Хавар түрсээ шахдаг загасыг зургаадугаар сарын 15-н хүртэл барихыг хуулиар хориглоно

Нуур, голоос загасыг үржлийн үед нь барихгүй байх нь хамгаас чухал бөгөөд загас барих хугацааг мөрдөөгүйн улмаас агнуурын загасны нөөц хомсдож, бүрмөсөн устах аюултай.

Хэрэв та загас агнахыг зорьж байгаа бол загасны төрөл, зүйлээс хамаарч хуулиар хориглосон хугацаанаас бусад үед, ахуйн зориулалтаар загас барих журмыг мөрдөх шаардлагатай. Иргэн та загасны түрс шахалтын үед загас барих ёсгүй юм.

Амьтны тухай хуулинд

• хавар түрсээ шахдаг загасыг жил бүрийн дөрөвдүгээр сарын 1-ний өдрөөс зургаадугаар сарын 15-ны өдөр хүртэл,
• Дархадын цагаан загасыг наймдугаар сарын 1-ний өдрөөс аравдугаар сарын 20-ны өдөр хүртэл,
• Омоль загасыг наймдугаар сарын 30-ны өдрөөс аравдугаар сарын 30-ны өдөр хүртэл,
• цагаан зарам загасыг есдүгээр сарын 5-ны өдрөөс дараа оны нэгдүгээр сарын 30-ны өдөр хүртэл тус тус агнахыг хориглоно.

 

Эх сурвалж: Экологийн Цагдаагийн алба

Монголд хавар-зун, намар-өвөл түрсээ шахдаг зүйлүүд тархана. Хавар дөрвөн сараас 3 настай цурхай загас, усны температур 3-6⁰С хүрэхэд гүехэн устай, элсэрхэг хурдас бүхий ургамалтай хэсгээр 74,000-236,500 ширхэг түрс шахна. Зэвэг загас 6-7 наснаас үржилд орж усны температур 6-12⁰С хүрэхэд голын харгиа, хайрга чулуун дээр 2,300-7,700 ширхэг түрс, хадран загас усны температур 4-6⁰С-д харгиатай хэсгийн чулуун дээр 2,000-18,000 ш түрс гаргана.

Хилэм загас найман наснаасаа боловсорч гүйцэх бөгөөд тавдугаар сард голын усны температур 9-15⁰С болоход элсэрхэг хурдсанд 88,800-636,000 ш түрс орхино. Тул загас 5-6 наснаасаа эхлэн голын харгианд тогоо үүсгэн бэлтгэж, усны температур 10⁰С хүрэхэд 8,500-30,000 ш түрс шахна. Сугас, булуу цагаан, хэлтэг, морин загас, улаан живэрт, монголын улаандалбаат, өлгөр цагаан, цулбуурт, алгана загаснууд 2-5 насандаа үржилд орж 10,000-300,000 ш түрс нуур, голын гүехэн устай хэсэгт ургамал дээр 12-25⁰С болох үед шахна. Булууцагаан, хэлтэг, алтайн шар сугас зэрэг зарим загас түрсээ 7-10 өдрийн зайтай 2-3 удаа хэсэг, хэсгээр таслаж гаргана.

Дархадын цагаан загас, омоль, цагаан хадир, цагаан зарам загас хоёр наснаас бэлгэ боловсорч намар наймдугаар сараас өвөл нэгдүгээр сард, усны температур 12-1.4⁰С болж буурахад 5,000-98,000 ширхэг түрс элс, хайрга чулуурхаг хурдсанд, гутаарь 3-4 наснаас голын элс, хайрга-чулуун дээр 0.5-1⁰С-д 20,000-350,000 ширхэг түрс шахдаг. Үржлийн үед ялангуяа эр загас гоёмсог өнгөтэй болж, толгой, биеэн дээр мөнгөлөг товгор үүсч, сэлүүрүүдийн толбо тодорно.

Эх сурвалж: Экологийн Цагдаагийн алба