• 11 сарын 27, Лхагва
|
Уншиж байна ...
ХУУЧИРСАН МЭДЭЭ: 2015/07/21-НД НИЙТЛЭГДСЭН

2015 оны Наадмын рейтинг – Аль ТВ суваг эрэлттэй байв?

ikon.mn
2015 оны 7 сарын 21
iKon.MN
 

Улаанбаатар хотын хэмжээнд Телевиз Үзэлтийн Судалгаа явуулж буй “Максима Медиа” компанийн судалгаанд үндэслэн Үндэсний их баяр наадмаар ТВ сувгуудын үзэлтийг сурвалжиллаа.

 

Тус компани нь Английн “Кантар Медиа” компаний пиплметр технологиор Монгол улсад Телевиз Үзэлтийн Судалгааг 2012 оноос хийж эхэсэн бөгөөд өдгөө 3 дахь жилдээ наадмын ТВ рейтингийн тайланг танилцуулж байгаа юм.

Хамтын ажиллагаагаа эхлүүлсэн онцлогтой жил байлаа

 

Өмнөх жилүүдтэй харьцуулахад энэ жилийн наадам Телевизийн салбарын хувьд онцлогтой болж байгаа.

Учир нь энэ жил Үндэсний их баяр наадмыг 15 телевиз дундын багаараа дамжуулсан юм.

"Ер нь тив дэлхийн олимпийн наадмуудыг энэ маягаар шууд дамжуулдаг. Тиймээс бид ч зохион байгуулалтад орж үндэсний их баяр наадмыг маш өндөр технологиор өндөр төвшинд шууд дамжуулах цаг нь болсон" гэж ТВ5 телевизийн ерөнхий редактор Э.Дагиймаа энэ талаар дурджээ.

 

ТВ-үүдийн рейтинг жигд хуваагдсан шинжтэй байв

2015.07.10-2015.07.12 -ны өдрүүд дэх ТВ сувгуудын рейтинг

№

Суваг

Рейтинг

(06:00-24:00)

№

Суваг

Рейтинг

(06:00-24:00)

1

МҮОНТ

4.1

6

БОЛОВСРОЛ

1.1

2

MN25

1.3

7

ETV

1.1

3

МОНГОЛ HD

1.3

8

MOVIEBOX

0.8

4

TV9

1.2

9

TV5

0.8

5

UBS

1.2

10

C1

0.6

Энэ жилийн хувьд баяр наадмын үеийн ТВ рейтингээр МҮОНТ бусдаасаа харьцангуй илүү байж, харин бусад ТВ-үүдийн хувьд рейтинг жигд хуваагдсан байгаа нь өмнөх жилээс онцлог байлаа.

15 телевиз хамтарч ажилласны үр дүнд ерөнхийдөө нэгэн ижил дүрс цацсанаар рейтингээ хуваасан байна гэж манай шинжээчид дүгнэлээ.

2014, 2015 онуудын Топ рейтингтэй сувгуудыг харьцуулсан байдал

№

2014 топ

Рейтинг

(06:00-24:00)

№

2015 топ

Рейтинг

(06:00-24:00)

1

МҮОНТ

2.9

1

МҮОНТ

4.1

2

МОНГОЛ HD

1.6

2

MN25

1.3

3

TV9

1.3

3

МОНГОЛ HD

1.3

4

MN25

1.1

4

TV9

1.2

5

Dreambox

0.9

5

UBS

1.2

 

 

МҮОНТ бол жил жилийн наадам, цагаан сар гэх мэт үндэсний шинжтэй баярын өдрүүдэд рейтингээрээ байнга тэргүүлж байдаг.

