Өнгөрсөн шөнө Завхан аймгийн Отгон суманд -42 градус хүрчээ

Гэрэл зургийг MPA агентлагийн онцгой зөвшөөрөлтэйгөөр ашиглав

Өнгөрсөн шөнө Завхан аймгийн Отгон суманд -42 градус хүрсэн талаар Цаг уур, орчны шинжилгээний газраас мэдээллээ. 

Өнөөдөр өдөртөө Дархадын хотгор, Завхан голын эхээр -25…-30 градус, Увс нуурын хотгор, Монгол-Алтай, Хангай, Хөвсгөлийн уулархаг нутаг, Хүрэнбэлчир орчим, Идэр, Тэс голын хөндийгөөр -20…-25 градус, говийн бүс нутгийн өмнөд хэсэг, цас багатай энгэр ээвэр газраар -7...-12 градус, бусад нутгаар -14...-19 градус хүйтэн байна.

Улаанбаатар хотод өнөөдөр багавтар үүлтэй. Цас орохгүй. Салхи баруун хойноос 5-10 метр. -14…-16 градус хүйтэн байна.  

Маргаашаас буюу арванхоёрдугаар сарын 14-16-ны өдрүүдэд ихэнх нутгаар цаг агаар тогтуун, өдөртөө хүйтний эрч сулрах төлөвтэй байгаа талаар цаг уурын байгууллагаас мэдээлээд байгаа юм.