Уншиж байна ...
ХУУЧИРСАН МЭДЭЭ: 2021/09/15-НД НИЙТЛЭГДСЭН

Б.Баттүшиг: МҮОХ нь спортын холбоодын дотоод үйл ажиллагаанд оролцдоггүй ч тамирчдын эрх ашгийг хамгаалах үүрэгтэй

Д.Тэмүүлэн, ikon.mn
2021 оны 9 сарын 15
iKon.MN
Зураг зураг
Гэрэл зургийг MPA.mn

Сүүлийн үед цахим орчинд тархаж буй мэдээлэлтэй холбоотойгоор Монголын Үндэсний Олимпын хорооны Тэргүүн Дэд Ерөнхийлөгч Б.Баттүшиг мэдэгдэл гаргажээ.

Тус мэдэгдэлд,

"Сүүлийн өдрүүдэд хэвлэл мэдээллийн байгууллага, олон нийтийн сүлжээгээр Монгол Улсын гавьяат тамирчин Э.Цэндбаатартай холбоотой сөрөг мэдээллүүд тархаж байгаа тул энэхүү мэдэгдлийг гаргаж байна.

Миний бие “Токио 2020” Олимпын наадамд багийн ахлагчийн хувиар оролцох үедээ тухайн тамирчныг бүх талаар дэмжин ажиллаж, холбогдох байгууллагуудад шаардлагатай мэдээллийг цаг алдалгүй хүргэн, үүссэн асуудлуудыг шийдвэрлэх чиглэлд анхаарал хандуулан ажилласан билээ.

МҮОХ-ны дүрмийн дагуу МҮОХ нь спортын холбоодын дотоод үйл ажиллагаанд оролцдоггүй ч олимпизмын үзэл санааг дэлгэрүүлэх, тамирчдын эрх ашгийг хамгаалах үүрэгтэй байдаг. Үүсээд буй асуудалтай холбогдуулан МҮОХ-ны тамирчдын комиссын дарга Д.Отгондалай тамирчдын эрх ашгийг хамгаалан дэмжиж ажиллахыг хичээнгүйлэн хүсье.

Спорт холбоодын үйл ажиллагаа, шийдвэр нь ямагт тамирчдад ээлтэй байдлыг эрхэмлэн гардаг, тив, дэлхийн хэмжээний уралдаан тэмцээнд зөвшөөрөгдсөн хүрээнд олон тамирчин оролцож, үнэтэй туршлага хуримтлуулах үндэс болдог гэдэгт миний бие бүрэн итгэдэг.

Мөн дээрх асуудалтай холбогдуулан ирэх арваннэгдүгээр сард товлогдсон МҮОХ-ны чуулгантай холбоотой одоогийн удирдлагуудыг харлуулах, хуурамч мэдээлэл түгээх, үндэслэлгүйгээр дайрч давшлах үйлдэл ихээр гарч байгаад харамсаж байгаагаа илэрхийлье. Спорт, олимпзмын төлөө ажиллаж байгаа хэн бүхэн шударга, ёс зүйтэй өрсөлдөхийг хүсэж байна.

МҮОХ-ны Тэргүүн Дэд Ерөнхийлөгч Б.Баттүшиг" гэжээ.

Ташрамд дурдахад, Монгол Улсын Гавьяат тамирчин Э.Цэндбаатар өөрийгөө дэлхийн аварга шалгаруулах тэмцээнд оролцуулах хүсэлтээ өнөөдөр Монголын үндэсний олимпын хороонд хүргүүлсэн юм.