 

Мөн энэ жил 15 ТВ-ын нэгдлээс тусдаа өөрсдийн арга барилаар наадам дамжуулсан юм. Энэ удаад ч мөн хамгийн өндөр рейтинг авсан бөгөөд

Олон жилийн туршлага, чадварлаг уран бүтээлчидтэй, үндэсний өнгө төрхөө бүрэн илэрхийлж чаддаг нь манай туйлын давуу тал. Хотол баясгалант Монгол наадам гэдэг наадмын хөтөлбөрийн хүрээнд бид үйл явдлуудыг цаг минутаар нь судалж, төлөвлөснөөр үйл явдлуудыг давхцуулалгүй бүрэн дамжуулж чадсан нь манай онцлог байсан болов уу. Мөн бид давхцсан тохиолдолд спицээр (дэлгэцээ хувааж) гаргахаар техникийн шийдлээ боловсруулсан байсан. Үйл явдлуудын хоорондох хугацааг бид сонирхолтой нэвтрүүлэг, тэр дундаа үндэсний спортын шинжээчдийн анализ, таавар, мөн танин мэдэхүйн бичил нэвтрүүлгүүдийг шигтгэж өгсөн ... гэж МҮОНТ-ийн цэнгээнт нэвтрүүлгийн багийн продьюсер Б.Гантулга онцолж байна.
 

Харин энэ удаад арилжааны ТВ-үүд дундаас MN25 суваг наадмын рейтингээрээ тэргүүлжээ.

Энэ тухайд 25-р суваг телевизийн нэвтрүүлгийн албаны дарга Ц.Энхтуяа

Бүх телевизүүдэд ижил дүрс хүлээж авч байсан учир телевиз болгон өөрсдийн онцлогоороо ялгарах шаардлагатай болсон. Манай телевиз наадмын эргэн тойрон дахь мэдээ, сурвалжлагуудыг маш соргогоор шуурхай мэдээлж байснаараа ялгарч байсан. 16 жил наадам дамжуулсан туршлагатай хамт олон маань юуг сурвалжлах вэ, морь, бөхөө яаж холбож гаргах вэ гэдэг дээр мэдрэмжтэй сайн ажиллаж чадсан” гээд “Телевизүүдийн холбоо анх удаа хамтарч наадам дамжууллаа. Мэдээж анх удаа 15 телевиз нийлж байгаа учраас алдаа оноо аль аль нь байсан. Гэсэн ч бид нэгдэж чадлаа гэдэг бол маш том алхам. Цаашид ч холбоо маань олон зүйл хамтран хийх болно... гэсэн юм.
 

Харин дундаж рейтингээрээ эхний тавд багтсан ТВ9 телевиз хамтарсан дамжуулалтанд шүүмжлэлттэй хандаж байгаагаа илэрхийллээ.

ТВ9 телевиз нь өмнөх жилүүдийн наадам, цагаан сарын барилдааныг дамжуулж, хамгийн өндөр рейтинг татаж байсан билээ.

Олон телевиз нийлсэн ч энэ нь давуу тал болж чадаагүй. 15 телевиз нийлснээрээ урьд өмнө байгаагүй шинэлэг байдлаар наадмаа дамжуулна гэж тохирсон ч зорьсондоо хүрээгүй. Яг нэгэн хэвэндээ байсан. Технологийн шийдлийн хувьд давуу талтай байсан ч уран бүтээлийн чанарын хувьд сайжирч чадаагүй. ТВ9 телевизийн хувьд Үндэсний спортыг түлхүү гаргадаг, Үндэсний баяр наадмаас хөдөө орон нутгийн баяр наадмуудыг нэвтрүүлдгээрээ онцлогтой. Олон телевиз яг ижил зүйл гаргаснаараа рейтингээ хувааж байгаа нь ашигтай хувилбар биш байлаа. Дараа дараагийн арга хэмжээг яг энэ зарчмаар дамжуулна гэвэл манайх хамтрах сонирхолгүй байна... гэж ТВ9 телевизийн Програмын албаны дарга Н.Баярсайхан үзэж байна.

 

2015.07.10-2015.07.12 -ны өдрүүд дэх ТВ сувгуудын рейтинг

Өмнөх жилүүдтэй харьцуулахад энэ жил МҮОНТ-ийн рейтинг бусад ТВ-үүдээсээ бүр хол тасарчээ.

