Уншиж байна ...

Х.Болорчулуун: КОВИД-ын үед 14 их наяд төгрөгийн зардал гаргасан гэж байна. УИХ-ын түр хороо гарч шалгана

Б.Жаргалмаа, IKON.MN
2022 оны 7 сарын 1
iKon.MN
Зураг зураг

УИХ-ын чуулганы өнөөдрийн хуралдаанаар Монгол Улсын 2021 оны нэгдсэн төсвийн гүйцэтгэл, Засгийн газрын 2021 оны санхүүгийн нэгтгэсэн тайлан болон "Монгол Улсын 2021 оны төсвийн гүйцэтгэл батлах тухай" УИХ-ын тогтоолын төслийг үргэлжлүүлэн хэлэлцэж байна.  

Энэ үеэр УИХ-ын гишүүн Х.Болорчулуун КОВИД-ын үед зарцуулсан мөнгө 14 их наяд төгрөгт хүрсэн талаар хэлэв.

Тэрбээр "2021 онд төсвийн хөрөнгө оруулалт 65 хувийн гүйцэтгэлтэй буюу 3 ажил тутмын нэг нь хийгдээгүй. Хүнсний үнэ анх удаа 20 хувь хүрч өндөр өслөө. Төсвийн алдагдал 3 их наядаар хэмжигдэж байна.

КОВИД нөлөөлсөн гэж байгаа. КОВИД-оор далимдуулж маш их мөнгө зарлаа. 14 их наядын зардал гаргасан гэж байна, үнэн үү? Үүнээс хэд нь олон улсын байгууллагын мөнгө, хэд нь төсвөөс гарсан бэ? 5 тэрбум доллар зарсан бол дэндүү их мөнгө байна. КОВИД-ын зарцуулалт дээр аудит ажиллахаар гарсан. УИХ-ын төр хороо гарч шалгана. Тендергүй авдаг зардаг санаанд багтамгүй их мөнгө гарсан байна" гэлээ.

Түүний асуултад Эрүүл мэндийн болон Сангийн сайд нар дараах хариултыг өгөв.

С.Энхболд: КОВИД-ын хоёр жилд эрүүл мэндийн салбарт 1.3 их наяд төгрөг зарцуулсан

Эрүүл мэндийн сайд С.Энхболд: Хоёр жил гаруйн хугацаанд Эрүүл мэндийн салбарт хандив тусламж бүгд нийлээд 1 их наяд 267 тэрбум төгрөг зарцуулсан. Үүний 660 тэрбум нь Эрүүл Мэндийн Даатгалын Сангаас гарсан ба зөвхөн КОВИД-ын тусламж үйлчилгээ, хэвтэн эмчлэх, вакцин дархлаажуулалтад орсон. Үлдсэн мөнгө нь хандив тусламжаар ирсэн мөнгө. Эрүүл мэндийн салбарт төсвийн ерөнхийлөн захирагчийн хүрээнд зарцуулсан мөнгө нь 1.3 их наяд төгрөг. 

Б.Жавхлан:  Дэлгэрэнгүй тайлбарлахад бэлэн байна

Сангийн сайд Б.Жавхлан: Төсвөөс гадуур мөнгө яаж явсныг бид мэдэхгүй. Төсвийн хүрээний мөнгийг мэдэж байна.

2020, 2021 он дамжаад бид нийт эрүүл мэндийн салбараас гадна халамж, нийгмийн салбар, өрхийн эдийн засгийн аюулгүй байдал, ААН-ийн албан татвар, торгууль чөлөөлөх, НД сунгах, хүүхдийн мөнгө, хөнгөлөлт чөлөөлөлт гээд 5.7 их наяд төгрөг гаргасан. 

Зөвхөн эрүүл мэндийн салбарт гаднын зээл тусламж болон төсвөөс нийлээд 1 тэрбум 5.4 сая ам.долларыг КОВИД-ын нөхцөл байдлын үед зарцуулсан. Хандив тусламжаар орж ирсэн вакцин, тоног төхөөрөмж бүгд багтаж байгаа. Европын холбоо 25 тэрбум төгрөг, ДЭМБ, Азийн хөгжлийн банк гэх мэт олон улсын байгууллагууд бүгд тусалсан. 

Дэлгэрэнгүй тайлбарлахад бэлэн байна. 

Тэдний хариултын дараа УИХ-ын гишүүн Х.Болорчулуун "КОВИД-ын түр хороо гээд Б.Баттөмөр гишүүнээр ахлуулсан ажлын хэсгийн мэдээлэл авсан. 14 их наяд төгрөгт хүрсэн байсан, олон улсын байгууллагын зээл тусламж, төсвөөс гарсан мөнгө нийлээд. Хяналт тавьж үнэхээр чадахгүй байгаа. Бүх яамдын мэдээллийг нэгтгэхэд 7 их наяд төгрөг гэж бодсон байтал 14 их наяд болсон байна билээ" гэлээ. 

ВИДЕО:

https://fb.watch/d_rx8aulIk/