Уншиж байна ...

Н.Учрал: Төрийн үйлчилгээг цаашдаа операторын горимд шилжүүлнэ

Б.Жаргалмаа, IKON.MN
2022 оны 11 сарын 25
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

 Lavlagaa.e-mongolia.mn системийг өнөөдөр нээж байгаа талаар танилцуулах үеэрээ "Цахим хөгжил, харилцаа холбооны яам, Хууль зүй, дотоод хэргийн яамтай хамтран дүрэм журмын түгжрэлээс гарах багц хуулийг боловсруулж байгаа. УИХ-д өргөн мэдүүлнэ" гэдгийг ЦХХХ-ны сайд Н.Учрал хэллээ. 

Тэрбээр "Энэ хүрээнд хууль, шүүхийн салбар, банк санхүү гээд олон салбарт эрх зүйн шинэчлэл хийж чадвал олон гацаанаас гарна. Төрийн байгууллагуудын хамтын ажиллагааг сайжруулах хүрээнд бид яамдтай тодорхой чиглэлүүдээр хамтран ажиллаж байна. 

Шинээр байгуулагдаж байгаа Төрийн цахим үйлчилгээний зохицуулалтын газар түгжрэлийг бууруулахад өргөн агуулгаар дэмжлэг үзүүлнэ. Төрийн үйлчилгээг цаашдаа операторын горимд шилжүүлнэ. Төрийн цахим үйлчилгээг хурдан хүргэх үүднээс бүх аймаг, суманд операторын үйлчилгээ үзүүлэх эрхийг хувийн хэвшилтэй хамтарч аутсорсинг хэлбэрээр зохион байгуулах боломжтой гэж үзэж байгаа. Цаашдаа банкууд, хувийн байгууллагууд, цахилгаан холбоо, шуудангийн болон оператор компаниуд хүртэл төрийн үйлчилгээг үзүүлдэг бодлогын менежментүүдийг зохион байгуулна. Нийслэлийн хэмжээнд нэг цэгийн үйлчилгээ зургаа байдаг. Энэ зургаан цэгийн үйлчилгээ бүхэлдээ нэг дээвэр доорх олон цэгийн үйлчилгээ болж, хүнд суртлын түгжрэл болсныг менежментийн хувьд өөрчлөн зохион байгуулж, операторын горимд шилжүүлнэ. Нэгэнт гэрээ хийгээд төрийн үйлчилгээг хувийн байгууллагууд авч байгаа тул мэдээллийн аюулгүй байдлын стандартыг хангавал бид операторын үйлчилгээг хувийн хэвшилтэй хамтран хийнэ" хэмээн мэдээллээ.