Зарим караоке болон диско баар, ресторан цагийн хязгаарыг зөрчин шөнийн цагаар ажиллаж байжээ
Нийслэлийн цагдаагийн удирдах газраас "Эмзэг цэг-Хяналт шалгалт" арга хэмжээний дүнгийн талаар танилцууллаа.
2021 оны арванхоёрдугаар сарын 1-5-ны өдрүүдэд нийслэлийн дүүрэг цагдаагийн хэлтсүүдээс офицер 172, цагдаа 367, нийт 519 алба хаагч хяналт шалгалтаар ажиллажээ.
Баянгол, Баянзүрх, Сүхбаатар, Сонгинохайрхан, Хан-Уул, Чингэлтэй дүүрэгт үйл ажиллагаа явуулдаг зарим караоке болон диско баар, ресторан цагийн хязгаарыг зөрчин шөнийн цагаар үйл ажиллагаа явуулж, иргэдийг архидан согтуурах нөхцөл бүрдүүлсэн байжээ.
Түүнчлэн Баянзүрх, Чингэлтэй дүүрэгт үйл ажиллагаа явуулдаг нэр бүхий караоке баарууд Архидан согтуурахтай тэмцэх тухай зэрэг хууль тогтоомжоор хориглосон 21 нас хүрээгүй хүнд архи согтууруулах ундааны зүйлээр үйлчилсэн зөрчил илэрчээ.
Эдгээр байгууллагуудад хариуцлага тооцохоор зөрчил шалган шийдвэрлэх ажиллагаа явуулж эхэлсэн байна.
