2021/10/22
Америк доллар
МОНГОЛ БАНК:
2,848.97₮
B30
УЛААНБААТАР
10°
|
-5°
B30
УЛААНБААТАР
10°
|
-3°
B30
УЛААНБААТАР
|
-3°
11:00
S30
12:00
S32
13:00
S30
14:00
S30
15:00
S30
16:00
S30
17:00
S30
18:00
S29
19:00
S29
20:00
S29
21:00
S29
22:00
S29

Нэгдсэн нэг стандартын цэнэглэгчтэй болох Европын Холбооны төлөвлөгөөг Apple эсэргүүцжээ

Р.Түвшин, iKon.mn
2021 оны 9 сарын 24
iKon.MN
Зураг

Европын Холбооны эрх баригчид гишүүн орнуудынх нь зах зээлд худалдаалагдаж байгаа бүх гар утас, таблет, чихэвчнүүдийг нэгдсэн нэг стандартын цэнэглэгчтэй болгох төлөвлөгөөгөө өчигдөр танилцуулжээ.

Бүх брэндийн төхөөрөмжүүд нэг цэнэглэгчтэй болсноор хэрэглэгчид хожиж, электрон хог хаягдлын хэмжээг бууруулах сайн талтай гэж төслийг санаачлагчид тайлбарласан байна. Тэдний тооцоолсноор Европын Холбоо үүнээс жил бүр 250 сая еврог хэмнэх гэнэ.

Төлөвлөгөөний дагуу бүх төхөөрөмж USB-C стандартын портоор цэнэглэгддэг болох ажээ. Ийм портыг Андроид төхөөрөмжүүд цэнэглэгчдээ ашигладаг. Хэрвээ төлөвлөгөө бодитой хэрэгжвэл “Lightning” порт ашигладаг Apple компани хохирох юм.

Ингэхдээ Европын Холбоо үйлдвэрлэгчдэд шилжилтийн хоёр жилийн хугацаа өгөх юм байна.

Apple компаниас өчигдөр гаргасан мэдэгдэлд Европын Холбооны төлөвлөгөөг шүүмжилжээ. “Зөвхөн нэг төрлийн портыг хатуу тулгаж журамлах нь инновацийг хязгаарлаж, эцэстээ Европын төдийгүй дэлхийн нийт хэрэглэгчдийг хохироох уршигтай юм” гэж тус компани тайлбарласан байна.

Евро коммиссийн дэд ерөнхийлөгч Маргрет Вестагер төлөвлөгөөгөө хамгаалж хэлэхдээ “Бид энэ салбарынханд өөрийн шийдлийг танилцуулах хангалттай хугацаа өгсөн. Харин одоо нэгдсэн стандартын цэнэглэгчийг хуульчлах цаг нь болсон. Ингэснээр манай хэрэглэгчид хожиж, байгаль орчинд сайнаар нөлөөлнө. Энэ бол ногоон эдийн засаг, дижитал шилжилтийн ерөнхий төлөвлөгөөтэй маань нийцэж байгаа юм” гэжээ.

Европын Холбооны сүүлд хийсэн судалгаагаар тус бүсийн орнуудын зах зээлд 2018 онд зарагдсан гар утаснуудын тал орчим нь USB micro-B порттой, 29 хувь нь USB-C, 21 хувь нь Lightning порттой байжээ.

 

Эх сурвалж: The Guardian

 

x