Хүнд хэлбэрийн хөгжлийн бэрхшээлтэй хүүхэдтэй эцэг, эхчүүд Хөдөлмөр, Нийгмийн Хамгааллын Яам (ХНХЯ)-ны үүдэнд өнөөдөр жагслаа.
Эцэг, эхчүүдийг төлөөлөн иргэн Г.Энхчимэг "Монгол Улсад 11,300 орчим хөгжлийн бэрхшээлтэй хүүхэд байна. Үүний 50 орчим хувь нь хүнд хэлбэрийн бэрхшээлтэй. Тэд нийгмээс тусгаарлагдаж, сургууль, цэцэрлэгт хамрагдаж чадахгүй яваа.
Хөгжлийн бэрхшээлтэй хүүхдэд үзүүлэх эрүүл мэнд, боловсрол, нийгмийн хамгаалал, нийгмийн халамжийн үйлчилгээ хангалтгүй хэвээр.
Өнөөдөр эм, эмийн бүтээгдэхүүний хэрэгцээ, оношилгоо нь Монгол Улсад ямар байгаа билээ. Нийгмийн халамжийн тэтгэмж нь 375,000 төгрөг.
ХНХ-ын сайд болон салбарын хамт олны хэрэгжүүлж буй ажил доод, дунд шатанд хангалтгүй учир сайжруулах шаардлагатай олон асуудал байна.
Бид хөгжлийн бэрхшээлтэй хүүхдүүдээ дөрвөн хананы дунд ургамал шиг амьдруулахыг хүсэхгүй байна. ХНХ-ын сайд Х.Булгантуяа ямар ч асуудлыг хүлээж авдаггүй, дандаа улс төржиж, амбиц хөөдөг" гэлээ.
Энэ үеэр холбогдох яаманд хандан дараах шаардлагыг хүргүүлж байгаагаа эцэг, эхчүүдийн төлөөлөл мэдээлсэн юм.
Монгол Улсын эс ширхэг болсон бяцхан үрсийн нийгмийн хамгааллыг сайжруулах, хүүхэд бүр эсэн мэнд хөгжих, тэгш боломжоор хангагдах, нийгмийн тусламж үйлчилгээг хүртээмжтэй авах эрхийг эдлүүлж одоогийн нөхцөлийг сайжруулах талаарх шаардлагуудыг хүргүүлж байгааг иргэн Г.Энхчимэг хэлэв.
Мөн тэрбээр "Хэрэв хүнд хэлбэрийн хөгжлийн бэрхшээлтэй хүүхдүүдийн ээж, аавууд хорвоогийн мөнх бусыг үзлээ гэж бодъё. Гэтэл өнчин үлдэж байгаа хөгжлийн бэрхшээлтэй хүүхдүүдийн асрамжийн газар Монголд байдаггүй. Энэ мэтчилэн яривал олон асуудал бий.
Нийгэмшүүлэх үйлчилгээ цогцоороо ХНХЯ-нд байх ёстой. Мөн ээж, аав нарт туслан дэмжих үйлчилгээ чухал.
Бид нар гэртээ хүүхдээ харсаар сэтгэл зүйн өндөр эрсдэлд орчихсон хүмүүс. Гэтэл нийгэм, сэтгэл зүйн тусламж үзүүлэх, хамт олонтой болгох, хөдөлмөрийн чадвар олгох, гэрээсээ орлого олох боломжийг бүрдүүлэх зэргийг яагаад холбогдох яамнаас нь уриалаад хийдэггүй юм бэ.
Үнэхээр улны бодлого хэрэгжүүлж байна. Үүнийгээ болих хэрэгтэй" хэмээн байр сууриа илэрхийллээ.
Иргэн С.Баялагмаа "Хөгжлийн бэрхшээлтэй хүүхдүүдийн төлөө хамгийн сайн ажиллаж байгаа газар бол Эх Хүүхдийн Эрүүл Мэндийн Үндэсний Төв (ЭХЭМҮТ)-ийн хамт олон.
Тус төвийн хамт олонтой хамтраад хөгжлийн бэрхшээлтэй хүүхдийн үзлэгийг дөрөвдүгээр сарын 6-наас дөрөв дэх удаагаа зохион байгуулах гэж байна.
Та бүхэн тэнд очоод хүнд хэлбэрийн хөгжлийн бэрхшээлтэй хүүхдүүдийн нүдийг хараарай, тэдэнд ямар бэрхшээл тулгамдаж буйг сонсоорой" гэв.