 

Энэ жилийн хувьд МҮОНТ-ээс бусад ТВ-ийн рейтинг жигд хуваагдсан байгааг дээр дурдсан. UBS телевизийн хувьд рейтингээр жагсаахад зууны нарийвчлалаар ТВ9 телевизээс удаалжээ.

Бид Телевизүүдийн холбоон дээр бусадтайгаа тохиролцсоны дагуу наадмынхаа хөтөлбөрийг дамжууллаа. 15 телевиз нэгдэж дамжуулснаараа дуу, дүрсний чанар зэрэг олон талаараа өмнөх жилүүдтэйгээ харьцуулахад давуу талтай байсныг онцлон дурдмаар байна. Манай телевизийн хувьд олон жилийн туршлага, хөтлөгч, найруулагчдын маань уран бүтээлч сэтгэлгээ рейтингээ амжилттай татахад нөлөөлсөн болов уу... гэж UBS телевизийн техник эрхэлсэн дэд захирал Л.Нямдаваа онцлов.

 

 

Харин энэ жил өмнөх жилүүдээсээ огт өөр, онцлог бодлого баримталж, рейтингээ амжилттай татсан телевиз нь Монгол ТВ байсан. Наадмын өдрүүдээр тус телевизийн хамгийн өндөр рейтингтэй хөтөлбөр нь 7 сарын 12-ны 20:00 цагаас буюу Үндэсний бөхийн барилдаан дуусах үетэй залгуулж эхэлсэн “Аватар” УСКино байсан нь үзэгчдийн ерөнхий зан төлвийг харуулсан сонирхолтой үзэгдэл байлаа.

Монгол ТВ-ийн хувьд өнгөрсөн жилийн наадмаар дангаараа дамжуулах онцгой эрх авах боломж олдвол өрсөлдөх сонирхолтойгоо илэрхийлж байсан юм.

Энэ жил ч тэрхүү байр суурь дээрээ хэвээр байгаа ажээ.

Олон сувгаар ижил контент гарахад үзэгчид таагүй ханддаг. Ирэх жилээс олон улсын туршлагаа дагаж тендер зарлавал илүү мэргэжлийн түвшинд очно гэж итгэж байна... гэж Монгол ТВ-ийн програмын албаны дарга Б.Гантөмөр санал бодлоо илэрхийлж байна.

Шөвгийн барилдаанууд гол контент хэвээр байна

2015.07.12-ны 18:00-24:00 өдрийн ТВ сувгуудын рейтинг

Ижил төрлийн буюу сонирхол татахуйц контентуудыг нэг цаг дээр давхцуулах нь рейтинг хуваагдахад хүргэдэг бөгөөд үндэсний бөхийн шөвгийн барилдаан дээр ч мөн ажиглагдлаа.

Хэрвээ үндэсний бөхийн барилдааныг ганц ТВ дамжуулсан бол дангаараа 20% илүү рейтинг авах боломжтой байсаныг мөн эндээс тооцож болно. Энэ тохиолдолд рейтингээ дагаад тухайн контент дундуур явах зар сурталчилгааний эрэлт ихэсдэг юм.

“Хойтон жилийн наадам ч хол байна даа, хол байна”

Энэ жилийн наадам нь телевизийн салбарт өнөөг хүртэл дутагдаж байсан хамтын ажиллагааны эхлэлийг тавьснаараа сайхан наадам боллоо. Хамтын ажиллагааны талаар талууд янз бүрийн байр суурьтай байгаа ч энэ нь туршлага болж, цаашдын хөгжлийн суурь болно гэдэгт итгэлтэй байна.

Хойтон жилийн наадам хэдий хол байгаа ч, энэ наадмаар олсон туршлагаараа хөгжин ирэх жилийн наадмуудыг улам өнгөтэй сайхан дамжуулахын төлөө ТВ-үүд хичээн ажиллах биз ээ.