Уншиж байна ...
Зураг
Зураг
ХУУЧИРСАН МЭДЭЭ: 2021/10/25-НД НИЙТЛЭГДСЭН

Б.Ганхуяг: ЭТТ аравдугаар сарын 20-ноос хагас коксжих болон эрчим хүчний нүүрсний борлуулалтыг зогсоосон. Нөхцөл байдал хүнд байна

Б.Бадамгарав, IKon.mn
2021 оны 10 сарын 25
iKon.MN
Зураг зураг
Гэрэл зургийг mpa.mn

"Жишиг үнэ ба АМНАТ" хэлэлцүүлгийн үеэр "Эрдэнэс Тавантолгой" ХК-ийн Гүйцэтгэх захирал Б.Ганхуягийн илэрхийлсэн байр суурийг онцлон хүргэж байна.

Тэрбээр "КОВИД-19-өөс дутахгүй хоёр дахь дарамт нь АМНАТ болсон" хэмээн ярианы эхэнд онцолсон. Тус компани энэ оны хоёрдугаар улиралд нэг тонн коксжих нүүрсийг 83 ам.доллароор борлуулахад 260 гаруй ам.доллар буюу 259% өндөр АМНАТ ногджээ.

"Эрдэнэс Тавантолгой" ХК-ийн Гүйцэтгэх захирал Б.Ганхуяг "Бид аравдугаар сарын 20-ноос хагас коксжих болон эрчим хүчний нүүрсний борлуулалтыг зогсоосон. 13-14 ам.доллароор борлуулчхаад 15 ам.долларын АМНАТ төлөх нь бизнес биш. Олборлож гаргахын тулд ч зардал гаргаж байгаа. Зөвхөн зардал гаргахын тулд бизнес хийнэ гэдэг бол субботник л юм.

Коксжих нүүрсний байдал хүнд байна. Эрдэнэс Тавантолгой ХК нийт 2.4 их наяд төгрөгийг улсад төвлөрүүлсэн байдаг. Үүний 2.2 их наядыг сүүлийн дөрвөн жилд төвлөрүүлсэн. Өндөр ачаалал авч байгаа.

Бүх төрлийн татвар хураамжаа төлж байна. Үүн дээр нэмээд нийгмийн хариуцлага, цар тахлын нөхцөл байдал хүндэрсэн тул компани их хэмжээний зардлыг хувьцаа эзэмшигчдийнхээ сайн сайхны төлөө, төрөөс өгсөн чиг үүргийг хэрэгжүүлж ирсэн. Давхар АМНАТ-ын дарамт авч болохгүй. Юманд учиртай байх ёстой. Харилцан ашиг олох гэж байгаа гэдэг утгаар биш, хэрэв төр татвар хураамжаа авах гэж байгаа бол татварын шударга, эн тэнцүү зохицуулалттай байх ёстой. Хэдийгээр АМНАТ 10% гэдэг ч жишиг үнээр тооцоход 34-37%-ийн татвар төлж байна" гэлээ.

Түүнчлэн тэрбээр "АМНАТ-ын талаар ярихаар Сангийн яамныхан төр нэг талд сууж байж ингэж болох юм уу гэдэг. Гэхдээ хажууд суучхаад бөөр рүү цохиод байхаар яаж тайван суух вэ дээ. Энэ бол бизнес, өөрийн гэсэн чиг үүрэгтэй. 81% нь төрд байгаа ч 2,513,000 хувьцаа эзэмшигч, 600 гаруй аж ахуйн нэгж бий. Тиймээс бизнесийг бизнес чигээр нь хөгжүүлээч ээ гэж байгаа юм.

Экспорт хүнд үед дотоодоо дэмжиж, хөл дээр нь босгож, урагш явуулах ёстой байтал хөл дээрээ босоогүй байхад дээрээс нь дэвсэлдэг бодлого аль ч оронд байдаггүй. Харин манайд цагаан дээр хараар бий болсон. Үүнийг хэлж байгаадаа санаа зовохгүй байна. Төрийн болон хувьцаа эзэмшигчдийнхээ төлөө хийж байгаа ажил учраас. Энэ компани цаашид босож, хөгжих ёстой.