь оршдог Хеброн хотыг дэлхийн түүхэн дурсгалт газрын жагсаалтанд бүртгэсэн нь АНУ-ын таалалд нийцээгүй бололтой. Израйль улс ч UNESCO-гийн шийдвэрийг эсэргүүцэж байсан юм.
Израйльчууд Хеброн хотыг Жүүдийн соёлын өвд харьяалагдах ёстой гэж үздэг аж.
Ер нь АНУ UNESCO-г улс төрийн байр сууриа илэрхийлэхэд ашигласаар ирсэн түүхтэй. 1984 онд АНУ-ын ерөнхийлөгч Рональд Рейган мөн л UNESCO-гоос гарах шийдвэр гаргасан нь тус байгууллагыг Зөвлөлтийн талыг баримталдаг, Израйлийн эсрэг, чөлөөт зах зээлийн эсрэг үзэлтэй гэж үзсэнийх байв. 2002 онд Жорж Буш АНУ-ыг дахин гишүүнээр элсүүлсэн юм.
Харин 2011 онд Барак Обама АНУ-аас UNESCO-д төлдөг төлбөрийг нэлээд хэмжээгээр хассан байна. Ингэх болсон шалтгаан нь UNESCO Палестиныг гишүүнээр элсүүлсэнтэй холбоотой. Тэр үеэс хойш уг байгууллагад төлөх төлбөрөө АНУ огт төлөөгүй ба энэ нь хуримтлагдсаар $500 сая гаруй болсон байна. 2013 онд UNESCO төлбөрөө төлөөгүй шалтгаанаар АНУ-ын саналын эрхийг нь хассан юм.
Өчигдөр АНУ-ыг гишүүнчлэлээс татгалзаж байгаагаа зарласны дараахан Израйль улс мөн UNESCO-г орхиж байгаагаа мэдэгджээ.
Эх сурвалж: Quartz