Ц.Сандуйн ажлаа өгөх хүсэлтийг НИТХ-ын нэгдсэн чуулганаар хэлэлцэнэ
Ц.Сандуй НИТХ-ын дарга болон Нийслэлийн МАН-ын хороон даргын ажлаасаа огцрох өргөдлөө МАН-ын Удирдах зөвлөлд гаргаад байгаа.
Түүний хүсэлтийг НИТХ-ын нэгдсэн чуулганаар хэлэлцэж шийдвэрлэх бөгөөд чуулганы товыг тэргүүлэгчдийн хурлаар тогтоох юм байна.
Тэргүүлэгчдийн хурлыг хурлын дарга өөрөө буюу Ц.Сандуй зарлах ёстой ч одоогоор хурлын тов гараагүй байгаа талаар эх сурвалж мэдээллээ.
Түүнчлэн тэргүүлэгчдийн хурлыг олонхийн саналаар зарладаг аж.
Хэрвээ энэ байдлаар хурал зарлагдахгүй бол НИТХ-ын ээлжит хурлаар Ц.Сандуйн ажлаа өгөх асуудлыг хэлэлцэх юм байна.
Сануулахад, Ц.Сандуйг өөрийн хүсэлтээр ажлаа өгөх өргөдөл гаргахаас өмнө НИТХ дахь МАН-ын бүлгийн гишүүд Ц.Сандуйг огцруулах бичгийг өргөн бариад байсан.
НИТХ дахь МАН-ын бүлгийнхэн болон АН-ын төлөөлөгчид энэхүү шаардлагыг дэмжиж буйгаа илэрхийлээд байгаа билээ.
Тэд Ц.Сандуйг төрийн албан тушаалыг 60 тэрбумаар наймаалцсан гэх асуудлаар буруутгаад байгаа.
Харин Нийслэлийн Прокурорын газраас Ц.Сандуй нарт холбогдох 60 тэрбумын хэргийг хаасан талаар мэдээлээд байгаа юм.
