"Зуныг НОМТОЙ өнгөрүүлье"

Монсудар хэвлэлийн газраас жил бүр “Зуныг номтой өнгөрүүлье” арга хэмжээг зохион байгуулдаг. Энэ жилийн хувьд 6-р сарын 12-ноос 18-г дуустал 7 хоногийн турш үргэлжлэх бөгөөд:

• Ном унших яг ямар хэрэгтэй юм бэ?
• Ном уншихгүй сайхан амьдарч болоод байгаа юм биш үү?
• Би ном уншмаар байна, гэхдээ юу унших вэ? гэх мэт энгийн юм шиг хэрнээ шууд хариулахад түвэгтэй сэдвүүдээр ярилцахаар бүтэн 7 хоногийн хөтөлбөр бэлтгэжээ.

Энэ жилийн хувьд урд өмнөх жилүүдээс ялгаатай нь ном хэрэглээ болж эхэлж байгааг тодорхой номоор жишээлэн ярилцахаас гадна дээр дурдсан асуултуудын талаар харилцан ярилцсан, нээлттэй, чөлөөт ярилцлагууд олон болох ажээ.
 
Тухайлбал, 7 хоног үргэлжлэх арга хэмжээний нэг өдөр нь л гэхэд зөвхөн Японы уран зохиолын талаар ярилцахаар төлөвлөөд байгаа бөгөөд Мүраками Харүкиг яагаад дэлхий дахин уншиж байна вэ?, Японы уран зохиолыг орчин үежүүлсэн (манайхаар бол Д.Нацагдорж хэмээн ойлгож болох) Нацүмэ Соосэкигийн тухай гэх мэт сонирхолтой, хамгийн гол нь үр өгөөжтэй арга хэмжээнүүдийг зохион байгуулна.

Бас нэгэн онцлох үйл ажиллагаа бол Испани зохиолч Элана Алонзо Фрэйлэгийн удирдан явуулах  "ТЭСРЭЛТ - ТЭСРЭЛТИЙН ДАРААХ ҮЕ - УНАЛТ” нэртэй лекц, ярилцлага. Энэ лекц, ярилцлагаар Габриель Гарсиа Маркесээс Роберто Боланьо хүртэлх Латин Америкийн уран зохиолын 40 жил буюу Латин Америкийн уран зохиолын тэсрэлтийн талаар ярилцана.

Гэхдээ хаа холын ямар нэгэн үйл явдлын тухай ярьж буй мэт дурдаад өнгөрөх биш уран зохиолын тэсрэлт гарахад нийгмийн нөлөө ямар байдаг, бидэнд энэ цаг хэр ойрхон байгаа бол? гэх мэтээр өөрсдийнхөө өнөөдөртэй холбосон, уран зохиол сонирхогч хийгээд зохиол бүтээл бичигч нарт тусгайлан зориулсан үйл ажиллагаа болно.

Энэ мэтээр хүүхэд, эцэг эх, залуучууд, уншигчид гээд бүх л хүмүүст зориулсан цогц арга хэмжээ явагдаж, зааж сургасан биш янз бүрийн номыг хэрхэн, яаж уншиж хэрэглэх талаар өөр хоорондоо харилцан ярилцсан байдлаар явагдахаараа онцлогтой юм байна. Бүх үйл ажиллагаа үнэгүй.

Хөтөлбөр

6-р сарын 12-ны ДАВАА гараг:

14:00 цагаас: “Зуныг номтой өнгөрүүлье” арга хэмжээний нээлт
Оролцогч: “Амьдралыг өөрчлөх эмх цэгц ба түүний гайхамшигт ид шид” номын орчуулагч Л.Саруултөгс. 
“Сингапурын хөгжлийн нууц” номын орчуулагч Н.Монголмаа.
Гол мэдээлэл: Ном хэрэглээ болж эхэллээ.
Байршил: Интерном төв салбар

18:00 цагаас: Арьсан хүрэмтэй Мадонна номын нэгдсэн хэлэлцүүлэг. 
Хамтран зохион байгуулагч: НОМТОЙ ӨГЛӨӨ
Байршил: Интерном төв салбар

6-р сарын 13-ны МЯГМАР гараг:

14:00 цагаас: “Хүүхэддээ цаг гаргах уу? Зав гаргах уу?” эцэг эхчүүдэд зориулсан зөвлөмж ярилцлага.
Байршил: Интерном төв салбар
Гол мэдээлэл: Өдөр тутмын амьдралын зуршлыг өөрчлөх амаргүй ч заавал хийх ёстой зүйл.

