Уншиж байна ...
Зураг
Зураг
ХУУЧИРСАН МЭДЭЭ: 2021/08/05-НД НИЙТЛЭГДСЭН

Токио 2020 олимпын наадамд өнөөдөр гурван монгол тамирчин өрсөлдөнө

Б.МАНЛАЙ, IKON.MN
2021 оны 8 сарын 5
iKon.MN
Зураг зураг
Гэрэл зургийг Монголын чөлөөт бөхийн холбооны хуудсаас авав

Зуны олимпын 32 дахь удаагийн наадамд өнөөдөр чөлөөт бөхийн гурван монгол тамирчин өрсөлдөнө. 

Өнөөдөр 10:00 цагт чөлөөт бөхийн эмэгтэйчүүдийн 57 кг-ын жингийн дагах барилдаан эхэлнэ. Уг жинд манай улсаас Болдсайханы Хонгорзул өрсөлдөж буй бөгөөд дагах барилдаанаа Гвиней улсын тамирчин Фатумата Камаратай хийнэ. 

Эргэн сануулахад, Б.Хонгорзул шөвгийн наймд Япон улсын тамирчин Рисако Кавайтай барилдаж, ялагдал хүлээсэн. Харин Рисако Кавай финалд шалгарснаар манай тамирчин Б.Хонгорзул хүрэл медалийн төлөө барилдах боломжтой болсон билээ. 

Уг жингийн шигшээ барилдаан 17:15 цагт эхлэх хуваарьтай байна.

Мөн чөлөөт бөхийн эмэгтэйчүүдийн 53 кг-ын жинд манай улсаас Бат-Очирын Болортуяа дэвжээнд гарна. Түүний эхний учраа нь Гуам улсын тамирчин Р.Акино байна. 

Харин эрэгтэйчүүдийн 125 кг-ын жинд Мөнхтөрийн Лхагвагэрэл зодоглоно. Тэрбээр энэ удаагийн олимпын наадмын эхний барилдаанаа Беларусийн бөх Денис Храмянковтой хийх оноолт таарчээ.

Чөлөөт бөхийн эмэгтэйчүүдийн 53 кг, эрэгтэйчүүдийн 125 кг-ын жингийн барилдаанууд Улаанбаатарын цагаар 10:30 цагт эхлэх бөгөөд манай тамирчин Б.Болортуяа зургаа дахь, М.Лхагвагэрэл долоо дахь барилдаанд дэвжээнд гарна.