Селена Гомес найз залуу Бенни Бланкотой сүй тавьснаа зарлав

Дуучин, жүжигчин Селена Гомес найз залуу, хөгжмийн продюсер Бенни Бланкотой сүй тавьснаа өчигдөр зарлажээ.

Тэд өнгөрсөн онд дотно харилцаатай болсноо анх зарлаж байсан юм.

Гомес 423 сая дагагчтай Инстаграм хуудсандаа сүйн бөгжнийхөө зургийг “Одоогоос эхлээд үүрд хамтдаа” гэсэн утгатай үгсийн хамт нийтэлжээ.

Тэрбээр Инстаграм платформын хамгийн олон дагагчтай эмэгтэй юм.

Гомес, Бланко нар 2019 онд “I Can’t Get Enough”, 2023 онд “Single Soon” дуунуудыг хамтран бүтээснийхээ дараа харилцаагаа олон нийтэд ил болгож байв.

Рианна, Кэлвин Харрис, Жастин Бибер нартай хамтран ажиллаж байсан Бланко тавдугаар сард Дрю Бэрриморын ярилцлагын шоунд оролцохдоо Гомесын талаар “Тэр зүгээр л хамгийн шилдэг нь, жинхэнэ хүн. Тэр бол миний уулзаж байсан хамгийн эелдэг, хамгийн дур булаам, хамгийн даруухан хүмүүсийн нэг” гэж магтаж байжээ.

Гомесын хувьд өмнө нь дуучин Жастин Бибер, The Weeknd зэрэг уран бүтээлчидтэй дотно харилцаатай байсан.

Техасын уугуул тэрбээр хүүхэд насандаа Barney, Disney Channel сувгуудаар олны танил болж байжээ.

Энэ онд Гомес $1.3 тэрбумын хөрөнгөөрөө Блүүмбэргийн тэрбумтнуудын жагсаалтад бичигдэх болсон юм. Түүний хөрөнгийн ихэнх хэсгийг Rare Beauty гоо сайхны бүтээгдэхүүний компани нь бүрдүүлжээ.

Эх сурвалж: BBC