18:00 цагаас: "ТЭСРЭЛТ -ТЭСРЭЛТИЙН ДАРААХ ҮЕ - УНАЛТ” чөлөөт ярилцлага.
Оролцогч: Испани зохиолч Элана Алонзо Фрэйлэ
Гол мэдээлэл: Габриель Гарсиа Маркесээс Роберто Боланьо хүртэлх Латин Америкийн уран зохиолын 40 жил буюу Латин Америкийн уран зохиолын тэсрэлт.
Байршил: Интерном төв салбар

6-р сарын 14-ны ЛХАГВА гараг:

14:00 цагаас: “Зурагт номоор хүүхэд том болдог” эцэг эхчүүдэд зориулсан зөвлөмж ярилцлага.
Байршил: УИД-т байрлах Мажестик номын дэлгүүр 
Гол мэдээлэл: зурагт ном, зурагтай номын ялгаа, ач холбогдол

18:00 цагаас: Уг арга хэмжээ Интерном номын дэлгүүрийн төв салбарт дахин явагдана.

6-р сарын 15-ны ПҮРЭВ гараг:

12:00 цагаас: “Дэлхийд танигдсан Мураками” лекц, ярилцлага
Оролцогч: Орчуулагч, Япон судлаач О.Жаргалсайхан
Гол мэдээлэл: Муракамиг яагаад дэлхий дахин уншиж байна вэ?
Байршил: Интерном төв салбар

14:00 цагаас: “Унших болон сонсохын ялгаа” сонсдог номын тухай болон “Боччан” номоор радиогийн шууд нэвтрүүлэг.
Оролцогч: МУГЖ Г. Равдан, Монголын радио
Гол мэдээлэл: Өгүүлэхүйн урлагийн онцлог, Боччан номын хэсгээс уншлага, хэлэлцүүлэг.
Байршил: Интерном төв салбар

18:00 цагаас: Японы уран зохиолын шинэчлэл 
Оролцогч: Ибукоро Томоко, МУГЖ Г. Равдан 
Гол мэдээлэл: Японы шинэ үеийн уран зохиолын гол төлөөлөгч Нацүмэ Соосэкигийн тухай болон Японы уран зохиолын талаар лекц, ярилцлага.
Байршил: Интерном төв салбар

6-р сарын 16-ны БААСАН гараг:

14:00 цагаас: “Хүүхдийн хүмүүжлийн чухал асуудлууд” эцэг эхчүүдэд зориулсан зөвлөмж ярилцлага.
Оролцогч: Кимико 
Гол мэдээлэл: 1. Чөлөөтэй байх замбараагүй байхын ялгаа, 2. Чихэр өгнө шүү !!! ..., 3. Айж хийх ойлгож хийхийн ялгаа, 4. Эцэг эхчүүд буруугаа хүлээдэг байх, 5. Хүүхэдтэйгээ харьцахдаа нүд рүү нь харж бай.
Байршил: Интерном төв салбар

18:00 цагаас: "Өсөх сэтгэлгээ стартап бизнес эхлүүлэхэд нѳлѳѳлѳх нь” залуучуудад зориулсан хэлэлцүүлэг.
Хамтран зохион байгуулагч: Benzeen
Байршил: Интерном төв салбар

6-р сарын 17-ны БЯМБА гараг:

13:00 цагаас: “13-р хороололын хүүхдүүд” Хүүхэд, эцэг эхчүүдэд зориулсан арга хэмжээ, зөвлөмж ярилцлага.
Гол мэдээлэл: Зун бол эцэг эхчүүд хүүхдүүдтэйгээ хамтдаа илүү их цаг өнгөрөөх боломж олддог улирал. Энэ хугацааг хэрхэн үр дүнтэй байлгах вэ?
Байршил: Интерном Соманг плаза салбарын гадаа талбайд

15:00 цагаас: Хүүхдийг хэрхэн номд дуртай болгох вэ? цэцэрлэгийн хүүхэдтэй эцэг эхчүүдэд зориулсан зөвлөмж ярилцлага.
Оролцогч: Кимико
Гол мэдээлэл: Ном - хүүхдийн бүтээлч байдлыг хөгжүүлдэг.
Байршил: Интерном төв салбар

17:00 цагаас: Уншиж сурч байгаа хүүхдээ хэрхэн дэмжих вэ? эцэг эхчүүдэд зориулсан зөвлөмж ярилцлага
Гол мэдээлэл: Ном - хүүхдийн бүтээлч байдлыг хөгжүүлдэг. Ойлгож унших гэж юуг хэлэх вэ?, Унших дадал хэвшил олгох нь...
Байршил: Интерном төв салбар

6-р сарын 18-ны НЯМ гараг:

16:00 цагаас: Яагаад Марракешийг унших ёстой вэ?
Оролцогч: Философич С.Молор-Эрдэнэ
Гол мэдээлэл: Марракешийн дуу хоолой номын тухай болон уран зохиол уншихын ач холбогдол лекц.

18:00 цагаас: “Би ном уншмаар байна. Гэхдээ юу унших вэ?...” хэлэлцүүлэг.
Гол мэдээлэл: Олон хүн ном уншихыг хүсэж, хэрэгтэй гэдгийг нь мэддэг болсон боловч яг ямар ном унших, хаанаас эхлэх, номоо яаж сонгох талаар төдийлэн сайн мэддэггүй. Үүнийг ил тодоор харилцан ярилцах замаар шийдвэрлэх боломжтой юу?
Байршил: Интерном төв салбар.