2015 онд барилгын салбарт нэвтрүүлсэн дэвшилтэт ТАВАН технологи

Технологийн шинэ дэвшлүүд нь барилга болон үйлдвэрлэлийн бүхий л салбарт асар их өөрчлөлтийг авчирч байна. Техникийн үзүүлэлтээрээ дэвшилттэй тоног төхөөрөмжийг оновчтой ашигласан барилгын компаниуд өндөр үр дүнтэйгээр хөдөлмөр хамгааллын аюулгүй нөхцлийг бүрдүүлэн ажиллах бололцоотой болжээ. Өнгөрсөн онд барилгын салбарт дэвшил авчирсан цөөнгүй техник технологи, аппликейншүүдийг шинээр нэвтрүүлэн ашиглаж эхэлсэн байна. Эдгээрийг танилцуулбал:

Өмсөх зориулалттай төхөөрөмжүүд

 

Өмсөх зориулалт бүхий шинэ төрлийн төхөөрөмжүүд нь барилгын ертөнцөд, тэр тусмаа барилгын ажил явагдаж байгаа талбай дээрх аюулгүй ажиллагаанд зориулагджээ. Хурдацтай хөгжиж, өсөн нэмэгдэж буй барилгын компаниуд хөдөлмөр хамгааллын хариуцлагаа өндөржүүлж, ажилтнууддаа гутал, бугуйн цаг, хатуу дуулган малгай болон хавтгай, налуу дээвэрт хэрэглэх бэхэлгээ зэрэг аюулгүй ажиллагааны нэн шинэлэг тоноглолуудыг ашиглах нь нэмэгдсэн. 

Тэдгээр төхөөрөмж нь барилгын талбай дээрх ажилчдын ажиллах нөхцлийг сайжруулахад ихээхэн дэмжлэг болж байгаа юм. Хатуу дуулган малгайн үүрэгтэй уг төхөөрөмж нь тухайн ажилчны  байрлаж буй газрын сөрөг нөлөөллийг анхааруулдаг бол бугуйн цаг нь биеийн температурыг хянаж, дулаанаа алдахаас сэргийлдэг аж. Түүнчлэн гутлан төхөөрөмж нь ажилчны  хөл дээрээ хэр удаан зогссоныг, завсарлага хоорондын зайг хянах боломжтой. Харин бэхэлгээ тоноглол нь барилга дээр ажиллаж байгаа ажилчдын тоог хянаж, ажиллагч өндөр газраас гэнэт унах эрсдлээс сэргийлэх зориулалттай. 

Хянагч төхөөрөмж

 

Энэ нь барилгын компаниудын буруу суурилуулсан суурь машин, гар багаж хэрэгсэлд зарцуулдаг зардлыг хэмнээд зогсохгүй, ажиллагчид буруу байршилд зогсох, аюултай хэсэгт явах зэрэг эрсдэлээс сэргийлдэг аж. Барилгын компаниуд машин төхөөрөмж, гар багаж, цахилгаан хэрэгсэл зэргийг кодоор бүрдүүлдэг. Ажлын өдрийн эхэнд болон төгсгөлд дижитал уншигчаар тэдгээр кодыг хянаснаар ашиглагдсан тоног төхөөрөмж, багаж хэрэгслээ бүртгэх боломжтой.

Удирдлагатай нисдэг төхөөрөмж

 

Барилгын талбайн хүчин чадлыг шалгах, идэвхтэй хэсгүүдийг хянах үед ашиглагддаг энэхүү удирдлагатай нисдэг төхөөрөмж нь барилгын ерөнхий байдлыг бүхэлд нь хамгийн зөв хувилбараар өөрчлөх ирээдүйтэй дэвшилтэт технологи юм. Барилгын компаниуд барилгажилтын талбайг судлахын тулд нисгэгч хөлслөх нь алслагдмал байршлыг ерөнхийд нь харахад хүндрэлтэй байдаг. Түүнчлэн ажилтнууд барилгын талбайг хянахдаа ашиглахад тохиромжтой. Энэ нь зөвхөн хяналт тавихад бус ажлын талбар дахь ажлын явцыг хурдан судалж, удирдан зохин байгуулахад дөхөмтэй аж. 

Таблет ба Wi-Fi

 

Барилгын талбай дээр хуйлаастай зураг төсөл, ажлын холбогдолтой бусад бичиг баримт бүрийг авчрахын оронд авч явахад хялбар, нэг жижиг төхөөрөмжийг олон талаас нь ашиглах боломжтой таблетууд энэ салбарт багагүй өөрчлөлтийг авчирж байна. Энэ нь олон хуудас цаас эзлэх их хэмжээний мэдээллийг нэг дор багтааж, авч явах, ашиглахад хялбар энэхүү технологийг Wi-Fi-тай холбосноор барилгын компаниуд цаг заваа хэмнэн, ажлаа хөнгөвчлөх боломжтой юм. Wi-Fi холболттой таблетууд нь ажилтнуудад барилгын талбай дээр аливаа бичиг баримтуудаа байршуулах, засах, ашиглах, бусаддаа түгээх боломжийг олгоно. 

Гар утасны аппликейшн

 

Барилгын талбай дээр ашиглах зориулалттай энэхүү шинэ аппликейшнийг ажилтнууд болоод барилгын захиалагч тал гээд хэн хэн нь хэрэглэх боломжтой. Барилгын ажилд ашиглагддаг, зураг төслийг тухай бүрт нь өөрчлөх, засах боломжтой олон төрлийн аппликейшн худалдаанд гарчээ. Түүнчлэн бетоны хэмжээ, дээврийн материал, техник хэрэгслийн тоо хэмжээ зэрэг хангамжийн материалуудыг тооцоолох барилгын менежерүүдийн ажилд энэхүү аппликейшн онцгой үүрэг гүйцэтгэдэг аж.

Мөн барилгын компаниуд ирээдүйд барих барилгын ажлаа төлөвлөх, тооцоолохдоо үүнийг ашиглах нь цаг болоод мөнгөн зардлыг ихээхэн хэмнэх давуу талтай. 
Дэлхийн өндөр хөгжилтэй улс орнуудын барилгын салбарт удирдлагатай нисдэг төхөөрөмж болон мэдээлэгч хэрэгсэл зэрэг шинээр нэвтрүүлж буй эдгээр дэвшилтэт технологиудыг барилгын компаниуд хэдийнэ ашиглаж эхэлжээ.

Эх сурвалж: constructionglobal.com