У.Хүрэлсүх Монгол Улсын 30 дахь Ерөнхий сайд боллоо

 

Гэрэл зургийг Mpa.mn

УИХ-ын чуулганы хуралдаан өнөөдөр 10:59 цагт эхэллээ. Өнөөдрийн хуралдаанаар Монгол Улсын Ерөнхий сайдыг томилох тухай нэг л асуудлыг хэлэлцэх юм.

Чуулганы эхэнд Ерөнхийлөгч Х.Баттулга Ерөнхий сайдад нэр дэвшигч У.Хүрэлсүхийн талаар танилцуулгыг хийлээ. 

Ерөнхийлөгч Х.Баттулга "Монгол Улсын Их Хурлын 2016 оны сонгуулийн дүнгээр байгуулагдсан Засгийн газрыг огцруулсан тул Улсын Их Хуралд олонхи суудал авсан Монгол Ардын Нам Ухнаагийн Хүрэлсүхийг Монгол Улсын Ерөнхий сайдад нэр дэвшүүллээ.

Монгол Улсын Үндсэн хуулийн Гучин гуравдугаар зүйлийн 1 дэх хэсгийн 2-т заасан бүрэн эрхийнхээ дагуу Ухнаагийн Хүрэлсүхийг Монгол Улсын Ерөнхий сайдаар томилох саналыг Монгол Улсын Их Хуралд оруулж байна.

Ухнаагийн Хүрэлсүх нь 1968 онд Улаанбаатар хотын Сүхбаатар дүүрэгт төрсөн. Батлан хамгаалах их сургууль, Төрийн захиргаа, удирдлагын хөгжлийн институт, МУИС-ийн Хууль зүйн сургууль төгссөн. Улс төр судлаач, эрх зүйч мэргэжилтэй. Эхнэр, 2 хүүхдийн хамт амьдардаг.

Ухнаагийн Хүрэлсүх нь Монголын Ардын Армийн 152 дугаар ангиас ажлын гараагаа эхэлж, 2000-2008 онд Монгол Улсын Их Хурлын гишүүн, 2004-2006 онд Монгол Улсын Засгийн газрын гишүүн, Онцгой байдлын асуудал эрхэлсэн сайд, 2006-2008 онд Монгол Улсын Засгийн газрын гишүүн, Мэргэжлийн хяналтын асуудал эрхэлсэн сайд, 2012 онд Монгол Улсын Их Хурлын гишүүн, 2015-2016 онд Монгол Улсын Засгийн газрын гишүүн, Шадар сайд, 2016 оноос Монгол Улсын Засгийн газрын гишүүн, Шадар сайдаар ажиллаж байна.

Тэрбээр Монгол Улсын Ерөнхий сайдын албан тушаалд хууль, шударга ёсыг дээдэлж, нийтийн эрх ашгийн төлөө, шуурхай, шийдэмгий байж, улс орны өмнө тулгамдсан олон асуудлуудыг хамтдаа даван туулахын төлөө бодитой хамтран ажиллаж чадна гэдэгт миний бие итгэж байна. У.Хүрэлсүхийг Монгол Улсын Ерөнхий сайдаар томилох асуудлыг хэлэлцэн шийдвэрлэж өгөхийг та бүхнээс хичээнгүйлэн хүсье" гэв. 

Мөн хэлэлцэж байгаа асуудалтай холбогдуулж Төрийн байгуулалтын байнгы хорооны дарга Н.Энхболд мэдээлэл хийлээ.

Төрийн байгуулалтын байнгы хорооны дарга Н.Энхболд "У.Хүрэлсүхийг Ерөнхий сайдаар томилох саналыг Төрийн байгуулалтын байнгын хороо есдүгээр сарын 29-ний өдөр хэлэлцсэн. У.Хүрэлсүх нь хуулийг ягштал мөрдөж ажиллахаа хэлсэн. Байнгын хорооны гишүүд түүнийг Ерөнхий сайдаар томилохыг 100 хувь дэмжсэн" гэлээ. 

Танилцуулгатай холбогдуулан гишүүд асуулт асууж, үг хэлж байна

Багш, эмч нарын цалинг нэмэх боломжтой юу?, Яамдын тоог багасгах талаар анхаарч байгаа юу?

 

УИХ-ын гишүүн О.Баасанхүү "Төрийн байгуулалтын байнгын хороон дээр хувийн сургуулийн хувьсах зардал 17 тэрбум төгрөг. Тэтгэвэрээс гарах бусад боломжуудыг ашиглаж багш нарын цалинг нэг сая гурван зуун мянгаар нэмэх боломжтой гэдгийг таньд хэлсэн. Дээр нь эмч нарын цалинг нэмэх боломжтой юу?

АН-ынхан дөрвөн яам нэмье гээд сонин юм ярьчихлаа. Яамдын тоог нэмэх дээр та санал нэг байгаа юм уу? Яамдын тоог багасгах талаар анхаарч байгаа юу?

Төсөв яагаад эргэн татагдчихав? төсвийг царцаах гацаах сонирхол байгаа юм биш биздээ. Ард түмэн бид яагаад ядуу байгаагаа ойлгохгүй байгаа" гэв. 

Багш, эмч гээд төрийн албан хаагч нарын цалинг 2019 оноос шат дараатайгаар нэмнэ

 

Гэрэл зургийг Mpa.mn

Ерөнхий сайдад нэр дэвшигч У.Хүрэлсүх "Багшийн зовлонг би маш сайн мэднэ. Манай гэр бүл багшийн цалингаар амьдарч байсан. Багштай холбоогүй хүн гэж байхгүй байх. Багш, эмч нарын асуудалд анхаарах хэрэгтэй. Эдийн засагтайгаа уялдуулж багш, эмч гээд төрийн албан хаагч нарын цалинг 2019 оноос шат дараатайгаар нэмнэ.

