Уншиж байна ...

АНУ-ын Засгийн газраас Сэтгэцийн эрүүл мэндийн үндэсний төвд мэдээллийн технологийн болон эмнэлгийн тоног төхөөрөмжийн дэмжлэг үзүүллээ

Б.Билгүүн, iKon.mn
2022 оны 8 сарын 4
iKon.MN
Зураг зураг
Эх сурвалж: АНУ-ын ЭСЯ

АНУ-ын Засгийн газраас АНУ-ын Олон улсын хөгжлийн агентлаг(ОУХА буюу USAID) болон Дэлхийн эрүүл мэндийн байгууллага (ДЭМБ)-аар дамжуулан Монгол Улсын ЭМЯ-ны харьяа Сэтгэцийн эрүүл мэндийн үндэсний төв (СЭМҮТ)-д мэдээллийн технологийн болон эмнэлгийн тоног төхөөрөмжийг хүлээлгэн өглөө.

Улаанбаатар хотын есөн дүүргийн эрүүл мэндийн төвүүдийн сэтгэл зүйн зөвлөгөө өгөх тасгуудад тараагдах энэхүү тусламж нь эрүүл мэндийн ажилтнуудын КОВИД-19-тэй холбоотой сэтгэцийн эрүүл мэндийн асуудлыг шийдвэрлэх, зөвлөгөө өгөх чадавхыг бэхжүүлэхэд туслах юм.

Өнгөрөгч Баасан гарагт СЭМҮТ-д болсон уг арга хэмжээнд АНУ-ын ОУХА-ийн Захирал Томас Крэхан, ЭМЯ-ны Халдварт бус өвчний хэлтсийн дарга, доктор Г.Ганхуяг, СЭМҮТ-ийн захирлын үүрэг гүйцэтгэгч, доктор В.Баярмаа, Нийслэлийн Эрүүл мэндийн газрын Нийгмийн эрүүл мэндийн хэлтсийн дарга, доктор Ц.Ундрал болон ДЭМБ-ын мэргэжилтэн С.Болормаа нар оролцлоо.

Ноён Крэхан “Тэргүүн эгнээний ажилчдын сэтгэцийн эрүүл мэнд нь нийт хүн амын эрүүл мэндийг хамгаалах, КОВИД-19 өвчтөний эдгэрэх боломжийг нэмэгдүүлэхэд чухал үүрэг гүйцэтгэдэг” гээд “Монгол Улсын тогтвортой түнш, гуравдагч хөршийн хувьд АНУ нь өөрийн ОУХА-аар дамжуулан дэлхий нийтээр тулгараад буй эрүүл мэндийн энэхүү хямралыг даван туулахад нь Монгол Улсад дэмжлэг үзүүлж байгаадаа баяртай байна” гэлээ.

Энэхүү тусламж нь цар тахлын дэгдэлтийн эсрэг Монгол Улсын эрүүл мэндийн тогтолцооны чадавхыг бэхжүүлэхэд чиглэн хэрэгжүүлж буй АНУ-ын ОУХА-ийн ДЭМБ-тай хамтарсан үйл ажиллагааны чухал хэсэг юм. Тус хамтын ажиллагаа нь эрүүл мэндийн байгууллагуудыг эмнэлгийн тоног төхөөрөмж, чухал хэрэгслээр яаралтай хангах, өвчний цаашдын тархалтаас урьдчилан сэргийлэх, нэн шаардлагатай эрүүл мэндийн болон цар тахалтай холбоотой тусламж үйлчилгээг сайжруулахад чиглэж буй.

Өнөөг хүртэл цар тахалтай тэмцэхэд нь туслах зорилгоор АНУ-ын Засгийн газраас Монгол Улсад 24.8 тэрбум гаруй төгрөг буюу найман сая ам. долларын туслалцаа үзүүлээд байна. 

 

Эх сурвалж: АНУ-ын ЭСЯ