Н.Болормаа: Монгол Улсад 542,123 жуулчин зочилжээ
Монголд зочлох жилийн хүрээнд 2023 онд нэг сая жуулчин хүлээн авах зорилт тавьсан байдаг.
Энэхүү зорилтын биелэлт ямар түвшинд байгааг Байгаль Орчин, Аялал Жуулчлалын Яам (БОАЖЯ)-наас тодрууллаа.
БОАЖЯ-ны Аялал жуулчлалын бодлого, зохицуулалтын газрын мэргэжилтэн Н.Болормаа "Засгийн газрын үйл ажиллагааны хөтөлбөр болон Монголд зочлох жилийн хүрээнд нэг сая жуулчин хүлээж авах зорилт тавьсан байдаг. Цар тахлын дараа жуулчдын урсгалыг нэмэгдүүлэх, тэндээс олох эдийн засгийн өгөөжийг сайжруулах тал дээр ажиллаж байна.
Сүүлийн тоон мэдээлэл буюу аравдугаар сарын 17-ны байдлаар Монголд 542,123 гадаадын жуулчин иржээ. Энэ нь цар тахлын өмнөх нөхцөл байдал руу дөхөж очсон үзүүлэлт юм. Өөрөөр хэлбэл 2019 онд Монгол Улс хамгийн олон жуулчин буюу 577,000 жуулчин хүлээн авсан байдаг.
Хэдийгээр 2023 онд нэг сая жуулчин хүлээж аваагүй ч цар тахлын дараа идэвхжүүлсэн хамгийн том салбар аялал жуулчлал болж, өмнөх амжилт руугаа дөхөж байна" хэмээв.
Үргэлжлүүлэн "Орос, Хятад, Солонгос, Япон, Казахстан улс голлох зах зээл болдог. 2023 оны тухайд ОХУ-ын жуулчид нэлээд өндөр хувьтай буюу эхний байранд орж байгаа юм.
- Нэгдүгээрт ОХУ-ын 193,000 гаруй
- Хоёрдугаарт Солонгос улсын 127,000 гаруй жуулчин манай улсад иржээ.
Үүний араас Хятад, Казахстан, Япон улсын жуулчид орж байна.
Монголд зочлох жилийн хүрээнд Солонгосоос ирсэн жуулчдын тоо өмнөх үеэс буюу 2019 оны үзүүлэлтээс давсан" гэлээ.