Ирэх жил тэтгэвэр тэтгэмжийг инфляцитай уялдуулж нэмнэ. Яамдуудын тоог нэмэхгүй хасахгүй. Нийгэмд сахилга хариуцлагыг тогтоох зайлшгүй шаардлага гарсан байна" гэлээ.

2018 оноос хүүхдийн мөнгийг 100 хувь олгож чадах уу? 

Гэрэл зургийг mpa.mn

УИХ-ын гишүүн, АН-ын дарга С.Эрдэнэ "Монгол Улс хэдий болтол гадны зээл тусламжийг шүтэж амьдрах юм бэ? ОУВС Монголын хөгжлийн төлөө яваад байна уу? эсвэл гадаадын хөрөнгө оруулагчдын эрх ашгийг хамгаалаад байна уу гэдэг нь эргэлзээтэй. Монголд үйл ажиллагаа явуулж байгаа 16 стратегийн орд газар байна. Цаашид стратегийн орд болох 38 орд байна. Эдгээр газруудын олборлолт борлуулалтан дээр төрийн хяналтыг сайн тавих хэрэгтэй.

Ялангуяа Оюу толгой бол борлуулалтаа хянуулахгүй тусгай вант улс болсон. Стратегийн орд дээр гадаад дотоодын компаниудын үйл ажиллагааг ном журмынх нь дагуу явуулж болох уу? Мөн У.Хүрэлсүх та хүүхдийн мөнгийг бүрэн олгох боломжгүй гэсэн. 2018 оноос хүүхдийн мөнгийг 100 хувь олгож чадах уу?" гэлээ.

Даанч боломж алга

Ерөнхий сайдад нэр дэвшигч У.Хүрэлсүх "Улс орны эдийн засгийн байдал хүнд байгааг бүгд мэдэж байгаа. Он гараад төлөх бондын өр их бий. Эдгээрийг төлөхгүй бол эдийн засаг хүндэрнэ. Аль болохоор төсвийн тэнцлийг алдагдалгүй гаргахын төлөө ажиллахаас өөр арга байхгүй. Стратегийн орд газруудад маш хариуцлагатай хандах ёстой. Монголын ард түмэн, төр өөрийнхөө баялагт эзэн нь байх ёстой. Харамсалтай нь энэ зүйл алдагдсан.

Газар нутгийн баялгийн төлөө бидний өвөг дээдэс халуун амь, бүлээн цусаа зориулж ирсэн. Монгол Улсын эдийн засагт олон тулгуурт бодлого барих нь зүйтэй. Эрдэс баялаг, уул уурхайн салбараас гадна, хөдөө аж ахуй, газар тариалангийн салбараа анхаарах нь зөв. Монголчууд бид хол замд явахдаа хөтөлгөө морьтой явдаг. Эдийн засгийн асуудлаа ганцхан уул уурхайд тохож болохгүй.

Хүүхдүүд, багш, эмч нараасаа мөнгө харамлах гишүүн парламентад байхгүй байх. Даанч боломж алга" гэлээ.

Оюутолгой Дубайн гэрээг шалгаж үзэх үү?, Тавантолгойг яаж эдийн засгийн эргэлтэд оруулах вэ?

Гэрэл зургийг Mpa.mn

УИХ-ын гишүүн Д.Тэрбишдагва "1.5 жилд бид Загсийн газраа огцруулж байна. Одоогийн Засгийн газрыг урт наслаасай гэж хүсэж байна. Оюутолгой Дубайн гэрээг шалгаж үзэх үү? Тавантолгойг яаж эдийн засгийн эргэлтэд оруулах вэ?

Шинэ Засгийн газар Эгийн голын усан цахилгаан станцыг яаж ажиллуулах вэ? Давхар дээлний тоог нэмэх үү?

Сургууль төгсөж байгаа хүмүүсийн 60-70 хувь нь дээд сургууль өмссөн. Техник мэргэжлийн сургуулийг жинхэнэ ажил хийдэг хүмүүс нь болох 30 орчим хувь нь төгсөж байна.

Манай улсын гадаад өрийн хэмжээ 4.6 тэрбум ам.доллар байгаа. Ийм нөхцөл байдалд эдийн засгийн алхамаа юунаас эхлэх вэ? Өрийг өрөөр дарна. Бондыг бондоор дарна гэж хэлээд байгаа. Тодорхой хариулт сонсмоор байна.

Оюутолгой Дубайн гэрээг шалгаж үзнэ, Эгийн голын усан цахилгаан станц хөдлөхөд бэлэн байгаа

Ерөнхий сайдад нэр дэвшигч У.Хүрэлсүх "Оюутолгой Дубайн гэрээг шалгаж үзнэ. Монгол Улсын эрх ашгийг зөрчсөн байвал илрүүлж ажиллана. Эрдэнэтийн асуудлыг хуулийн хүрээнд шийднэ. Эгийн голын усан цахилгаан станц хөдлөхөд бэлэн байгаа. Шинээр байгуулагдах Засгийн газрыг чадвартай Засгийн газар байгаасай гэж бодож байна.

Бидэнд мэргэжлийн ажилчид зайлшгүй шаардлагатай. Мэргэжлийн сургалт үйлдвэрлэлийн төвийг сайн дэмжих нь зөв гэж үзэж байгаа. Үүнд тодорхой хөрөнгө санхүүжилт өгч анхаарна" гэлээ.