“Олон Улсын тахь групп”-ийн ерөнхийлөгч Рейнхард Шнидриг, тус группийн Монгол дахь төлөөлөгчийн газрын захирал Ж.Батсүх, Говийн их дархан цаазат газрын Б хэсгийн хамгаалалтын захиргааны дарга О.Ганбаатар нарыг Байгаль орчин, аялал жуулчлалын сайд Б.Бат-Эрдэнэ өчигдөр хүлээн авч уулзлаа.
1999 онд Олон Улсын Тахь Групп Швейцар болон Монгол Улсад төрийн бус олон нийтийн байгууллагын статустайгаар байгуулагдаж, тахь сэргээн нутагшуулах төслийг IUCN-ийн журам, дүрмийн дагуу үргэлжлүүлэн хэрэгжүүлж ирсэн. Олон Улсын Тахь Группийн үйл ажиллагааны үндэс нь Монгол Улсын Засгийн газартай байгаль хамгаалах урт хугацааны гэрээ байгуулж, амжилттай хамтран ажиллаж байгаа явдал юм.
ОУТГ-ын зорилго нь говийн экосистем амьтдын амьдрах орчныг бүхэлд нь хамгаалах, ГИДЦГ-ын Б хэсгийг Олон улсын байгаль хамгаалах холбооны журмын дагуу шим мандлын нөөц газрын түвшинд хамгаалах явдал юм.
Тахийн төсөл нь:
Энэ удаагийн уулзалтаар Олон улсын тахь группийн төлөөлөл дээрх төслийг цаашид үргэлжлүүлэн хэрэгжүүлэх хүсэлтэй байгаагаа илэрхийллээ. Мөн тахь судлал болон энэ чиглэлийн боловсон хүчин бэлтгэх, тэдний чадавхыг сайжруулах, Тусгай хамгаалалттай газар, нутаг, түүнийг зөв, зохистой ашиглан, хамгаалах, менежментийн шинэчлэл хийх зэрэг сэдвээр санал солилцож, дэлхийн өвд тахийг бүртгүүлэх асуудлаар ярилцав.
Түүнээс гадна “Олон улсын тахь групп” ирэх есдүгээр сараас Говь-Алтай, Ховд аймгуудад тахийн шинэ төсөл хэрэгжүүлэх бэлтгэл ажлаа эхлүүлээд буй. Цаашид өмнө нь хэрэгжүүлж ирсэн тахийн төслийг шинэ төсөлтэй хамтатган үр дүнтэй хэрэгжүүлэх тал дээр анхаарч ажиллаж байна гэсэн юм.
Эх сурвалж: Байгаль орчин, аялал жуулчлалын яам