• 6 сарын 25, Бямба
Уншиж байна ...
ХУУЧИРСАН МЭДЭЭ: 2022/04/22-НД НИЙТЛЭГДСЭН

Манай улс энэ оны нэгдүгээр улиралд 2.5 сая тонн нүүрс экспортолж, 676 сая ам.долларын орлого олжээ

Т.Саран, iKon.mn
2022 оны 4 сарын 22
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Манай улсын эрдсийн бүтээгдэхүүний экспорт өнгөрсөн оны мөн үеэс 244.9 сая ам.доллар буюу 13.8 хувиар буурахад голлон нөлөөлсөн бүтээгдэхүүнүүдийг танилцуулж байна. 

2022 оны эхний нэгдүгээр улирлын гүйцэтгэлээр авч үзсэн. 

Нүүрс: 2.5 сая тонн нүүрс экспортолж, 675.6 сая ам.долларын экспортын орлого олжээ. Өмнөх оны мөн үетэй харьцуулахад нүүрсний экспортын биет хэмжээ 4.1 сая тонноор, экспортын орлого 13.1 сая ам.доллароор буюу 1.9 хувиар буурсан байна. Нэг тонн нүүрсний экспортын дундаж үнэ өмнөх оны мөн үеэс 167.4 ам.доллар буюу 1.6 дахин нэмэгджээ. 

Зэсийн баяжмал: зэсийн баяжмалын экспортын орлого өнгөрсөн оны мөн үеэс 14.5 хувь буюу 89.8 сая ам.доллароор өсөж, 710.9 сая ам.долларт хүрсэн байна. Зэсийн баяжмалын экспортын биет тоо хэмжээ 334.8 мянган тоннд хүрч, өнгөрсөн оны мөн үеэс 5.8 хувь буюу 18.5 мянган тонноор өсжээ. 

Төмрийн хүдэр: төмрийн хүдрийн экспортын тоо хэмжээ 616.2 мянган тонн болж, 57.5 сая ам.долларын экспортын орлого олсон байна. Төмрийн хүдрийн экспортын орлого өмнөх оны мөн үеэс 75.9 хувь буюу 181.1 сая ам.доллароор буурахад төмрийн хүдрийн биет хэмжээ 67.8 хувь буюу 1.3 сая тонноор буурсан, нэг тонн төмрийн хүдрийн экспортын дундаж үнэ 23.7 хувиар буурсан нь тус тус нөлөө үзүүлжээ.

Цайрын баяжмал: цайрын баяжмалын экспортын тоо хэмжээ 21.9 мянган тонн болж, 41.2 сая ам.долларын экспортын орлого олсон байна. Цайрын баяжмалын экспортын орлого өмнөх оны мөн үеэс 11.3 хувь буюу 5.2 сая ам.доллароор буурахад цайрын баяжмалын биет хэмжээ 29.5 хувь буюу 9.1 мянган тонноор буурсан нь нөлөөлжээ. Хэдийгээр нэг тонн цайрын баяжмалын экспортын дундаж үнэ 25.7 хувиар нэмэгдсэн боловч экспортын тоо хэмжээний огцом бууралт экспортын орлого буурахад нөлөөлжээ.

Алт: алтны экспортын тоо хэмжээ 4.8 тоннд хүрч, 288 сая ам.долларын экспортын орлого олсон байна. Алтны экспортын биет хэмжээ өмнөх оны мөн үеэс 9.9 дахин өссөн ба 2019 оны мөн үеэс 155.8 кг буюу 3.3 хувиар өссөн байна. Алтны экспортын орлого 288 сая ам.долларт хүрсэн нь өмнөх оны мөн үеэс 10.2 дахин буюу 262.3 сая ам.доллароор өсжээ. Харин нэг тонн алтны экспортын дундаж үнэ 6.6 хувиар буурсан үзүүлэлттэй байна.

Катодын зэс буюу тунгаасан зэс ба хайлш: катодын зэсийн экспортын тоо хэмжээ 0.8 тонн болж, 7.4 сая ам.долларын экспортын орлого олсон байна. Катодын зэсийн экспортын орлого 2020 оны мөн үеэс 57.0 хувь буюу 9.9 сая ам.доллароор, өмнөх оны мөн үеэс 72.8 хувь буюу 19.9 сая ам.доллароор тус тус буурсан.

Нэг тонн тунгаасан зэсийн экспортын дундаж үнэ 11.8 хувиар нэмэгдсэн боловч экспортын тоо хэмжээний огцом бууралт экспортын орлого буурахад нөлөөлжээ.