Төсвийн тэнцэл 831 тэрбум төгрөгийн алдагдалтай гарав
Төсвийн тэнцвэржүүлсэн орлого өмнөх оны мөн үетэй харьцуулахад 56 хувиар буюу 2.9 их наядаар нэмэгдсэнийг ҮСХ-ноос мэдээллээ.
Төсвийн гүйцэтгэл батлагдсан төсвийг 2.4 хувиар давсан үзүүлэлттэй байна. Төсвийн орлого нэмэгдэхэд татварын орлого голлон нөлөөлсөн байна. Төсвийн зардал өнгөрсөн оны мөн үетэй харьцуулахад 15 хувиар өссөн. Ингэснээр оны эхний долоон сарын байдлаар төсвийн тэнцэл 831 тэрбум төгрөгийн алдагдалтай гарчээ.
Төсвийн нийт зардлын 87.1 хувийг урсгал, 11.7 хувийг хөрөнгийн зардал эзэлж байна. Урсгал зардал өнгөрсөн оны мөн үетэй харьцуулахад нэмэгдсэн бөгөөд үүнд цар тахлын үед авч хэрэгжүүлсэн иргэдийн санхүүг дэмжих ажлууд нөлөөлжээ.
Улсын нэгдсэн төсвийн орлогод татварын бус орлогын эзлэх хувь өмнөх оны мөн үеэс 2.9 хувь, тогтворжуулалтын сангийн орлого 3.1 пункт, ирээдүйн өв сангийн орлого 1.6 пунктээр өсөж, татварын орлого 7.6 пунктээр буурсан.
Татварын нийт орлого 2021 оны долдугаар сарын урьдчилсан гүйцэтгэлээр 1.2 их наяд төгрөг болж, өмнөх сараас 130.4 (12.7%) тэрбум төгрөгөөр өссөн. Үүнд орлогын албан татвар 289.4 (2.3 дахин) тэрбум төгрөг, бусад татвар, төлбөр хураамжийн орлого 1.2 (1.3 хувь) тэрбум төгрөг, онцгой албан татварын орлого 2.4(3.1%) тэрбум төгрөгөөр өссөн нь нөлөөлжээ.
