СЭРЭМЖЛҮҮЛЭГ: Улсын дугааргүй тээврийн хэрэгсэлтэй жолооч явган зорчигч таван настай хүүхдийг мөргөжээ
Гудамж талбайд халтиргаа гулгаа ихтэй байгаа тул жолооч нар автомашиныхаа дугуйг өвлийнхөөр солих, элэгдлийг нь сайтар шалгахыг Тээврийн цагдаагийн албанаас зөвлөлөө.
Тодруулбал, өчигдөр 17:50 цагийн орчимд орчим Баянгол дүүрэг 13 дугаар хороо Хасбаатарын гудамж Энхболдын уулзвар руу салдаг замд Bongo маркийн улсын дугааргүй тээврийн хэрэгсэлтэй жолооч, ээжтэйгээ явж байсан таван настай хүүхдийг мөргөж, амь насыг нь хохироосон харамсалтай явдал болжээ.
Цагдаагийн байгууллагаас урьдчилсан байдлаар үзлэг хийхэд "Bongo" маркийн автомашин нь улсын дугааргүй, дугуйн хээний элэгдэл нь тогтоосон хязгаараас хэтэрсэн, тухайн жолоочийг драгер багажаар шалгахад согтууруулах ундааны зүйл хэрэглээгүй нөхцөл байдал тогтоогдсон байна.
Одоогоор мөрдөн шалгах ажиллагаа үргэлжилж байгаа гэж Тээврийн цагдаагийн албанаас мэдээллээ.
Иймд жолооч нар хуулиар хүлээсэн үүрэг хариуцлагаа ухамсарлаж, замын хөдөлгөөнд оролцохдоо замын хөдөлгөөний дүрмийг чанд баримтлахыг анхааруулав.
ВИДЕО:
