“ABU Robocon-2021” тэмцээнд амжилттай оролцсон багийнхныг Монгол Улсын Ерөнхийлөгч хүлээн авч уулзав

БНХАУ-д цахимаар зохион байгуулсан Ази, Номхон далайн орнуудын “ABU Robocon-2021” тэмцээнд Монгол Улсын баг дэд байр эзэлж, 2019 оны амжилтаа давтсан билээ. 

Энэ тэмцээнд эх орноо төлөөлөн оролцсон Шинжлэх ухаан, технологийн их сургууль, Үндэсний батлан хамгаалахын их сургуулийн багийн гишүүдийг Монгол Улсын Ерөнхийлөгч У.Хүрэлсүх хүлээн авч уулзан баяр хүргэж, амжилт хүсэв.

Тэмцээнээр дамжин хүүхэд, залуусын инженерийн сэтгэлгээ хөгжиж, энэ чиглэлээр суралцах хүсэл эрмэлзэл нэмэгдэн, улмаар ирээдүйн шилдэг инженерүүд төрөн гарна гэдэгт итгэлтэй байгаагаа хэллээ.

2021 оны арванхоёрдугаар сарын 12-ны өдөр болсон тэмцээнд 11 орны 21 баг өрсөлдсөн байна.

Индонез Улсын баг Гран При шагнал хүртсэн бол Ц.Хүрэлбаатар багштай ШУТИС-ийн Мэдээлэл, холбооны технологийн сургуулийн баг дэд, удаах байрыг БНХАУ-ын баг эзэлжээ.

Энэ удаагийн тэмцээний дүрмийг МЭӨ 770-476 оны үед Хятадад гаднын зочин гийчдээ цэнгүүлэхээр “Саванд сум харвадаг” тоглоом тоглуулдаг байсан уламжлалаас сэдэвлэн боловсруулсан аж. 

Тэмцээнийг жил бүр өөр өөр улсад зохион байгуулдаг бөгөөд тухайн улсын ёс заншил, уламжлал, өв соёлыг үндэслэн дүрмийг  боловсруулдаг тул даалгавар нь ялгаатай байдаг.

2019 онд Ази, Номхон далайн бүсийн орнуудын өргөн нэвтрүүлгийн холбоо, МҮОНРТ хамтран “ABU Robocon-2019 Mongolia” олон улсын тэмцээнийг Ерөнхий сайд У.Хүрэлсүхийн ивээл дор зохион байгуулж байсан.

Тэгвэл хэсэг хугацаанд тасалдаад байсан МҮОНРТ-ийн “Залуу зохион бүтээгч” нэвтрүүлгийг энэ жилээс Ерөнхийлөгчийн ивээл дор зохион байгуулахаар төлөвлөжээ.

 

 

 

Эх сурвалж: Ерөнхийлөгчийн хэвлэлийн алба