Ромын Папын Конгрессд хэлсэн үгнээс онцлох НАЙМАН эшлэл

Р.Түвшин, iKon.mn

2015 оны 9 сарын 28

iKon.MN

Ромын Католик шашны тэргүүн Пап лам өнгөрсөн долоо хоногт АНУ-д айлчилж Конгрессын нэгдсэн чуулганд үг хэлсэн билээ. 45 минут үргэлжилсэн түүний илтгэлээс дүрвэгсдийн асуудал, терроризм, радикал үзэл, галт зэвсгийн хэрэглээ, ядуурал, баян хоосны ялгаа, уламжлалт гэр бүлийн сэдвээр сургамжилсан үгнүүдийг харж болохоор байна.

“Энэ тивийн хүмүүс бид гадныхнаас айдаггүй. Учир нь бидний ихэнх нь нэгэн цагт гадныхан байсан билээ”
“Итгэлийг сэргээх, бурууг засах, амлалтаа биелүүлэхэд бидний хичээл зүтгэл чиглэх ёстой. Ингэснээр хүмүүсийн сайн сайхан байдлыг бид хангаж чадна”
“Шашин, үзэл суртал, эсвэл эдийн засгийн системийн нэрийг барьж хүчирхийлэл үйлдэх явдалтай тэмцэх, нөгөө талаас шашин шүтлэгийн эрх чөлөө, оюун санааны болон хувь хүний эрх чөлөөг хамгаалах гэсэн хоёр туйлын хооронд нарийн тэнцвэрийг хангах шаардлага тулгарч байна. Мөн бүх зүйлийг хэт хялбарчилж ойлгох, тухайлбал зөвхөн сайн эсвэл муу, зөв эсвэл буруу гэж харахаас сэргийлэх хэрэгтэй”
“Алуурчид, харгис этгээдүүдийн хийж буй нүгэлт үйлдлийг даган дуурайх нь тэднээс ялгаагүй болох хамгийн хялбар арга”
“Товчоор хэлбэл, хэрвээ бид аюулгүй байдлыг хүсвэл бусдад аюулгүй байдлыг өгдөг, амьдрал хүсвэл бусдад амьдрал өгдөг, боломж хүсвэл бусдад боломж олгодог байх ёстой”
“Ядуурал, өлсгөлөнтэй хийх тэмцэл нь олон фронтоор, тогтмол өрнөх ёстой. Ялангуяа түүний учир шалтгаантай тэмцэх нь чухал.”
“Бид өөрсдөөсөө асуух ёстой зүйл: Яагаад хүмүүс болон нийгэмд хэмжээлшгүй их аюул занал учруулахаар төлөвлөж байгаа этгээдүүдэд үхлийн зэвсгийг зарж байна вэ? Харамсалтай нь хариултыг бид бүгд мэдэж байгаа, энэ бол мөнгө. Гэм зэмгүй хүмүүсийн цусанд будагдсан мөнгө”
“Гэрлэлт, гэр бүл гэсэн харилцааны суурь ойлголтууд өнөөдөр асуудалтай тулгараад байна. Гэхдээ би гэр бүлийн амьдралын сайн сайхан, үр өгөөж, ач холбогдлыг л зөвхөн давтан хэлж чадах байна”