Нийслэлд зөвшөөрөлгүй баригдсан тоосгон гараашуудыг буулгаж, газрыг чөлөөлж, тохижуулах ажил үргэлжилсээр байна.
Энэ хүрээнд нийслэлийн Баянгол дүүргийн 4 дүгээр хорооны нутаг дэвсгэрт, 164 дүгээр цэцэрлэгийн баруун талд байрлах нийтийн эдэлбэр газарт зөвшөөрөлгүй байрлах найман ширхэг тоосгон гарааш, 8 дугаар байрны хойд орцыг хааж барьсан 195 м.кв талбай бүхий нэг өргөтгөлийн барилгыг нураажээ.
Ингэхдээ Баянгол дүүргийн Засаг даргын 2021 оны А/363 тоот захирамжийг үндэслэсэн байна. Албадан чөлөөлөх ажлыг Нийслэлийн Газар зохион байгуулалтын албаны албан хаагчид хийж гүйцэтгэсэн бөгөөд чөлөөлөгдсөн газарт автомашины ил зогсоол, тохижилтын ажил хийгдэх юм.
Эх сурвалж: Нийслэлийн Газар зохион байгуулалтын алба