Э.Эрдэнэбаатар: Архангай аймгаас ирсэн иргэнд анхны тусламж үзүүлж байх хугацаанд нас барсан
Орон нутгаас нийслэлийг зорьж ирсэн иргэн шалган нэвтрүүлэх товчоогоор орж чадалгүй нас барсан тухай мэдээлэл олон нийтийн сүлжээнд цацагдсан.
Энэ талаар нийслэлийн Онцгой комиссын Шуурхай штабын Удирдлагын багийн гишүүн Э.Эрдэнэбаатар "Архангай аймгаас хувийн тээврийн хэрэгслээр зургаан иргэн гарч, өнгөрсөн шөнө буюу 2020 оны 12 дугаар сарын 7-ны орой Улаанбаатар хот руу нэвтрэхээр Эмээлт авто тээврийн шалган нэвтрүүлэх товчоонд ирсэн.
Эдгээр иргэн коронавирусийн халдвар илрүүлэх PCR шинжилгээ өгөөгүй байсан тул өнөөдөр өглөө авахаар төлөвлөж байв. Гэтэл тухайн иргэдийн нэг буюу иргэн О-н бие муудаж, нийслэлийн түргэн тусламжийг дуудсан.
Дуудлагын дагуу түргэн тусламжийн төвийн эмч нар анхны тусламж үзүүлж байх хугацаанд иргэн нас барсан. Нас барсан шалтгааныг тодруулахаар хууль хяналтын байгууллага ажиллаж байна" гэв.
Түүнчлэн тэрбээр "Нийслэлийн Онцгой комиссоос өвчлөл бүртгэгдсэн голомт буюу Орхон, Сэлэнгэ, Архангай, Дархан-Уул, Дорноговь, Говьсүмбэр аймгаас ирж буй иргэдийг заавал PCR шинжилгээ өгсөн тохиолдолд нэвтрүүлж байгаа.Иймд иргэд та бүхэн орон нутгаасаа гарахдаа PCR шинжилгээнд зайлшгүй хамрагдах шаардлагатайг анхааруулъя" гэлээ.
ВИДЕО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
